ރާއްޖޭގައި އުފެދުނު އެ ފަދަ ދެ ވަނަ އަށް ނެތް މޮޅު އަންހެން ބާސްކެޓްބޯޅަ ކުޅުންތެރިއެއް ކަމަށްވާ، ފާތިމަތު ރިޝްމާ (ރިޝްޓޯ)، 38، އޭނާގެ ހަޔާތުގެ 22 އަހަރަށް ފަހު، ރަސްމީ ކުޅުމުގެ ކެރިއަރު މި ވަނީ ނިންމާލައިފަ އެވެ. ކާމިޔާބު ބޮޑު ކެރިއަރެއް ނިންމާލިކަން އިއުލާނުކުރިއިރު، ރިޝްމާ ރޮމުން ޝުއޫރުތައް ފާޅުކޮށް، ރޭ ކޯޓުން ފައިބައިގެންދިޔައިރު، ރާއްޖޭގެ ކުޅިވަރު އާއިލާ އިން އަންނަނީ އޭނާ ދިވެހި ކުޅިވަރަށް ކޮށްދިން ހިދުމަތަށް ޝުކުރު އަދާކުރަމުންނެވެ.
ރިޝްމާގެ ފަހު މުބާރާތަކީ، ރޭ މާލޭގައި ނިމުނު ސުޕަ ކަޕް އެވެ. އެ މެޗަށް ފަހު، ރިޓަޔާކުރި ރިޝްމާ، ދެން ކުރިއަށްދިއުމަށް ނިންމާފައި އޮތް ދާއިރާވ އަކީ، ކޯޗިންނެވެ. އޭނާ ވަނީ ކޯޗިން ލައިސަންސް ވެސް ހާސިލްކޮށްފަ އެވެ.
"ޝައުގުވެރިކަމާއި ޕެޝަންއާ އެކު ރިޝްމާ ހާސިލްކޮށްފައިވާ ގިނަ ކަންތައްތަކެއްގެ ސަބަބުން ގިނަ ޒުވާން ކުޅުންތެރިންތަކެއް އިންސްޕަޔާވާނެ. އަހަރެމެން ޔަގީނުން ވެސް ރިޝްމާގެ ކުޅުން މިސްވާނެ. އެކަމަކު، ދެން ކޯޓުން ބޭރުގައި ރިޝްމާ އަދާކުރާ ރޯލުގެ ސަބަބުން މި ކުޅިވަރު އެހެން ލެވަލަށް ގެންދެވޭނެ ކަމުގެ އުންމީދު އެބައޮތް. އަބަދުވެސް ކާމިޔާބަށް އެދެން،" ބާސްކެޓްބޯޅަ އެސޯސިއޭޝަންގެ ރައީސް އަހުމަދު އާދަމް (އެޑަމް) ވިދާޅުވެފައިވެ އެވެ.
ބާސްކެޓްބޯޅައިގެ އިތުުރުން، ހޭންޑްބޯޅަ އާއި ނެޓްބޯޅައިގައި ވެސް ހަރަކާތްތެރިވި ރިޝްމާ އަކީ ރާއްޖޭގެ އަންހެން ބާސްކެޓްބޯޅަ ޓީމުގެ ކެޕްޓަނެއްގެ ގޮތުގައި ވެސް ތަފާތު ދެއްކި އެތުލީޓެކެވެ. "ހަވީރު" ނޫހުގެ ހަވީރު އެވޯޑްސް އިން ހޮވި އެންމެ މޮޅު ބާސްކެޓްބޯޅަ ކުޅުންތެރިޔާގެ މަގާމު، ހަތަރު ފަހަރު ހޯދި ރިޝްމާ ވަނީ، ހަވީރު ނޫހުން ހޮވި އެންމެ ފުރަތަމަ ސްޕޯޓްސް ވިމެން އޮފް ދަ އިޔާގެ އެވޯޑް ހޯދައިފަ އެވެ.
"ރިޝްމާގެ ލެގަސީ އަބަދުވެސް ދެމިއޮންނާނެ. އަހަރެމެން ވަރަށް ފަހުރުވެރިކަމާ އެކު ތިޔަ ދަތުރު ދެކެފިން. އަދިވެސް އެއް ފަަހަރު ވަރަށް ބޮޑަށް ޝުކުރިއްޔާ،" ރިޝްމާގެ ކެރިއަރުގެ ކާމިޔާބީ އާއި ގައުމު ތަމްސީލްކުރުމުގައި ދެއްކި ނަމޫނާ އަށް އިޝާރާތްކޮށް، ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ)، ސޯޝަލް މީޑިއާގައި ލިޔުއްވައިފައިވެ އެވެ.
