ރައްޔިތުންނާއި ވިޔަފާރިތަކުން ނަގާ ޓެކްސް ބޮޑުކޮށްފައި، ސިޔާސީ ވަޒީފާތަކުގެ މުސާރައިން 10 ޕަސަންޓު އުނި ކުރަން ނިންމުމަކީ ދެބޯގެރި ދުއްވުންގެ ގޮތުގައި އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ޗެއާޕާސަން ފައްޔާޒް އިސްމާއިލް މިރޭ ވިދާލުވެއްޖެ އެވެ.
ފައްޔާޒް "އެކްސް" ގައި ކުރެއްވި ޕޯސްޓެއްގައި ވިދާޅުވީ މިވީ 11 މަސް ދުވަހުގެ ތެރޭގައި 3،000 އާ ގާތްކުރާ އަދަދަކަށް ސިޔާސީ ވަޒީފާ އުފައްދާފައިވާ ކަމަށާއި އާންމުން ރައްޔިތުންނާއި ވިޔަފާރިތަކުން ނަގާ ޓެކްސް އެތައް ގުނައަކުން މި ސަރުކާރުން ބޮޑުކޮށްފައިވާ ކަމަށެވެ.
ރައްޔިތުންނަށް ވީ ވައުދާ އެއްގޮތަށް ސިޔާސީ މުވައްޒަފުންގެ އަދަދު 700 އަށް ކުޑަކޮށްފައި ނޫނީ ރައްޔިތުންގެ އަތުން ނަގާ ޓެކްސް ބޮޑުކުރާ ވާހަކަ ދެއްކުން ވެސް ލަދުވެތި ކަމަށް ފައްޔާޒް ވިދާޅުވި އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި އިރު ވިދާޅުވީ ސިޔާސީ މުވައްޒަފުންގެ އަދަދު 700 ގައި ހިފަހައްޓާނެ ކަމަށެވެ. ނަމަވެސް އެ އަދަދު 700 އަށްވުރެ އެތައް ގުނައެއް އިތުރު ވެފައިވާ ކަމަށް ސަރުކާރުގެ ބައެއް މިނިސްޓްރީން ހާމަ ކުރި މައުލޫމާތުތަކުން އެނގެ އެވެ.
ނަމަވެސް, ސަރުކާރުން މިހާތަނަށް ވެސް ސިޔާސީ މުވައްޒަފުންގެ ޖުމްލަ އަދަދު ހާމަ ކޮށްފައެއް ނުވެ އެވެ.
އަންނަ އަހަރުގެ ބަޖެޓު ހުށަހަޅާއިރު ސިޔާސީ މުވައްޒަަފުންނާއި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރަ ކުޑަކުރަން ނިންމާފައިވާކަން ރައީސް ޑރ. މުހައްމަދު މުއިއްޒު ވަނީ މިރޭ އިއުލާން ކުރައްވާފަ އެވެ.
