ކުރީ ސަރުކާރުގައި ޕަބްލިކް ބޭންކު އެކައުންޓު އޯވާޑްރޯ ކޮށް، ފައިސާ ޗާޕުކުރުމާ ގުޅިގެން ބޭންކިން ނިޒާމުގައި އިތުރުވެފައި ހުރި ފައިސާ މަދުކުރަން މި އަހަރުގެ ތެރޭގައި އޯޕަން މާކެޓް އޮޕަރޭޝަންސް ފަށައި އެ ފައިސާ މޮޕްއަޕް ކުރާނެ ކަމަށް އެމްއެމްއޭ އިން މިއަދު ބުނެފި އެވެ.
އެމްއެމްއޭ އިން މިހެން ބުނީ ބައިނަލްއަގުވާމީ ރޭޓިން އެޖެންސީ، މޫޑީސްއިން ރާއްޖޭގެ ކްރެޑިޓް ރޭޓިން "ސީއޭއޭ-2" އަށް ދަށްކުރުމާ ގުޅިގެން ނެރުނު ބަޔާނެއްގަ އެވެ. މޫޑީސްއިން ރޭޓިން ދަށްކުރި މައިގަނޑު ސަބަބުތަކުގެ ތެރޭގައި ބޭންކިން ނިޒާމުގައި ހުރި "އެކްސެސް ލިކުއިޑިޓީ" ގެ މައްސަލަ ފާހަގަކޮށްފައިވެ އެވެ.
މަރުކަޒީ ބޭންކުގެ ބަޔާނުގައި ބުނި ގޮތުގައި ފައިސާ ޗާޕުކުރުމުގެ ސަބަބުން ބޭންކިން ނިޒާމުގައި ސާޕްލަސް ލިކުއިޑިޓީ ހުރީ އެވްރެޖްކޮށް 6.7 ބިލިއަން ރުފިޔާގަ އެވެ.
މި ގޮތަށް އިތުރަށް ހުރި ފައިސާގެ ސަބަބުން ދިވެހި ރުފިޔާގެ އެކްސްޗޭންޖް ރޭޓް ހިފެހެއްޓުމަށް ކުރިމަތިވެފައިވާ ގޮންޖެހުންތައް ކުޑަކުރުމަށްޓަކައި، އޯޕަން މާކެޓް އޮޕަރޭޝަންސް މި އަހަރުގެ ތެރޭގައި ފަށާނެ ކަމަށް އެމްއެމްއޭ އިން ބުންޏެވެ. ނަމަވެސް މިކަން ކުރާނެ ވަކި ތާރީހެއް ބަޔާންކޮށްފައި ނެތެވެ.
އެމްއެމްއޭގެ ބަޔާނުން އިތުރު ކަމެއްގެ ގޮތުގައި ފާހަގަވީ މި އަހަރުގެ ފަހުކޮޅު ވެލާނާ އިންޓަނޭޝަނަލް އެއާޕޯޓްގެ އާ ޓާމިނަލްގެ ބައެއް ހުޅުވޭނެ ކަމަށް ބުނެފައިވާ ބުނުމެވެ. މިއާ އެކީ، ރާއްޖެ އަންނަ ފަތުރުވެރިންގެ އަދަދު އިތުރުކުރެވޭނެ ކަމަށް އެ އިދާރާއިން ބުންޏެވެ.
އޭގެ އިތުރުން ރަސްމީ ރިޒާވާއި ބޭނުންކުރެވޭ ރިޒާވު ވެސް މަތިވާނެ ކަމަށް އެމްއެމްއޭގެ ބަޔާނުގައިވެ އެވެ. އެންމެ ފަހުން އެ އިދާރާއިން ނެރުނު ރިޕޯޓުގައި ވަނީ، މިދިޔަ މަސް ނިމުނު އިރު ޖުމްލަ ރިޒާވު 444 މިލިއަން ޑޮލަރަށް އިތުރުވެ، ބޭނުންކުރެވޭ ރިޒާވުގައި 61.22 މިލިއަން ޑޮލަރު އެބަހުރި ކަމަށެވެ.
އެމްއެމްއޭ އިން ބުނީ މި އަހަރުގެ ނިޔަލަށް ބޭނުންކުރެވޭ ރިޒާވާއި ސޮވެރިން ޑިވެލޮޕްމަންޓް ހިމަނައިގެން ރާއްޖޭގެ ރަސްމީ ރިޒާވް މި އަހަރުގެ ބަޖެޓަށް އަންދާޒާ ކުރި އަދަދު ކަމުގައިވާ 606 މިލިއަން ޑޮލަރަށް ވުރެ އިތުރުވެގެންދާނެ ކަމަށެވެ.
ހަމަ އެހެންމެ ބޭރު ފައިސާގެ ބާޒާރަށް ދިމާވެފައިވާ ގޮންޖެހުންތައް ހައްލުކުރުމަށްޓަކައި ރާއްޖޭގެ ބޭންކިން ނިޒާމަށް ވަންނަ ބޭރު ފައިސާ އިތުރުކުރެވޭނެ ގޮތަށް މަނިޓަރީ ގަވައިދު އިސްލާހުކޮށް މި މަހުގެ ތެރޭގައި އެ ބަދަލުތައް ވެސް އިއުލާން ކުރާނެ ކަމަށެވެ.
މޫޑީސްގެ ޑައުންގްރޭޑުގައި ދިން ރޭޓިންއިން ރާއްޖޭގެ ބޮންޑުތައް މިހާރު އޮތީ "ނޮން-އިންވެސްޓްމެންޓް" ގްރޭޑުގަ އެވެ. މިކަމާ ގުޅުވައި އެމްއެމްއޭއިން ބުނީ ރާއްޖޭން ނަގާފައިވާ ބޮންޑަށް ދައްކަން ޖެހޭ ފައިސާ ދެއްކުމުގައި އެއްވެސް ދަތިކަމެއް ނެތް ކަމަށެވެ. އަދި އެ ޕޭމަންޓާއި ރާއްޖޭން ދައްކަން ޖެހޭ އެހެން ދަރަނިތައް ދެއްކޭނެ ކަމުގެ ފުރިހަމަ ޔަގީންކަން އެމްއެމްއޭ އިން ދީފައިވެ އެވެ.
މޫޑީސްއިން ރާއްޖޭގެ ކްރެޑިޓް ރޭޓިން ދަށްކުރުމުގެ ކުރިން ފިޗު ރޭޓިންއިން ވެސް ވަނީ ރާއްޖޭގެ ސޮވެރިން ކްރެޑިޓު ރޭޓިން ދަށްކޮށްފަ އެވެ.
