ރައީސް މުހައްމަދު މުއިއްޒުއާ ސުވާލެއް ކުރުމާ ގުޅިގެން، 15 ދުވަހުގެ ޖަލު ހުކުމެއް ތަންފީޒު ކުރަމުންދާ "އަދަދު" ނޫހުގެ ނޫސްވެރިޔާ މުހައްމަދު ޝަހުޒާން މިނިވަން ކުރުމަށް ގޮވާލައި، މިރޭ އާޓިފިޝަލް ބީޗު ކުރިމައްޗަށް އެއްވާން ނިންމައިފި އެވެ.
މިރޭ 21:00 ގައި ބޭއްވުމަށް ހަމަޖެހިފައިވާ މި އެއްވުމުގައި ނޫސްވެރިންގެ އިތުރުން ޝަހުޒާންގެ އާއިލާގެ މެންބަރުން ވެސް ބައިވެރިވުމަށް ވަނީ ނިންމާފަ އެވެ. އަދި މި އެއްވުމުގައި ވީހާވެސް ގިނަ ބަޔަކު ބައިވެރިވުމަށް އިންތިޒާމުކުރާ ފަރާތްތަކުން ވަނީ އެދިފަ އެވެ.
ގާނޫނީ އެހީތެރިކަން ހޯދުމަށް އެކަށީގެންވާ ވަގުތެއް ނުދީ، އަވަސްއަރުވާލައިގެން ބޭއްވި ޝަރީއަތެއްގައި ޝަހުޒާންގެ މައްޗަށް ހުކުމް ކުރީ، "އަދަދު" ނޫހުން ނެރުނު "އައިޝާ" ޑޮކިއުމެންޓަރީގެ ވާހަކަ ދެއްކުން ހުއްޓުވުމަށް ކްރިމިނަލް ކޯޓުން ނެރުނު އަމުރާ ހިލާފުވި ކަމަށް ނިންމުމަށްފަހު އެވެ.
ޝަހުޒާންގެ މައްޗަށް އިއްވީ ހަތަރު މަހާއި 24 ދުވަހުގެ ޖަލު ހުކުމެކެވެ. ނަމަވެސް އޭގެ ތެރެއިން 15 ދުވަސް ޖަލުގައި ހޭދަކުރަންޖެހޭ ގޮތަށް ކަނޑައަޅައި، ހުކުމުގެ ބާކީ ބައި ވަނީ ޖޫރިމަނާއަށް ބަދަލުކޮށްދީފަ އެވެ. އެގޮތުން ޖޫރިމަނާގެ ގޮތުގައި ދައްކަންޖެހޭ 25,800 ރުފިޔާ، 20 ދުވަހުގެ ތެރޭގައި މީރާއަށް ދެއްކުމަށް ކޯޓުން ވަނީ އަމުރުކޮށްފަ އެވެ.
ޝަހުޒާން މިނިވަންކުރުމަށް ގޮވާލައި ރާއްޖެއާއި ބައިނަލްއަގުވާމީ ގިނަ ޖަމިއްޔާތަކަކުން ދަނީ އަޑުއުފުލަމުންނެވެ. އަދި ރާއްޖޭގައި ނޫސްވެރިއަކު ޖަލަށްލީ ހަބަރު ބޭރުގެ ބޮޑެތި މީޑިއާތަކުގެ ސަމާލުކަމަށް ވެސް މިހާރު ވަނީ އައިސްފަ އެވެ.
