ރާއްޖޭގެ ފުޓްބޯޅައިގެ ފޯރި އަލުން ވީހާވެސް ބޮޑަށް ގަދަ ކުރުމުގެ ބޭނުމުގައި "ގޯލްޑް ކަޕް"ގެ ނަމުގައި މުޅި ރާއްޖެ އަށް ހުޅުވާލައިގެން ބާއްވާ ފުޓްބޯޅަ މުބާރާތުގައި މި ފަހަރު 22 ޓީމު ވާދަކުރާއިރު، ޓީމުތަކުން ވަރުގަދަ އަށް އަންނަނީ ތައްޔާރީތައް ކުރިއަށްގެންދަމުންނެވެ.
މަޝްހޫރު ފުޓްބޯޅަ ކޯޗު، މުހައްމަދު ޝާޒްލީ (ޝާޒް)ގެ އިސްނެގުމާ އެކު، އޭނާ ހިމެނޭހެން ހިންގާ 90 ޕްލަސް އިން ސެޕްޓެމްބަރު މަހު އިއުލާނުކުރި ގޯލްޑް ކަޕްގެ މި ފަަހަރުގެ މުބާރާތް ކުރިއަށްދާނީ 22 ޓީމެއްގެ މެދުގައި ކަމަށް ވަނީ އިއުލާނުކޮށްފަ އެވެ. އެ ޓީމުތަކުގެ ތެރޭގައި، ރާއްޖޭގެ ފުޓްބޯޅައިގެ ވަރުގަދަ ބާރުތައް ގޮތުގައި މަޝްހޫރުވެފައިވާ ރަށްތައް ވެސް ހިމެނެ އެވެ.
އެ ގޮތުން ބައިވެރިވެފައިވާ ރަށްތަކަކީ، ހއ. ދިއްދޫ، ހދ. ނޭކުރެންދޫ، ރ. އަލިފުށި، ބ. އޭދަފުށި. ބ. ތުޅާދޫ، ބ. ކެންދޫ، ޅ. ނައިފަރު، ޅ. ހިންނަވަރު، ޅ. ކުރެންދޫ، މާލެ ސިޓީ، ކ. މާފުށި، ކ. ހުރާ، ކ. ގުރައިދޫ، އއ. ތޮއްޑޫ، ފ. ނިލަންދޫ، ދ. މީދޫ، ދ. ކުޑަހުވަދޫ، ތ. ތިމަރަފުށި، ގއ. ދެއްވަދޫ، ގދ. ފަރެސްމާތޮޑާ، ފުވައްމުލައް ސިޓީ އަދި އައްޑޫ ސިޓީ އެވެ.
އަންނަ މަހުގެ 20 އިން ޑިސެމްބަރު 25 އަށް ގަލޮޅު ދަނޑުގައި ކުރިއަށްދާ މި މުބާރާތަށް ޓީމުތަކުން ވަނީ ތައްޔާރީތައް ފަށައިފަ އެވެ. އެ ގޮތުން، ރ. އަލިފުށިން ވަނީ، ވެލެންސިއާގައި ކާމިޔާބު ކޯޗިން މަސައްކަތް ކުރަމުން އަންނަ އިސްމާއިލް އާސިފް (ކުޑަހީނާ) ކޯޗަކަށް ހަމަޖައްސައި، ޕްރެކްޓިސް ފަށައިފަ އެވެ.
ކ. މާފުށީގެ ކޯޗަކަށް، އައްޑޫގައި ފުޓްބޯޅަ ކޯޗިންގެ މުހިންމު މަސައްކަތްތަކެއްކޮށް، އެފްއޭއެމްގެ ޓެކްނިކަލް ޑިރެކްޓަރުކަން ވެސް ކުރި އަހުމަދު ޝަރީފް (ޑުންގާ) ހަމަޖެއްސިއިރު، ވެލެންސިއާ، ނިއު ރޭޑިއަންޓް އަދި ވިކްޓަރީގައި ކޯޗުކަން ކުރި ގައުމީ ޓީމުގެ ކުރީގެ ޑިފެންޑަރު، ސޮބާހު މުހައްމަދު (ސޮބާ) ވަނީ ފުވައްމުލަކު ސިޓީއާ ހަވާލުވާން ނިންމައިފަ އެވެ.
ރާއްޖޭގެ ފުރަތަމަ ޑިވިޝަނުގެ ލީގު ދިވެހި ޕްރިމިއާ ލީގަށް 2015 ވަނަ އަހަރު ބަދަލުކުރި ފަހުން ލީގުގައި ކުޅުނު ދ. ކުޑަހުވަދޫ، ތ. ތިމަރަފުށި، ފ. ނިލަންދޫ ވެސް މި ފަހަރު ގޯލްޑް ކަޕްގައި ކުޅެ އެވެ. ރާއްޖޭގެ އެންމެ މަތީ ފުޓްބޯޅައިގައި ނަން ފާހަގަކޮށްލެވޭ ބ. އޭދަފުށްޓާއި ކ. ހުރާ އަދި އއ. ތޮއްޑޫ އިން ވެސް މި ފަހަރުގެ މުބާރާތުގައި ވާދަކުރާނެ އެވެ. މީގެ އިތުރުން، ފުޓްބޯޅައިގައި ބޮޑެތި މުބާރާތްތައް ބާއްވަމުން އަންނަ، ޅ އަތޮޅުގެ ހިންނަވަރާއި ނައިފަރުގެ އިތުރުން ހއ. ދިއްދޫ ވެސް އަންނަނީ މުބާރާތައް ތައްޔާރުވަމުންނެވެ.
ގޯލްޑް ކަޕް ރޭވިފައިވަނީ، ޗެމްޕިއަން ޓީމަށް އެއް ލައްކަ ރުފިޔާ އާއި ރަނަރަޕަށް ބައިލައްކަ ރުފިޔާ ދޭ ގޮތަށް ކަމަށް 90 ޕްލަސް އިން މީގެ ކުރިން ވަނީ އިއުލާނުކޮށްފަ އެެވެ.
