ދުންފަތުގެ ބާވަތްތަކުން ނަގާ ޓެކްސް ބޮޑު ކުރުމުގެ ބިލު ރައްޔިތުންގެ މަޖިލީހަށް ހޯމަ ދުވަހު ހުށަހެޅުއްވީ، ޓެކްސް ނެގުމަކީ ފޭރުން ކަމަށް ވިދާޅުވެ، ޓެކްސް ނެގުމާ ދެކޮޅަށް މީގެ ކުރިން ފާޑުވިދާޅުވަމުން ގެންދެވި މެންބަރު އިބްރާހިމް މުހައްމަދު އެވެ.
ސަރުކާރުން އިއްޔެ ހުށަހަޅައި މިއަދު ބަހުސް ކުރީ ދުންފަތުގެ ހުރިހާ ބާވަތްތަކާއި ވޭޕުން ނަގާ ޓެކްސް ނޮވެމްބަރު 1، އިން ފެށިގެން ބޮޑު ކުރުމުގެ ބިލެވެ. އެ ބިލު ހުށަހަޅުއްވަމުން ވެރިކަން ހިންގާ ޕާޓީ ޕީއެންސީއަށް ނިސްބަތްވާ މެންބަރު އިބްރާހިމް ވަނީ، ޓެކްސް ބޮޑު ކުރަނީ ދައުލަތަށް ލިބޭ އާމްދަނީ ބޮޑުކޮށް، ސަރުކާރަށް ނަފާ ހޯދަން ކަމަށް ވިދާޅުވެފަ އެވެ.
"[ވޭޕް] މަނާ ކުރަން މި އޮތް ވަގުތުގެ މުއްދަތުގެ ތެރޭގައި ވެސް އަޅުގަނޑުމެން ބޭނުންވަނީ ވޭޕް ބޭނުން ކުރާ މީހުންނާ އަދި ވޭޕާ އަދިވެސް ހީޓެޑް ޓޮބޭކޯ ފަދަ އާލާތްތަކުން ދައުލަތަށް އާމްދަނީއެއް އިތުރުކޮށް، ސަރުކާރަށް ނަފާވާނެ ގޮތެއް ހޯދުން،" އިބްރާހިމް ވިދާޅުވި އެވެ.
މީގެ ކުރިން 2012 ވަނަ އަހަރުން ފެށިގެން އިބްރާހިމް ވަނީ ޓެކްސް ނެގުމާ ދެކޮޅަށް ވަރަށް ގިނަ ވާހަކަތައް ދައްކަވައިފަ އެވެ. އެގޮތުން ޓެކްސް ނެގުމަކީ ފޭރުން ކަމަށާއި ޓެކްސް ނެގުން އިސްލާމް ދީނުގައި ހުއްދަ ނުވާނެ ކަމަށް ވެސް އޭނާ ވިދާޅުވެފައިވެ އެވެ.
"ޓެކްސް ނެގުމަކީ ސިސްޓަމެޓިކްކޮށް ފޭރުން. މި ހަގީގަތް ބަދަލެއް ނުކުރެވޭނެ. އެއީ އެއްވެސް ރައްޔިތަކު ބޭނުންވެގެން ކުރި އަދި ކުރާ ކަމެއް ނޫން،" ޖޫން، 2013، ގައި އޭނާ އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ.
ޓެކްސް ނެގުން މެންބަރު އިބްރާހިމް ކުރިން ސިފަ ކުރެއްވީ މުދަލުން ހުރުމަތް ކެނޑުމުގެ ގޮތުގަ އެވެ.
"ޓެކްސްގެ ނަމުގައި އިންސާނުންގެ މުދަލުގެ ހުރުމަތް ކެނޑުމަކީ މޮޅެތި ނަން ނަން ކިޔައިގެން ހަމަ ފޭރުން،" އޭނާ ވިދާޅުވެފައިވެ އެވެ.
އޭގެ ފަހުން، 2019 ވަނަ އަހަރު ރައްޔިތުންގެ މަޖިލީހަށް ވާދަ ކުރެއްވި އިރު ވެސް ޓެކްސްއާ ދެކޮޅަށް އިބްރާހިމް ވާހަކަ ދެއްކެވި އެވެ.
"މުސްލިމުންގެ މުދަލުން ހުއްދަ ނޫން ޓެކްސް ނެގުމާ އަޅުގަނޑު ދެކޮޅު ހަދަން. އަދި މިކަމަށް މައްޗަންގޮޅި މެދު ދާއިރާގެ ރައްޔިތުންގެ އެއްބާރުލުން ނުހަނު ބޭނުން،" މާޗް، 2019، ގައި އިބްރާހިމް ވިދާޅުވެފައިވެ އެވެ.
މިއަހަރު ބޭއްވި ރައްޔިތުންގެ މަޖިލީހުގެ އިންތިހާބަށް ކެމްޕެއިން ކުރިއިރު، ލަވަޔާއި މިއުޒިކް ބޭނުން ކުރުމުން ވެސް އިބްރާހިމްއަށް ވަރަށް ބޮޑެތި ފާޑުކިޔުންތައް އަމާޒުވި އެވެ. އޭގެ ކުރިން އޭނާ ވަނީ މިޔުޒިކަށް ވަރަށް ބޮޑަށް ފާޑުވިދާޅުވެ، އެއީ އިސްލާމް ދީނުގައި ހަރާމް ކަމެއް ކަމަށް ވިދާޅުވެފަ އެވެ.
ސަރުކާރުން ނިންމީ ސިނގިރޭޓަކުން މިހާރު ނަގާ 3ރ. ގެ ޓެކްސް އަށް ރުފިޔާއަށް ބަދަލުކޮށް، ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓު ބޮޑު ކުރުމަށެވެ. މަޖިލީހަށް އިއްޔެ ހުށަހަޅައިގެން މިއަދު ބަހުސް ކުރި ބިލުގައި ވެސް އޮތީ އެގޮތަށް ޓެކްސް ބޮޑު ކުރުމަށެވެ.
