ސްރީ ލަންކާގައި ކުރިއަށްދާ ފީބާ 18 އަހަރުން ދަށުގެ މުބާރާތުގެ ސައުތު އޭޝިއަން (ސާބާ) ކޮލިފައިންގެ ތިން ވަނަ ހޮވާ މެޗުން މިއަދު ބަންގްލަދޭޝް އަތުން ރާއްޖެ 59-57 އިން މޮޅުވެއްޖެ އެވެ.
ޖުމްލަ އެކު، ހަތަރު ޓީމު ވާދަކުރި މުބާރާތުން ރާއްޖެ ދިޔައީ ތިން ވަނަ އަށެވެ. ލީގު ބުރުގައި ވެސް ރާއްޖޭން ވަނީ ބަންގްލަދޭޝް އަތުން މޮޅުވެފަ އެވެ. އެ ފަހަރު ކާމިޔާބު ހޯދީ، 66-55 އިންނެވެ. އެއީ، ބައިނަލްއަގުވާމީ ލެވަލްގައި، 18 އަހަރުން ދަށުގެ ޓީމުން ހޯދި ފުރަތަމަ މޮޅެވެ.
ތިން ވަނަ ހޮވާ މެޗުގައި، މިއަދު މެޗުގެ ފުރަތަމަ ދެ ކުއާޓަރު ނިމުނުއިރު، ރާއްޖެ އޮތީ، 28-22 އިން ކުރީގަ އެވެ. ފަހު ކުއާޓަރުތަކުގައި ވެސް ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ރާއްޖޭން ވަނީ ފަހު ވަގުތާ ހަމައަށް ހިތްވަރުކޮށް، ސްކޯ ހިފަހައްޓައި، 59-57 އިން މޮޅުވެފަ އެވެ.
ރާއްޖޭގެ ޒުވާން ޓީމުން މި މުުބާރާތުގައި ކުޅެފައިވަނީ، ސީނިއާ ޓީމުގައި ވެސް މަސައްކަތްކުރަމުން އަންނަ ކޯޗު، ރާއްޖޭގައި އުފެދުނު އެންމެ މޮޅު އެެއް ބާސްކެޓްބޯޅަ ކުޅުންތެރިޔާ، މުހައްމަދު ޒިލާލް (ޒިލާ)ގެ ކޯޗުކަމުގަ އެވެ.
ފީބާ 18 އަހަރުން ދަށުގެ ސާބާ ކޮލިފައިންގައި، ރާއްޖޭން ކުޅުނު އެހެން މެޗުތަކުގެ ނަތީޖާ އަށް ބަލާއިރު، އިންޑިއާ އަތުން ރާއްޖެ ބަލިވީ، 117-44 އިންނެވެ. އަދި ސްރީ ލަންކާ އަތުން ބަލިވީ، 102-76 އިންނެވެ.
މުބާރާތުގެ ޗެމްޕިއަންކަން އިންޑިއާ އިން ހޯދީ މިރޭގެ ފައިނަލުގައި، ސްރީ ލަންކާ އަތުން 87-62 އިން މޮޅުވެގެންނެވެ.
