ރާއްޖޭގެ އަންހެން ބާސްކެޓްބޯލް ލެޖެންޑް ފާތިމަތު ރިޝްމާ (ރިޝްޓޯ) ކުޅުން ހުއްޓާލައިފި އެވެ.
ރިޝްމާ ވަނީ ރާއްޖޭގެ އެންމެ މަތީ ފަންތީގައި 20 އަށް ވުރެ ގިނަ އަހަރު ބާސްކެޓްބޯޅައިގައި ހަރަކާތްތެރިވެފަ އެވެ. ރާއްޖޭގެ އެންމެ މޮޅު އަންހެން ބާސްކެޓްބޯޅަ ކުޅުންތެރިޔާގެ މަގާމު ވެސް ގިނަ ފަހަރުތަކެއްގެ މަތިން ވަނީ ހޯދައިފަ އެވެ.
ރޭ މާލޭގައި ނިމުނު ސުޕަ ކަޕް މުބާރާތުގެ ފައިނަލުން ލަންކާގެ އީގަލްސް އަތުން ރާއްޖޭގެ ކުއީންސް ބާސްކެޓް ބޯލް ކުލަބް ބަލިވި މެޗަކީ ރިޝްމާ ބާސްކެޓް ކޯޓުގައި ކުޅުންތެރިއެއްގެ ގޮތުގައި ފެނުނު ފަހު މެޗެވެ.
ގައުމީ ޓީމާއެކު ގިނަ ކާމިޔާބީތަކެއް ހޯދި ރިޝްމާ ވަނީ ގައުމީ ޓީމާއެކު ރާއްޖޭގައި މިދިޔަ އަހަރު ކުރިއަށްދިޔަ ޝާބާ ޗެމްޕިއަންޝިޕުގައި ރިހި މެޑަލް ވެސް ހޯދައިފަ އެވެ.
ރިޓަޔާކުރިކަން އިއުލާނުކުރަމުން، ރިޝްމާ ބުނީ، އެންމެ ފުރަތަމަ ވެސް ޝުކުރުއަދާ ކުރަން ބޭނުންވަނީ މަންމަ އަށް ކަމަށެވެ. އެ ގޮތުން، އެންމެ ކުޑައިރުން ފެށިގެން ކުޅެން ދިޔުމަށް ހިތްވަރުދީ، ބާސްކެޓް ކުޅެން ފުރުސަތު ތަނަވަސްކޮށްދިނީ މަންމަ ކަމަށް ރިޝްމާ ބުނެފައިވެ އެވެ.
"އަބަދުވެސް އެނގޭ މި ދުވަސް އަންނަނާނެކަން. އެކަމަކު ބޭނުންވަނީ އަބަދުވެސް ބާސްކެޓް ކުޅެން. ރުޅިއަޔަސް ދެރަވިޔަސް މި ބޯޅަ އަށް ހުރިހާ "ފީލިންގްސް އެއް އައިވުޑް ޝެއާ" ރިޝްމާ ބުންޏެވެ.
ރިޝްމާ ބުނީ މިހާރުގެ ޖެނެރޭޝަން އިން ބާސްކެޓް ކުޅެމުން އަންނާތީ ވަރަށް އުފާވާ ކަމަށެވެ. އަދި ކުރިއަށް އޮތް ތަނުގައި ރާއްޖޭގެ ބާސްކެޓް އިތުރު ހަރުފަތަކަށް މިހާރުގެ ކުޅުންތެރިން ގެންދާނެ ކަމަށް އުންމީދުކުރާ ކަމަށް ރިޝްމާ ބުނެފައިވެ އެވެ.
ރާއްޖޭގެ އެންމެ މޮޅު ބާސްކެޓް ބޯލް ކުޅުންތެރިޔާގެ މަގާމު ގިނަ ފަހަރުތަކެއްގައި ހޯދި ރިޝްމާ އަކީ ކޯޓުގައި އަޒުމު ވަރުގަދަ ކުޅުންތެރިން ގޮވައިގެން މަސައްކަތް ކުރަން އެނގޭ ވަރުގަދަ ލީޑަރެކެވެ.
ރިޝްމާ ބާސްކެޓް ކުޅުން ހުއްޓާލިއިރު, މީގެ ކުރިން ރިޝްމާގެ ފިރިމީހާ މުހައްމަދު ޒިލާލް (ޒިލާ) ވެސް ވަނީ ބާސްކެޓް ކުޅުން ހުއްޓާލައިފަ އެވެ. ބާސްކެޓް ކުޅުން ހުއްޓާލި ނަމަވެސް ޒިލާ އަންނަނީ ކޯޗެއްގެ ގޮތުގައި މަސައްކަތް ކުރަމުންނެވެ. ގައުމީ ޓީމުގެ ހެޑް ކޯޗުގެ ޒިންމާ ވެސް ވަނީ އަދާކޮށްފަ އެވެ.
