ހަށިގަނޑުގައި ފޮރުވައިގެން އެހެން ރަށަކަށް މަސްތުވާތަކެތި ޓްރެފިކް ކުރަން އުޅުނު މައްސަލައެއްގައި ވެލާނާ އިންޓަނޭޝަނަލް އެއާޕޯޓަށް ފުރަންް ގޮސް ހުރި މީހަކު އިއްޔެ ހައްޔަރުކޮށްފި އެވެ.
ފުލުހުން އާންމުކުރި މައުލޫތުގައި ބުނީ، މި މައްސަލައިގައި ހައްޔަރުކުރީ ށ. ނޫމަރާ، ހަވީރީގެ، އަބްދުﷲ ފަސީހު، 24އ، ކަމަށެވެ.
އޭނާ ހައްޔަރުކުރީ ހަށިގަނޑުގައި ރައްކާކޮށްގެން މަސްތުވާތަކެތި ގެންދަން އުޅޭ ކަމުގެ ތުހުމަތު ކުރެވިގެން ބަލައި ފާސްކުރުމަށް ފަހު ހޯމަ ދުވަހުގަ އެވެ. އޭނާގެ އަތުން ފެނުނު ތަކެތީގެ ބަރުމިނުގައި 340 ގުރާމު ހުރި ކަމަށް ފުލުހުން ބުންޏެވެ.
އަބްދުﷲ ފަސީހުގެ ބަންދާ މެދު ގޮތެއް ނިންމުމަަށް ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އެ މައްސަލައިގެ ތަހުގީގަށް އޭނާ ފަސް ދުވަހަށް ބަންދުކޮށްފަ އެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ. އެހެންވެ އެ މައްސަލައިގެ އިތުރު ތަފުސީލެއް އަދި ހާމައެއް ނުކުރެ އެވެ.
