ރާއްޖޭގައި އޮންނަ އިންޑިއާގެ އަސްކަރީ މަތިންދާ ބޯޓު ދުއްވަން ތަމުރީނުކުރި ދިވެހި ސިފައިން އެ އުޅަނދު ނުދުއްވާ ސަބަބު ޑިފެންސް މިނިސްޓްރީން ހާމަ ކުރަން ޖެހޭ ކަމަށް ހިތަދޫ މެދު ދާއިރާގެ މެންބަރު އަހުމަދު އަޒާން ވިދާޅުވެއްޖެ އެވެ.
ކުރިން ރައިޓު ޓު އޮފޮމޭޝަން (އާރުޓީއައި) ހައްގަށް ވަރަށް ބޮޑަށް މަސައްކަތް ކުރެއްވި އަޒާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ދިވެހި ސިފައިންނަށް ޑޯނިއާ ދުއްވަން ނުދޭ ސަބަބު ދިވެހި ގިނަ އަދަދެއްގެ ރައްޔިތުން އެނގެން ބޭނުންވާނެ ކަމަށެވެ. އަދި އެއީ ރާއްޖޭގެ އެންމެ މަތީ މަސްލަހަތާ ގުޅިފައިވާ ކަމެއް ކަމަށް ވެސް އަޒާން ވިދާޅުވި އެވެ.
"ރައީސް އިބްރާހީމްގެ ސަރުކާރަށް ރައްޔިތުން ނޫނެކޭ ބުނި އެންމެ ބޮޑު އެއް ސަބަބަކީ މިކަހަލަ ކަންކަން ފޮރުވުން. ޑިފެންސްގެ މި ނިންމުން ބަދަލުކުރާނެ ކަމަށް އުންމީދުކުރަން،" އަޒާން ވިދާޅުވި އެވެ.
އަޒާން އެގޮތަށް ވިދާޅުވީ ދިވެހި ސިފައިން އެ އުޅަނދު ނުދުއްވާ ސަބަބު ހާމަކޮށްފި ނަމަ ގައުމީ ސަލާމަތަށް ނުރައްކާވެދާނެ ކަމަށް ބުނެ އެ މައުލޫމާތު ސިއްރު ކުރަން އެމްއެންޑީއެފް އިން ހައި ކޯޓަށް ދިޔުމުންނެވެ.
އަޒާން ވަނީ މި ސަރުކާރުން ސިޔާސީ މުވައްޒަފުންގެ އަދަދު ހާމަ ނުކުރާތީ، އެ އަދަދު ސިއްރު ނުކުރެވޭނެ ކަމަށް ކުރިން ވިދާޅުވެފަ އެވެ. އަދި ވަރަށް އަވަހަށް އެ މައުލޫމާތު ހިއްސާ ކުރާނެ ކަމަށް އަޒާން ވިދާޅުވިތާ ތިން މަސްވީއިރު ވެސް އެ މައުލޫމާތު ސަރުކާރުން ހާމައެއް ނުކުރެ އެވެ.
އެމްއެންޑީއެފް އިން މީގެ ކުރިން އާންމުކުރި މައުލޫމާތުން އެނގޭ ގޮތުގައި ރާއްޖޭގައި ތިބި އިންޑިއާ ސިފައިން ވަނީ އެމްއެންޑީއެފްގެ ޖުމްލަ ހަ އޮފިސަރަކު ތަމްރީނުކޮށްފަ އެވެ. އެ ހުރިހާ އޮފިސަރުން ވެސް ތަމްރީނުވީ 2021 ގެ ފަހުންނެވެ.
އިންޑިއާއާއެކު ހަދާފައިވާ އެއްބަސްވުންތަކާއި، ރާއްޖޭގައި ތިބި އިންޑިއާ ސިފައިންގެ އަދަދު ރައީސް އިބްރާހިމް މުހައްމަދު ސޯލިހުގެ ސަރުކާރުން ހާމަ ނުކުރި ކަމަށް ބުނެ އެއިރު ވަރަށް ބޮޑަށް ފާޑު ކިޔަމުން ދިޔަ އެވެ.
ރިޔާސީ އިންތިހާބުގެ ކެމްޕޭނުގައި އަދި ވެރިކަމަށް ވަޑައިގަތުމަށް ފަހު ތަކުރާރުކޮށް ރައީސް ޑރ. މުހައްމަދު މުއިއްޒު ވިދާޅުވަމުން ގެންދަވަނީ މި ސަރުކާރުގެ މައުލޫމާތު ނުުލިބިގެން، މައުލޫމާތު ހޯދުމާއި ލިބިގަތުމުގެ ހައްގުގެ ގާނޫނުގެ ދަށުން ހޯދަން ހުށަހަޅަންޖެހޭ ހިސާބަށް ނުދާނެ ކަމަށާއި އެއަށް ވުރެ ހާމަކަން ބޮޑުވާނެ ކަމަށެވެ.
"އަޅުގަނޑުމެން މަސައްކަތް ކުރާނީ، ދެ ފުށް ފެންނަ ގޮތަށް. އެއްވެސް ކަމެއް ފޮރުވައި، ޖަވާބުދާރީ ނުވެވޭ ކަމެއް ނޯންނާނެ. މައުލޫމާތު ހިއްސާ ކުރާނަން. އެކަހަލަ ކަމެއް ދިމާވެއްޖިއްޔާ، ހަމަ އަޅުގަނޑަށް ވެސް އިޝާރާތެއް ކޮށްލަންވީ. އަޅުގަނޑަށް ޔަގީން ދިމަލެއް ނުވާނެ... ތިބޭފުޅުން އާރުޓީއައި ލާން ޖެހޭ ހިސާބަކަށް ނުދާނެ. އަޅުގަނޑަކަށް ހިއެއް ނުވޭ ލާން ޖެހޭނެހެނެއް،" ޑިސެމްބަރު، 2023، ގައި ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވި އެވެ.
ނަމަވެސް ހާމަކުރަން ވައުދުވެވަޑައިގެންނެވި އެއްބަސްވުންތަކެއް ވެސް އަދި މި ސަރުކާރުގެ ސިޔާސީ މުވައްޒަފުންގެ އަދަދެއް ވެސް ހާމައެއް ނުކުރެ އެވެ. މައުލޫމާތު ހާމަނުކޮށްގެން އިންފޮމޭޝަން ކޮމިޝަނަރުގެ އޮފީހަށް ހުށަހަޅާ މައްސަލަތަކުގެ އަޑުއެހުންތަކަށް ވެސް ރައީސް އޮފީހުން ނާދެ އެވެ.
