މެޑްރިޑް (އޮކްޓޫބަރު 1) - ޔޫރަޕްގެ ޗެމްޕިއަން، ރެއާލް މެޑްރިޑްގެ އެއް ނަމްބަރު ކީޕަރު ތިބޯ ކޯޓުއާ އަށް އަނިޔާވެ، ޗެމްޕިއަންސް ލީގުގައި ފްރާންސްގެ ލިލްއާ ދެކޮލަށް ކުޅޭ މެޗުގައި ކުޅެވޭނެ ކަމާމެދު ސުވާލު އުފެދިއްޖެ އެވެ.
ރެއާލުން ބުނީ ސްޕެނިޝް ލީގުގައި އެތުލެޓިކޯ މެޑްރިޑްއާ ދެކޮޅަށް ރެއާލުން ކުޅުނު މެޗުގެ ފަހުކޮޅު ކޯޓުއާ އަށް އަނިޔާވެފައިވާ ކަމަށެވެ. އަދި މި އަނިޔާގެ ސަބަބުން ކުރިއަށް އޮތް މެޗުގައި ކުޅުމުގެ ފުރުސަތު ކޯޓުއާ އޮތްތޯ ބެލުމަށް ޓެސްޓުތައް ހަދަމުން އަންނަ ކަމަށް ރެއާލުން ބުނެފައިވެ އެވެ.
ކޯޓުއާ އަނިޔާވުމުން ރެއާލުން އޭނާގެ ބަދަލުގައި ޗެމްޕިއަންސް ލީގު މެޗަށް ނެރޭނެ ކަމަށް ބެލެވެނީ، ކުރިން ވެސް އެ މަގާމު ފުރި އަންޑްރީ ލުނިން އެވެ.
މިދިޔަ ސީޒަނުގެ ބޮޑު ބައެއްގައި ވެސް ލުނިން ވަނީ ކޯޓުއާ އަށް އަނިޔާވުމުން ރެއާލްގެ ގޯލު ބަލަހައްޓައިފަ އެވެ. އަދި އޭނާ ވަނީ ރެއާލާ އެކު މިދިޔަ ސީޒަނުގައި މޮޅު ކުޅުމެއް ދައްކައިފަ އެވެ. އެއާ އެކު, ޔޫރަޕްގެ ގިނަ ޓީމުތަކުން ލުނިން އަށް ފާރަލި އެވެ. އެކަމަކު، އޭނާ ވަނީ ރެއާލާ އެކު ހަދާފައިވާ އެއްބަސްވުން އާކޮށްފަ އެވެ.
މިދިޔަ ސީޒަނުގައި ރެއާލުން ޗެމްޕިއަންސް ލީގު ކާމިޔާބުކުރުމުގައި ލުނިންގެ ހިއްސާ ބޮޑެވެ.
