މީގެ ކުރިން މިޔުޒިކަށް އެތައް ފަހަރަކު ފާޑުކިޔުމަށްފަހު، ސަރުކާރު ހިންގާ ޕީއެންސީގެ ފަރާތުން ރައްޔިތުންގެ މަޖިލީހަށް ވާދަ ކުރާ މުހައްމަދު އިބްރާހިމް (އިއްބެ ޖަނާބު) ގެ ފޯރިގަދަ ކެމްޕެއިން ލަވައެއް ނެރެފި އެވެ.
ރައީސް ޑރ. މުހައްމަދު މުއިއްޒު ބައިވެރިވެވަޑައިގެންނެވި އިބްރާހިމްގެ ދޮރުން ދޮރަށް ކެމްޕެއިނުގެ ތެރެއިން އަދި އޭނާގެ ކެމްޕެއިން ޖަގަހައިގައި ވެސް ވަނީ އެ ލަވަ ބޭނުންކޮށްފަ އެވެ. އޭނާ ވާދަ ކުރަނީ މައްޗަންގޮޅީ އުތުރު ދާއިރާއަށެވެ.
ލަވަޔާއި މިޔުޒިކާއެކު ހަދާފައި ހުރި އޭނާގެ ބައެއް ކެމްޕެއިން ވީޑިއޯތައް އިބްރާހިމް ވަނީ ސޯޝަލް މީޑިއާ ޕްލެޓްފޯމް އެކްސްގައި ރިޕޯސްޓުކޮށްފަ އެވެ. ނަމަވެސް އޭނާގެ ކެމްޕެއިން ލަވަ އެކްސްގައި އަމިއްލައަށް ޕޯސްޓްކޮށްފައެއް ނެތެވެ. އެކަމަކު އިބްރާހިމްގެ ކެމްޕެއިން ލަވަ އޭނާގެ ވީޑިއޯއާއެކު އެކްސްގައި އެބަ ދައުރުވެ އެވެ.
އިބްރާހިމްގެ މިފަހަރުގެ ކެމްޕެއިނަށް ލަވައެއް ނެރުނަސް، މިޔުޒިކަކީ ހުއްދަ އެއްޗެއް ކަމަށް އޭނާ މިހާރު ވެސް ގަބޫލެއް ނުކުރެ އެވެ. ކެމްޕެއިން ލަވަ ތައްޔާރު ކުރަމުން ދަނީ ޕާޓީން އާއި ސަޕޯޓަރުން ކަމަށާއި އެކަން ހުއްޓުވެން ނެތް ކަމަށް އިބްރާހިމް ބުންޏެެވެ.
"އަޅުގަނޑަށް ތާއިދުކުރާ މީހުން ވެސް އެބަ ހަދާ ޅެމާއި ބަންޖާ، އެކަންކަމަށް އަޅުގަނޑަށް ނެތް ހުއްޓުވޭކަށެއް. އެކަމަކު އަޅުގަނޑު އަމިއްލަ އަށް އެ ކަހަލަ ކަމެއް ނުކުރަން. ތާއިދުކުރާ މީހުންނާއި ޕާޓީން އެކަން ކުރުމަކީ މުޅީން އެހެން ކަމެއް،" އޭނާ ބުންޏެވެ.
އިބްރާހިމްގެ ކެމްޕޭނުގައި ދޮރުންދޮރަށް ހިނގުމުގެ ހަރަކާތް އިއްޔެ ފެށުމަށް އޭނާގެ ކެމްޕޭން ޖަގަހަ ސަރަހައްދަށް ރައީސުލްޖުމްހޫރިއްޔާވަޑައިގެންނެވިއިރު ވެސް އަޑު ބާރުކޮށް ހުރީ ކެމްޕެއިނު ލަވަ ޖަހައިފަ އެވެ. އެ ލަވަ ޖެހީ ނުރުހުމުގައިތޯ އާއި އެކަން ނުހުއްޓުވީ ކީއްވެގެންތޯ ސުވާލު ކުރުމުން އިބްރާހިމް ބުނީ މި ސުވާލަށް ކުރުކޮށް ޖަވާބު ނުދެވޭނެ ކަމަށެވެ.
"އަޅުގަނޑަށް ހީވަނީ ތިޔަށް، ދިމާވެގެން ކަންނޭނގެ އެއްޗެއް ނަންގަނެވޭނީ ތަންކޮޅެއް ދިގުކޮށް،" އޭނާ ބުންޏެވެ.
މީގެ ކުރިން މިޔުޒިކާއި ލަވައަށް ވަރަށް ބޮޑަށް އިބްރާހިމް ފާޑުކިޔެވެ. އެގޮތުން، މިޔުޒިކާއި ކުޅިވަރު ބޭނުން ކުރަނީ ޒުވާނުންގެ ސިޔާސީ އަދި މާއްދީ ތަރައްގީ ހުއްޓުވަން ކަމަށް ވެސް ކުރިން ބުނެފައިވެ އެވެ.
"ސިޔާސީ ފަރާތްތަކުން ޒުވާނުން މަގުފުރައްދާ ސަރުކާރުތަކުން ބޭނުންވަނީ ބެރަކާ ގިޓާއެއްދީފައި އެމީހުން ތޮށިގަނޑުމަތީ ބައިތިއްބަން. އެގޮތުން މިއުޒިކާ ކުޅިވަރު ބޭނުން ކުރެވެނީ ޒުވާނުންގެ ސިޔާސީ އަދި މާއްދީ ތަރައްގީ ހުއްޓުވަން ކަމަށް ދެންނެވިދާނެ،" އޮކްޓޯބަރު 23، 2020، ގައި އޭނާ ބުނެފައިވެ އެވެ.
މިޔުޒިކަކީ ތޯޓް ޕޮލިއުޝަން ނުވަތަ ވިސްނުން/ފިކުރުގެ ތަޣައްޔަރުވުމެއް ކަމަށް ވެސް ކުރިން އިބްރާހިމް ބުނެފައިވެ އެވެ.
"އިންސާނުން ގިނަވަގުތު ނުފޫޒެއްގައި އުޅޭނަމަ އޭނާގެ ނަފްސު ކަންފަތިވާނެ. ތާއަބަދު ތޯޓްސް ޕޮލޫޝަން [މަސްތުވުމާއި] ސައުންޑް ޕޮލޫޝަން [މިއުޒިކް] ނޫނީ ވިޝުއަލް ޕޮލޫޝަން [އޮރިޔާން ކާޑް/ގޭމިން/ފިލްމް] ގައި އުޅޭނަމަ އޭނާ އެހުރީ ހަލާކުވެފައި. ނަފްސް ގެއްލި ބުރާންތިވެފައި،" އޮކްޓޯބަރު 8، 2022، ގައި އިބްރާހިމް ބުނެފައިވެ އެވެ.
މިޔުޒިކު އަޑުއަހާ ޒުވާނުންނަށް ވެސް އޭނާ ފާޑުކިޔާފައިވެ އެވެ.
"ބައެއް ޒުވާނުން މިއުޒިކާ ފިލްމު ބަލާ އަދި ގޭމް ކުޅުމާ ސޯޝަލް މީޑިޔާގައި އުޅުމުގެ ސަބަބުން ތަނަކު ހިމޭނުން ހަރަކާތް ހުއްޓައިގެން ބަހެއް ނުބުނެ ހުރުމަކީ ހަޑިކަމެއް ކަމުގައި ހީކޮށް ލިފްޓްގައި ތިބޭއިރު ލަވަކިޔާ އަޑުލައްވާ ވައްތަރު ޖައްސާ ހެދެއެވެ. ނަފްސާނީ ކަމެއް؟،" މާޗް 15، 2022 ގައި އޭނާ ބުންޏެވެ.
އޭގެ އިތުރުން، މިޔުޒިކާ ދެކޮޅު ޓީޗަރުން ކުރީގެ ސަރުކާރުން ވަޒީފާއިން ވަކިކޮށްފައިވާ ކަމަށް ބުނެ އެކަމަށް ވެސް އިބްރާހިމް ފާޑުކިޔާފައިވެ އެވެ.
"ވެރިކަމަށް އައި ގޮތަށް މަޖާކުރާނެ ތަންތަން އަޅާ ގަރާރު ވެސް ވަނީ ފާސްކޮށްފައި. ޓީޗަރުން ލައްވާ ނައްޓުވާ މިއުޒިކާ ދެކޮޅު ޓީޗަރު ސަސްޕެންޑްކޮށްފަ މައްސުނި ނުހައްދަވާ،" ނޮވެމްބަރު 19، 2022، ގައި އޭނާ ބުންޏެވެ.
މީގެ ކުރިން 2019 ވަނަ އަހަރު މައްޗަންގޮޅީ މެދު ދާއިރާއަށް ވެސް އިބްރާހިމް ވާދަ ކުރެއްވި އެވެ. އެފަހަރު އޭނާ ވާދަ ކުރެއްވީ ކުރީގެ ރައީސް މުހައްމަދު ނަޝީދުއާ އެވެ.
