ޖުމްލަ އެކު، 55 ގައުމު ބައިވެރިވާ، 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް، އައްޑޫ ސިޓީގައި އަންނަ މަހު ބާއްވަން ލޯންޗްކޮށްފި އެވެ.
އަންނަ މަހުގެ 5-11 އަށް އަައްޑޫ ސިޓީ ކެނަރީފް ރިސޯޓްގައި ބާއްވާ މި މުބާރާތް ރަސްމީކޮށް ލޯންޗްކޮށްދެއްވީ ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) އެވެ.
މި ކަމަށް ހާއްސަކޮށް، އިއްޔެ ބޭއްވި ބައްދަލުވުމެއްގައި، ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް)ގެ ރައީސް އިބްރާހިމް ހަމީދު (އިއްބެ) އާއި އެ އެސޯސިއޭޝަންގެ އިސް ފަރާތްތަކުގެ އިތުރުން، ކުޅިވަރާ ބެހޭ ވުޒާރާގެ އިސްވެރިންނާއި މޯލްޑިވްސް އޮލިމްޕިކް ކޮމިޓީން ބައިވެރިވި އެވެ.
ބީބީއޭއެމް އިން މައުލޫމާތު ދޭ ގޮތުގައި، 55 ގައުމަކުން މި ފަހަރުގެ މުބާރާތުގައި ވާދަކުރާއިރު، އެތުލީޓުންނާއި ކޯޗުން އަދި އޮފިޝަލުން ހިމެނޭ ގޮތަށް 500 އަށް ވުރެ ގިނަ ފަރާތްތައް މުބާރާތަށް އަންނާނެ އެވެ.
މިއީ، މިހާތަނަށް ރާއްޖޭގައި ބޭއްވޭ މި ފަދަ އެންމެ ބޮޑު މުބާރާތް ކަމަށް ބޮޑީބިލްޑިން އެސޯސިއޭޝަންގެ ރައީސް، އިއްބެ ވަނީ ވިދާޅުވެފަ އެވެ. އަދި މި ކަން ފުރިހަމަަކޮށް ކުރުމަށް ކަމާބެހޭ ވުޒާރާތަކުން ލިބެމުން އަންނަ އެހީތެރިކަން ވެސް އިއްބެ ވަނީ ފާހަގަކުރައްވައިފަ އެެވެ.
ދެކުނު އޭޝިއާގެ ބޮޑީބިލްޑިން މުބާރާތް ވެސް މިދިޔަ އަހަރާއި މި އަހަރު ރާއްޖޭގައި ވަނީ ހޯސްޓްކޮށްފަ އެވެ. މީގެ ކުރިން، 2022 ވަނަ އަހަރު ކ. މާފުށީގައި ވަނީ އޭޝިއާގެ ބޮޑީބިލްޑިން މުބާރާތް ވެސް ބާއްވައިފަ އެެވެ. އަދި 2001 ވަނަ އަހަރު ދެކުނު އޭޝިއާގެ ބޮޑީބިލްޑިން މުބާރާތް ބަނޑޮހުގައި ބޭއްވި އެވެ.
ދުނިޔޭގެ ފެޑެރޭޝަން ރައީސް ޕޯލް ޗުއާ ވިދާޅުވީ، ދުނިޔޭގެ މުބާރާތް ބޭއްވުމުގެ ފުރުސަތު ރާއްޖެ އަށް ދިނީ، 2022، 2023 ވަނަ އަހަރު ދެކުނު އޭޝިއާ ބޮޑީބިލްޑިން މުބާރާތާއި 2022 ވަނަ އަހަރު އޭޝިއާގެ ބޮޑީބިލްޑިން މުބާރާތް ރާއްޖޭގައި ހޯސްޓްކޮށްފައިވަނީ ފުރިހަމަކޮށް ކަމަށްވާތީ ކަމަށެވެ.
