މެޑްރިޑް (ސެޕްޓެމްބަރު 25) - ސްޕެނިޝް ލީގުގައި ޑިޕޯޓިވޯ އަލަވޭސް އަތުން ޗެމްޕިއަން ރެއާލް މެޑްރިޑުން 3-2 ގެ ނަތީޖާ އަކުން އުނދަގޫ މޮޅެއް ހޯދައިފި އެވެ.
ރެއާލްގެ ދަނޑުގައި ކުޅުނު މި މެޗުގެ ފުރަތަމަ ހާފުގެ ފުރަތަމަ މިނެޓުގެ ތެރޭގައި ރެއާލުން ވަނީ ގޯލު ޖަހައި ލީޑު ނަގައިފަ އެވެ. މި ގޯލު ރެއާލަށް ކާމިޔާބު ކޮށްދިނީ ކެޕްޓަން ބޭންޑް އަޅައިގެން ކުޅުނު ލޫކަސް ވަޒްކޭޒް އެވެ. މި ގޯލަށް ފަހު ވެސް ރެއާލުން ވަނީ އަލްވޭސް ކޮޅަށް ގޯލު ޖަހަން ގިނަ ފުރުސަތުތަކެއް ތަނަވަސްކޮށްފަ އެވެ. އެ ގޮތުން، މެޗުގެ 23 ވަނަ މިނެޓުގައި ރެއާލްގެ ތަރި ކީލިއަން އެމްބާޕޭ ގޯލެއް ޖެހި ނަމަވެސް ރެފްރީ ވަނީ އެ ގޯލު އެމްބާޕޭ ޖެހިއިރު, އޮފްސައިޑްގައި ހުރި ކަމަށް ނިންމައިފަ އެވެ.
ރެއާލުން ލީޑު ފުޅާކުރީ މެޗުގެ 40 ވަނަ މިނެޓުގައި އެމްބާޕޭ ޖެހި ގޯލުންނެވެ. އެމްބާޕޭ، މި ގޯލު ޖެހީ އަލްވޭސްގެ ދެ ކުޅުންތެރިން ކައިރިން ނައްޓާލުމަށްފަހު ގޯލުގެ ދުރުކަނަށް ބޯޅަ ފޮނުވާލައިގެންނެވެ.
މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ރެއާލްގެ ތިން ވަނަ ގޯލު އެ ޓީމަށް ޖަހައިދިނީ ރޮޑްރީގޯ އެވެ. މިއީ، އަލަވޭސްގެ އޭރިއާ ތެރެއަށް މުޅިން ހުހަށް ވަދެ ގޯލުގެ ކައިރިކަނަށް ބޯޅަ ފޮނުވާލައިގެން ރޮޑްރީގޯ ކާމިޔާބުކުރި ގޯލެކެވެ.
އޭގެ ފަހުން މެޗުގެ 72 ވަނަ މިނެޓުގައި ރެއާލްގެ ޒުވާން ތަރި އެންރިކް ފޮނުވާލި ބާރު ހަމަލާ އަމާޒުވީ ގޯލުގެ ހުރަސް ދަނޑިއަށެވެ.
އޭގެ ފަސް މިނެޓު ފަހުން އަލަވޭސްގެ އަބްޑޭ ރެވިޗް ރެއާލްގެ އޭރިއާ ތެރެއަށްވަދެ ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.
މެޗުގެ 85 ވަނަ މިނެޓުގައި އަލްވޭސްގެ ޕްރޮޓޮސޯނީ ވަނީ ގޯލެއް ޖަހާ ފަރަގު ކުޑަކޮށްފަ އެވެ. މިއީ އޭރިއާ ބޭރުން އެނާ ފޮނުވާލި ބާރު ހަމަލާ ގޯލުގެ ތިރީ ކަނަށް އަމާޒުކޮށްލައިގެން ޖެހި ގޯލެކެވެ. އަދި އޭގެ މިނެޓެއް ފަހުން އަލްވޭސްގެ ކިކީ ގާސިއާ މުޅިން ހުސްކޮށް ރެއާލްގެ އޭރިއާ ތެރެއަށް ވަދެ ފޮނުވާލި ބޯޅަ ގޯލުގެ އަރިމަތީ ކަނަށް ވައްދާލައިގެން ވަނީ އިތުރު ގޯލެއް ޖަހައިފަ އެވެ.
މެޗުގެ ފަހު ކޮޅުގައި ރެއާލުން ޕްރެޝަރުގައި ކުޅެން ޖެހުނުއިރު، އެ ޓީމުން ރަނގަޅަށް ޑިފެންސްކޮށް ލީޑު ހިފެހެއްޓި އެވެ.
ރެއާލް އޮތީ ކުޅުނު ހަތް މެޗުން ލިބުނު 17 ޕޮއިންޓާއެކު ލީގު ތާވަލުގެ ދެ ވަނައިގަ އެވެ. އެއް ވަނައިގައި އޮތް ބާސެލޯނާ އަށް އެއް މެޗު މަދުން ކުޅެ 18 ޕޮއިންޓް ލިބިފައިވެ އެވެ.
