އިންޑިއާގެ ކަނޑުގެ ސިފައިންނާއި ދިވެހި ސިފައިން ގުޅިގެން ކުރިއަށްގެންދާ ސިލްސިލާ އަސްކަރީ ތަމްރީނު, 'އެކަތަ' ގެ ހަތްވަނަ ބުރު ފަށައިފި އެވެ.
ރާއްޖޭގައި ހުންނަ އިންޑިއާގެ ހައި ކޮމިޝަނުން ސޯޝަލް މީޑިއާގައި ކުރި ޕޯސްޓެއްގައި ބުނީ، މި ހަރަކާތުގެ ސަބަބުން ދެ ގައުމުގެ އަސްކަރީ ގާބިލުކަން ވަރުގަދަވާނެ ކަމަށެވެ. އަދި ދެ ގައުމުގެ ކަނޑުގެ ސަރަހައްދު ބެލެހެއްޓުމުގައި އިތުރަށް ގުޅުން ބަދަހިވެގެންދާނެ ކަމަށެވެ.
ނަމަވެސް މި ތަމްރީނު ކުރިއަށްދަނީ ކޮން ސަރަހައްދެއްގައި ކަމެއް އަދި ހަރަކާތް ކުރިއަށްދާނެ މުއްދަތެއް އެ ޕޯސްޓުގައި ބުނެފައެއް ނުވެ އެވެ.
ދިވެހި ސިފައިން އަދި ދިފާއީ ވުޒާރާއިންވެސް މި ހަރަކާތާ ބެހޭ އެއްވެސް މައުލޫމާތެއް މިހާތަނަށް ހިއްސާކޮށްފައެއް ނުވެ އެވެ. އާންމުކޮށް ދިވެހި ސިފައިން ބައިވެރިވާ އަދި އެހެން ގައުމުތަކުގެ ރާއްޖެ އައިސްގެން ކުރިއަށް ގެންދާ ހަރަކާތްތަކުގެ މައުލޫމާތު ސިފައިން އާންމުކުރެ އެވެ.
މި މަހު ކުރީކޮޅު ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ދަތުރުގައި އެ ގައުމުގެ ބޮޑުވަޒީރު ނަރެންދުރަ މޯދީއާއި ބައްދަލުކުރައްވާ ބޭއްވި ރަސްމީ ބައްދަލުވުންތަކަށްފަހު އެކުލަވާލި ވިޝަން ޑޮކިއުމެންޓުގައި އަސްކަރީ ގުޅުން ބަދަހިކުރުން ހިމެނެ އެވެ.
އެ ޑޮކިއުމެންޓުގައިވާ ގޮތުން ކަނޑުމަތީގެ އަދި ސަލާމަތީ ކަންކަން ކުރިއެރުވުމުގައި، ސިފައިންނާއި، ދިވެހި ސަރުކާރުގެ ގާބިލުކަން އިތުރުކުރުމަށް، އިންޑިއާގެ ދިފާއީ ޕްލެޓްފޯމްތައް (އަސްކަރީ އުޅަނދުތައް) އަދި އެސެޓްތައް ރާއްޖެއަށް ފޯރުކޮށްދޭނެ އެވެ. އަދި ދެ ގައުމު ގުޅިގެން އަސްކަރީ ހަރަކާތްތައްވެސް ކުރިއަށް ގެންދާނެ އެވެ.
މިއީ މީގެ ކުރިންވެސް ސިލްސިލާކޮށް ކުރިއަށް ގެންގޮސްފައިވާ ހަރަކާތެއް ކަމުން މިއީ ވިޝަން ޑޮކިއުމެންޓުގެ ދަށުން ގެންދާ ހަރަކާތެއްކަން ކަށަވަރެއް ނޫނެވެ.
