ރާއްޖޭގެ އިގްތިސާދީ ހާލަތު ރަނގަޅު ކުރުމަށް ރައީސް ޑރ. މުހައްމަދު މުއިއްޒު އަޅުއްވާ ފިޔަވަޅުތަކަށް އެއްބާރުލުން ދިނުމުގެ ގޮތުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް 50 ޕަސަންޓް މުސާރަ ނުނަންގަވަން މިރޭ ނިންމަވައިފި އެވެ.
އަބްދުއްރަހީމް "އެކްސް" ގައި ކުރެއްވި ޕޯސްޓެއްގައި ވިދާޅުވީ ސިޔާސީ މުވައްޒަފުންގެ މުސާރައިން 10 ޕަސަންޓް ކުޑަ ކުރުމަށް ރައީސް މުއިއްޒު ނިންމެވުމަށް ފުރިހަމައަށް ތާއީދު ކުރާ ކަމަށާއި އެކަމަށް އެއްބާރުލުން ދިނުމަށް 50 ޕަސަންޓް މުސާރަ ނުނަގަން ނިންމާފައިވާ ކަމަށެވެ.
އަބްދުއްރަހީމްގެ މުސާރައިން 50 ޕަސަންޓް ނުނަންގަވަން ނިންމަވާފައި ވަނީ ރައީސް މުއިއްޒުގެ މުސާރައިން 50 ޕަސަންޓު ނުނަންގަވާނެ ކަމަށް މިރޭ ވިދާޅުވެފައި ވަނިކޮށެވެ.
މަޖިލިސް ރައީސްއަށް މުސާރައާއި އިނާޔަތުގެ ގޮތުގައި ލިބެނީ މަހަކު 73،125ރ. އެވެ. މަޖިލީހުގެ ރައީސްގެ އަސާސީ މުސާރައިން 50 ޕަސެންޓު އުނިކުރުމުން ލިބޭނީ 25،562.50ރ އެވެ. ލިވިން އެލަވަންސްއާއެކު ދެން ޖުމުލަ ލިބޭނީ 45،562.50ރ. އެވެ.
ރައީސް މުއިއްޒު ވިދާޅުވީ 2025 ގެ ބަޖެޓް ހުށަހަޅާއިރު ދައުލަތުގެ ހަރަދު ކުޑަ ކުރުމުގެ ގޮތުން އަންނަ އަހަރުން ފެށިގެން ދެ އަހަރު ވަންދެން އެމަނިކުފާނުގެ މުސާރައިން 50 ޕަސަންޓު ނުނަންގަވާ ގޮތަށް ހަމަޖައްސާފައިވާ ކަމަށެވެ.
ރައީސް މުއިއްޒު ވަނީ އެމަނިކުފާނުގެ މުސާރައިގެ އިތުރުން ސިޔާސީ މަގާމުތަކުގައި ތިއްބަވާ ބޭފުޅުންގެ މުސާރައިން 10 ޕަސަންޓު އަދި ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން ވެސް 10 ޕަސަންޓު ކުރިއަށް އޮތް ދެ އަހަރަށް އުނިކުރަން ނިންމަވާފަ އެވެ.
މުސާރަ އުނިކުރާ މުވައްޒަފުންގެ ތެރޭގައި 12،000ރ. އަށްވުރެ ދަށުން މުވައްޒަފުން ނުހިމެނޭކަން ސަރުކާރުން ވަނީ އިއުލާން ކޮށްފަ އެވެ.
