ގައުމީ އެއާލައިން މޯލްޑިވިއަން ހިންގާ ސަރުކާރުގެ ކުންފުނި އައިލެންޑް އޭވިއޭޝަނުން ނަގާފައިވާ ލޯނުތަކާއި އެ ކުންފުނީގެ މާލީ ހާލަތާ ގުޅޭ މައުލޫމާތު ހިއްސާކުރަން ރައްޔިތުންގެ މަޖިލީހުގެ އެސްއޯއީ ކޮމިޓީގެ ސަބް ކޮމިޓީން މިއަދު ބޭއްވި ބައްދަލުވުން ސިއްރުކޮށްފި އެވެ.
އައިލެންޑް އޭވިއޭޝަނުގެ އިސްވެރިން ހާޒިރުކޮށް މައުލޫމާތު ހޯދަން މަސައްކަތް ކުރާ ސަބް ކޮމިޓީގައި ހިމެނެނީ ކިނބިދޫ ދާއިރާގެ މެންބަރު އަލީ އަޝްރަގު، މާވަށު ދާއިރާގެ މެންބަރު އަހުމަދު ޝާކިރު، ފޭދޫ ދެކުނު ދާއިރާގެ މެންބަރު އިބްރާހިމް ދީދީ، އަދި ގައްދޫ ދާއިރާގެ މެންބަރު މުހައްމަދު އަލީ އެވެ.
ބައްދަލުވުން ސިއްރުކުރަން ހުށަހަޅުއްވަމުން މެންބަރު އިބްރާހިމް ވިދާޅުވީ، މި މަސައްކަތުގެ ސާފު ތަފުސީލާ ހަމައަށް ނުދެވެނީސް މީޑިއާ ގެނެސްގެން 'ސަކަރާތް ގަނޑެއް' ޖެހުމުގެ ބަދަލުގައި ބައްދަލުވުން ސިއްރުކުރަން ހުށަހަޅާ ކަމަށެވެ.
މި ހުށަހެޅުމާ އެއްގޮތަށް ކޮމިޓީ ސިއްރުކުރަން ނިންމަވަމުން ސަބް ކޮމިޓީގެ މުގައްރިރު އަޝްރަގު ވިދާޅުވީ އެގޮތަށް ނިންމަނީ މިއީ ސަބް ކޮމިޓީއެއް ކަމުން ކަމަށާއި މައި ކޮމިޓީ ކުރިއަށް ގެންދާނީ ހުޅުވާލައިގެން ކަމަށެވެ.
އެސްއޯއީ ކޮމިޓީގެ މި ސަބް ކޮމިޓީއަކީ އައިލެންޑް އޭވިއޭޝަނާއި އެމްއޭސީއެލް އާއި ރީޖަނަލް އެއާޕޯޓްސްގެ އިތުރުން އައްޑޫ އިންޓަނޭޝަނަލް އެއާޕޯޓުގެ ކުންފުންޏާ ގުޅޭ މައްސަލަތައް ބެލުމަށާއި ދިރާސާ ކުރުމަށް އެކުލަވާލާފައިވާ ސަބް ކޮމިޓީ އެކެވެ.
މިއަދު އެ ކޮމިޓީއަށް ހާޒިރުކުރި އައިލެންޑް އޭވީއޭޝަނަކީ ސަރުކާރުގެ ކުންފުނިތަކުގެ ތެރެއިން އެންމެ ބޮޑަށް ގެއްލުން ވަމުންދާ އެއް ކުންފުންޏެވެ. އެ ކުންފުންޏަށް މިދިޔަ އަހަރު އެކަނިވެސް 71 މިލިއަން ރުފިޔާގެ ގެއްލުންވި އެވެ.
