ރާއްޖޭގައި ކުރިއަށްދިޔަ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ދިވެހި ޗެލެންޖް ކަޕްގައި ގައުމީ އަންހެން ވޮލީޓީމުގެ ފަރާތުން ފެނިގެންދިޔަ ކުޅުމާމެދު ހިތްހަމަ ޖެހޭ ކަމަށާއި, މި މުބާރާތުން ފެނިގެންދިޔައީ އަންހެން ގައުމީ ވޮލީބޯޅަ ޓީމަށް އައިސްފައިވާ ކުރިއެރުން ކަމަށް ގައުމީ ވޮލީބޯޅަ ޓީމުގެ ކޯޗު ސޮފްވާން އަހުމަދު (ސޮއްޕެ) ބުނެފި އެވެ.
ރޭ ކުޅުނު ފައިނަލުގައި ރާއްޖޭގެ މައްޗަށް ކިރްގިސްތާން އިން ކުރިހޯދީ 3-2 ސެޓުންނެވެ. މީގެ ކުރިން، 2019 ވަނަ އަހަރު ވެސް މި މުބާރާތުގެ ފައިނަލުގައި ރާއްޖެ ކުޅުނެވެ. އެ ފަހަރުގެ ފައިނަލުން ރާއްޖެ ބަލިވީ ނޭޕާލް އަތުންނެވެ. އޭގެ ފަހުން މިދިޔަ އަހަރު އަމިއްލަ ގައުމުގައި ބޭއްވި ފޯ ނޭޝަންސް ކަޕުގެ ފައިނަލުގައި ވެސް ރާއްޖެ ކުޅެނެވެ.
ރޭގެ މެޗަށް ފަހު ނޫސްވެރިންނާ ވާހަކަ ދައްކަމުން ސޮފްވާން ބުނީ، ގައުމީ ޓީމާ ހަވާލުވެ، ލިބުނު ދެ މަސް ދުވަހުގެ ތެރޭގައި ކުރެވުނު މަސައްކަތްތަކާ މެދު ހިތްހަމަ ޖެހޭ ކަމަށެވެ. ހާއްސަކޮށް، މިދިޔަ މަހު ނޭޕާލުގައި ކުރިއަށްދިޔަ މުބާރާތައް ފަހު ރާއްޖެ އައިސް ރަނގަޅުކުރަން ހުރި ކަންކަން ރަނގަޅު ކުރަން ލިބުނު 20 ދުވަހުގެ ތެރޭގައި ކުޅުންތެރިންގެ ފަރާތުން ލިބުނު އެއްބާރުލުން ސޮފްވާން ފާހަގަކުރި އެވެ.
ސޮފްވާން ބުނީ، ގައުމީ ޓީމުން ލީގު ބުރުގައި ކުޅުނު މެޗުން ސީދާ ތިން ސެޓުން ބަލިވި، ނަމަވެސް ފައިނަލުގައި ފަސް ސެޓު ކުޅެގެން ބަލިވީ ރަނގަޅަށް ކުޅުމަށް ފަހުގައި ކަމަށެވެ. އެކަމަކު، ފަހު ސެޓުގައި ދިމާވި ކަންކަމުގެ ސަބަބުން މެޗު ގެއްލުނީ ކަމަށް ސޮފްވާން ވަނީ ފާހަގަކޮށްފަ އެވެ.
ލިބޭ އެންމެ ބޮޑު ހިތްހަމަ ޖެހުމެއްގެ ގޮތުގައި ސޮފްވާން ފާހަގަކުރީ، ގައުމީ ޓީމަށް އައިސްފައިވާ ކުރިއެރުމެވެ. އެ ގޮތުން، ކުޅުންތެރިންގެ ފިޓްނަސް އަށް ބެލިކަމުގައިވިޔަސް، ބޮޑުތަނުން ޓީމުގެ ކުރިއެރުން ފެންނާނެ ކަމަށް ސޮފްވާން ފާހަގަކުރި އެވެ.
"ގައުމީ ޓީމަށް އައިސްފައި މިއޮތް ކުރިއެރުން މިހާރު ފެންނާނެ. ފަސް ސެޓު ކުޅެގެން އަޅުގަނޑުމެން ބަލި މިވީ, އެކަމަކު މި ކުދިން އަށް މިކަހަލަ ގިނަ މުބާރާތް ކުޅެން ފުރުސަތު ލިބޭނަމަ, އިތުރަށް ރަނގަޅު ވާނެ." ސޮފްވާން ބުންޏެވެ.
ސެންޓްރަލް އޭޝިއާ ސަރަހައްދުގެ އަންހެން ވޮލީބޯޅައިގެ ރޭންކިންގައި މި މުބާރާތުގައި ރާއްޖޭން ނެރުނު ނަތީޖާތަކަށް ފަހު ގައުމީ އަންހެން ވޮލީބޯޅަ ޓީމަށް ވަނީ ކުރިއެރުން ލިބިފަ އެެވެ. އެ ގޮތުން، ރާއްޖެ މި ވަގުތު އޮތީ، ނޭޕާލާ އެކު، ފަސް ވަނައިގަ އެވެ.
