ކަޒަކްސްތާންގެ އަސްތާނާގައި މިހާރު ކުރިއަށްދާ އޭޝިއަން ޓޭބަލް ޓެނިސް ޗެމްޕިއަންޝިޕްގެ ފިރިހެން ޑަބަލްސް އިވެންޓުގައި ރާއްޖޭގެ މުހައްމަދު ޝައްފާން އާއި މޫސާ މުންސިފް އަހުމަދުގެ ޕެއާ އިން އިރާންގެ ޕެއާ އެއް އަތުން ބޮޑު މޮޅެއް ހޯދައިފި އެވެ.
އެ ގޮތުން، ފިރިހެން ޑަބަލްސްގެ ފުރަތަމަ ބުރު (އެންމެ ރަނގަޅު 64 ޕެއާ ވާދަކުރާ ބުރު) ގައި މުންސިފް އާއި ޝައްފާންގެ ޕެއާ ނުކުތީ އިރާންގެ ބެންޔަމީން ފަރާޖީ އާއި ސޮހްރާބީ މުހައްމަދު ޖަވާދުގެ ޕެއާ، ފަހަތުން އަރައި، 3-2 އިން ބަލިކޮށްފަ އެވެ. މީގެ ތެރެއިން، ފަރާޖީ ވަނީ މި ފަހަރުގެ ޓީމު އިވެންޓްގައި، ދުނިޔޭގެ ރޭންކިން އެއް ވަނަ ކުޅުންތެރިޔާ، ޗައިނާގެ ވޭންގް ބަލިކޮށްފަ އެވެ.
މެޗުގެ ފުރަތަމަ ސެޓުތައް އިރާނުގެ ޕެއާ އިން، 12-14، 07-11 އިން ގެންދިޔަ އެވެ. މުންސިފް އާއި ޝައްފާން މޮޅުވީ ދެން ކުޅުނު ތިން ސެޓު، 11-09، 11-07 އަދި 11-07 އިން ގެންގޮސް މެޗުން މޮޅުވެފަ އެވެ. ދެ ވަނަ ބުރުގައި، މުންސިފް އާއި ޝައްފާންގެ ޕެއާ އިން ކުޅޭނީ، މާދަމާ އެވެ. އެއީ، ޗައިނާގެ ލިން ގަޔޮއާން އާއި ލިން ޝިޑޯންގްގެ ޕެއާއާ އެވެ.
ފިރިހެން ޑަބަލްސްގައި ދެން ކުޅުނު ރާއްޖޭގެ އަހުޔާރު އަހުމަދު އާއި ޒީކް ހަސަން ލަތީފްގެ ޕެއާ ވަނީ އިރާނުގެ އަލަމިޔާން ނޯޝާދު އާއި މުސާވީ ތަހޭދު މުހައްމަދުގެ ޕެއާ އަތުން 3-0 އިން ބަލިވެފަ އެވެ. ސެޓުތައް ދިޔައީ، 11-05، 11-05 އަދި 11-02 އިންނެވެ.
އަންހެން ޑަބަލްސްގައި އައިޝަތު ރަފާ ނާޒިމް އާއި ފާތިމަތު ދީމާ އަލީގެ ޕެއާ އިން ވެސް ވަނީ ފުރަތަމަ ބުރުގެ މެޗުން މޮޅުވެފަ އެވެ. އެއީ މޮންގޯލިއާގެ ބަލްޖިންޔާމް އާއި އެގްޝިގިއެންގެ ޕެއާ އަތުން 3-1 އިންނެވެ. މެޗުގެ ސެޓުތައް ދިޔައީ، 11-07، 11-09، 09-11 އަދި 11-07 އިންނެވެ. މާދަމާ ދެ ވަނަ ބުރުގައި، ރަފާ އާއި ދީމާގެ ޕެއާ ކުޅޭނީ، ހޮންގް ކޮންގްގެ ވިންގް ލަމް އާއި ޒޫ ޒެންގްޒޫގެ ޕެއާއާ އެވެ.
އަންހެން ޑަބަލްސްގައި ކުޅުނު ރާއްޖޭގެ އަނެއް ޕެއާ، މިޝްކާ އިބްރާހިމް އާއި ލައިސާ ފަތުހުﷲ އަށް ވަނީ ޑްރޯ ނެގިއިރު ވެސް ދެ ވަނަ ބުރުން ފުރުސަތު ލިބިފަ އެެވެ.
މިކްސް ޑަބަލްސްގައި ރާއްޖޭގެ ދެ ޕެއާ ވެސް ފުރަތަމަ ބުރުން ވަނީ ބަލިވެފަ އެވެ. އެ ގޮތުން، އަހްޔާރު އާއި ދީމާގެ ޕެއާ ބަލިވީ މެލޭޝިއާގެ ވަން ސިން ޑެނީ އާއި ލި ޔިންގެ ޕެއާ އަތުން 3-1 އިންނެވެ. މެޗުގެ ސެޓުތައް ދިޔައީ، 07-11، 11-08، 03-11 އަދި 06-11 އިންނެވެ. މުންސިފް އާއި ރަފާގެ ޕެއާ ބަލިވީ، ތައިލެންޑްގެ ޕެއާ، ތަމްމަތިކޮމް ނަޕަތު އާއި ސަވަދެބަތު ސުޕަސިނީގެ ޕެއާ އަތުންނެވެ. ސެޓުތައް ދިޔައީ، 11-04، 11-03 އަދި 11-04 އިންނެވެ.
ޓީމު އިވެންޓުން ރާއްޖޭގެ އަންހެން ޓީމަށް 20 ޓީމުގެ ތެރެއިން 16 ވަނަ ލިބުނުއިރު، ފިރިހެން ޓީމަށް ވަނީ 24 ޓީމުގެ ތެރެއިން 20 ވަނަ ލިބިފަ އެވެ.
