ހދ. ހިރިމަރަދޫ ނެރު ތިލަވުމުގެ ސަބަބުން މިހާރު ލަފާ ފުރެނީ ހަމައެކަނި ދިޔަވަރު ބޮޑުވުމުން ކަމަށް އެ ރަށު ކައުންސިލުން ބުނެފި އެވެ.
ހިރިމަރަދޫ ކައުންސިލްގެ ރައީސް މުހައްމަދު ވަހީދު "އަދަދު" އަށް ވިދާޅުވީ ވެލި އެޅުމުގެ ސަބަބުން ކަނޑިންމަ ގާތްގަނޑަކަށް އެއްކޮށް ބެދިފައިވާ ކަމަށާއި ދިޔަވަރު ހިކޭ ގަޑީގައި ލަފާ ނުފުރޭ ކަމަށެވެ.
"އަޅުގަނޑުމެން އަސާސީ ހިދުމަތްތަކުން މަހުރޫމްވެފައި މިތިބީ. ރަށުން ބޭރަށް ފުރޭނެ ގޮތެއް ނެތް. މިދިޔަ ސަރުކާރުން ފެށިގެން މިކަން ކޮށްދޭން އާދޭސް ކުރަމުން މިދަނީ. ވެލި އެޅި ވަރަށް ތިލަވެފައި ވަނީ. ކަނޑިންމަ ގާތްގަނޑަކަށް އެއްކޮށް ބެދިފައި އޮތީ. ވަންނަ ގަޑީ ދިޔަވަރު ހިކިއްޖެއްޔާ އެބަޔަކު ދެން ތިބެންވީ ދިޔަވަރު ބޮޑުވަންދެން،" މުހައްމަދު ވަހީދު ވިދާޅުވި އެވެ.
މައްސަލަ ހައްލުކޮށް ދިނުމަށް ސަރުކާރުގައި އެދިފައިވާ ކަމަށާއި އެކަން ހައްލުކޮށްދޭން ސަރުކާރުން މަސައްކަތް ކޮށްދޭނެ ކަމަށް ބުނެފައިވާ ކަމަށް މުހައްމަދު ވަހީދު ވިދާޅުވި އެވެ.
އެކަމާ ގުޅިގެން ލޯކަލް ގަވަމަންޓް މިނިސްޓަރު އާދަމް ޝަރީފް "އެކްސް" ގައި ވިދާޅުވީ ނެރުގެ މައްސަލަ ކައުންސިލުގެ ރައީސް ސަމާލު ކަމަށް ގެނެސްފައިވާ ކަމަށާއި އެކަން ހައްލު ކުރުމަށް ސަރުކާރުގެ ގުޅުންހުރި ފަރާތްތަކުން މަސައްކަތް ކުރާނެ ކަމަށެވެ.
މުހައްމަދު ވަހީދު ވިދާޅުވީ ރަށުގައި ޒަރޫރީ ގިނަ ބޭނުންތައް ފުއްްދޭނެ ގޮތް ނެތުމުން، އެ ކަންކަން ފުއްދަން ގިނަ މީހުން ދަނީ ރަށުން ބޭރަށް ކަމަށާއި އެހެން ކަމުން ނެރުގެ މައްސަލަ ވީހާ ވެސް އަވަހަށް ހައްލު ނުކޮށްފިނަމަ ބޮޑު ކާރިސާއަކާ ކުރިމަތިލާން ޖެހިދާނެ ކަމަށެވެ.
ހިރިމަރަދޫގައި 280 އެއްހާ މީހުން އުޅޭއިރު، އެ ރައްޔިތުން އެހެން ރަށަކަށް ހިޖުރަ ކުރުމަށް ސަރުކާރުގައި އެދިފައިވާތީ އެކަން ތަންފީޒު ކުރުމަށް ޖޫން 6، ގައި ރައީސް ޑރ. މުހައްމަދު މުއިއްޒު ވަނީ ހައުސިން މިނިސްޓްރީއަށް އަންގާފަ އެވެ.
މިގޮތުން، ރައީސް މުއިއްޒުގެ ނިންމެވުމާ އެއްގޮތަށް ވީހާވެސް އަވަހަށް ހިރިމަރަދޫ ރައްޔިތުން އެ ރަށުން ފޭބުމުގެ މަސައްކަތް ތަންފީޒުކޮށް ދިނުމަށް ވެސް މުހައްމަދު ވަހީދު ގޮވާލެއްވި އެވެ. ހިރިމަރަދޫގެ ގިނަ ރައްޔިތުން ބޭނުންވަނީ އެ ރަށުން ފައިބާށެވެ.
