މަސްތުވާތަކެތި ބޭނުންކުރާ މީހުންގެ ތެރެއިން، ކުށްކުރާށާއި ސަލާން ޖަހަން އުޅޭ މީހުން މަގުތަކުން މަދުކުރަން ނެޝަނަލް ޑްރަގް އޭޖެންސީ އާއި މޯލްޑިވްސް ޕޮލިސް ސާވިސް ގުޅިގެން ރިމާންޑް އޮޕަރޭޝަނެއް ފަށައި 14 މީހުން ރިމާންޑު ސެންޓަރުގައި ބަންދުކޮށްފައިވާ ކަމަށް ފުލުހުން ބުނެފި އެވެ.
އެކަމުގެ މައުލޫމާތު ދިނުމަށް މިއަދު ފުލުހުންނާއި އެންޑީއޭ ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑްރަގް އެންފޯސްމަންޓުގެ ހެޑް، ސުޕްރިޑެންޓް އޮފް ޕޮލިސް ނާހިދު ހުސައިން ވިދާޅުވީ އެ އޮޕަރޭޝަނުގެ ތެރެއިން ބަންދު ކުރަނީ , މަސްތުވާތަކެތި ބޭނުންކުރާ މީހުންގެ ތެރެއިން މަގުމަތީގައި ސަލާންޖަހަން އުޅޭ މީހުންނާއި ވައްކަމާއި ފޭރުން ފަދަ ކުށްތަކަށް އަރައިގަންނަ މީހުން އަދި މަގުމަތީގައި މަސްތުގެ ހާލުގައި ތިބޭ މީހުންގެ އިތުރުން މިސްކިތްތަކުގައި ނިދާ ހަދާ މަސްތުވާތަކެތި ބޭނުންކުރާ މީހުން ކަމަށެވެ.
"މި މަސައްކަތުގެ ތެރެއިން 9 އޮކްޓޫބަރު 2024 އިން ފެށިގެން މިހައިތަނަށް 14 މީހުން މަސްތުވާތަކެއްޗާ ބެހޭ ގާނޫނުގެ 103 ވަނަ މާއްދާގެ ދަށުން ޑްރަގް އޮފެންޑާސް ރިމާންޑް ސެންޓަރެއްގައި ބަންދު ކުރެވިފައިވޭ، އަދި މަސްތުވާތަކެއްޗާ ބެހޭ ގާނޫނުގެ ދަށުން ބަންދުން ނުވީއްލި މި ފަރާތްތަކުގެ ފަރުވާގެ ކަންކަން ކުރިއަށް ގެންދަންޖެހޭ ކަންކަން ކަމާގުޅޭ އިދާރާތަކާ އެކީގައި ކުރެވެމުންދޭ،" ނާހިދު ވިދާޅުވި އެވެ.
އޭނާ ވިދާޅުވީ އެ އޮޕަރޭޝަނުގެ ސަބަބުން ކުރިއަށް އޮތް ތަނުގައި މަގުމަތިން ހެޔޮ ބަދަލުތަކެއް ދިވެހި ރައްޔިތުންނަށް ފެނިގެން ދާނެ ކަމަށެވެ.
މިއަދުގެ ނޫސްވެރިންގެ ބައްދަލުވުމުގައި އެންޑީއޭގެ ޗެއާމަން، ލުބުނާ ޒާހިރު ހުސައިން ވިދާޅުވީ ރިމާންޑު ސެންޓަރުތައް ގާއިމު ކޮށްފައި ވަނީ ކ. ހިންމަފުށްޓާއި ހުޅުމާލޭގައި ކަމަށެވެ. އަދި އެ އޮޕަރޭޝަނުގެ ތެރެއިން ހައްޔަރު ކުރާ މީހުން ގެންގޮސް ބަންދު ކުރަނީ އެ ސެންޓަރުތަކުގައި ކަމަށް ލުބުނާ ވިދާޅުވި އެވެ.
ރިމާންޑު ސެންޓަރުތައް އޮޕަރޭޓު ކުރަން ފެށުމުން އެކި މައްސަލަތަކުގައި ހައްޔަރު ކުރާ މީހުންގެ ތެރެއިން މަސްތުވާތަކެތި ބޭނުންކުރާ މީހުންނަށް ވަގުތުން ދޭންޖެހޭ ފަރުވާ ދެވޭނެ ގޮތް މަގުފަހިވެގެން ގޮސްފައިވާ ކަމަށާއި އެކަމުގެ ސަބަބުން ހައްޔަރު ކުރާ މީހުން ޑިޓޮކްސް ނުކުރުމުން ދިމާވާ ކުއްލި ހާލަތްތައް ދިމާ ނުވާނެ ކަމަށް ލުބުނާ ވިދާޅުވި އެވެ.
"ސެންޓަރުގެ އެންމެ މުހިންމު ކަމަކީ މަސްތުވާތަކެތި ނަގާ މީހުން މުޖުތަމައުގެ ތެރޭގައި ކުށް ކުރަމުން އުޅޭ އުޅުން ހުއްޓުވުމަށްޓަކައި ވަރަށް މުހިންމު ސެންޓަރެއްގެ ގޮތުގައި ފާހަގަކޮށްލަން، ހަމަ އެއާއެކު ނެޝަނަލް ޑްރަގް އޭޖެންސީން ވޭތުވެދިޔަ ތަނުގައި އާންމުންގެ ފަރާތުންނާއި ބެލެނިވެރިންގެ ފަރާތުން މަސްތުވާތަކެތި ނަގާ މީހުން އުޅޭ ތަންތަން އަދި މަސްތުވާތަކެތި ނަގާ މީހުން އުޅޭ ގޭގެއިން އަންނަ ކޯލްތަކަށް ވަނީ ވަރަށް ބޮޑަށް އެޓެންޑު ކުރެވިފައި،" ލުބުނާ ވިދާޅުވި އެވެ.
ދިވެހިރާއްޖޭގައި މަސްތުވާތަކެތި ބޭނުންކުރާ 7500 ވަރަކަށް މީހުން އުޅޭ ކަމަށް ދިރާސާތަކުން ދައްކަ އެވެ. ރާއްޖޭގެ ޖަލުތަކުގައި ވެސް އެންމެ ގިނައީ މަސްތުވާތަކެތީގެ އެކި މައްސަލަތަކުގައި ހަކުމް ތަންފީޒު ކުރަމުންދާ މީހުންނެވެ.
ރާއްޖޭގެ ޖަލުތަކުގައި މިހާރު ވެސް ތިބި ގައިދީންގެ 80 އިންސައްތައަކީ މަސްތުވާތަކެތި ބޭނުން ކުރުމާއި މަސްތުވާތަކެއްޗާ ގުޅުން ހުރި ކުށްތަކުގައި ހުކުމްކޮށްފައިވާ މީހުންނެވެ.
