ރާއްޖޭގައި މިހާރު ކުރިއަށްދާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވިމަންސް ވޮލީބޯލް ޗެލެންޖް ކަޕުގެ ސެމީ ފައިނަލުގައި ތަޖިކިސްތާން ތިން ސެޓުން ބަލިކުރެވޭނެ ކަމުގެ ޔަގީންކަން އެބައޮތް ކަމަށް ގައުމީ އަންހެން ވޮލީބޯޅަ ޓީމުގެ ކޯޗު ސޮފްވާން އަހުމަދު (ސޮއްޕެ) ބުނެފި އެވެ.
ލީގު ބުރުގެ ފަހު މެޗުގައި ކިރްގިސްތާން އަތުން ރާއްޖެ ރޭ ސީދާ ތިން ސެޓުން ބަލިވި ނަމަވެސް އެ މެޗުގައި ރާއްޖޭގެ ފަރާތުން ނިސްބަތުން ބަލާއިރު، ފެނިގެންދިޔައީ މޮޅު ކުޅުމެކެވެ.
މި މެޗަށް ފަހު "އަދަދު ސްޕޯޓްސް" އާ ވާހަކަ ދައްކަމުން ސޮފްވާން ބުނީ، މި މެޗުގެ ފުރަތަމަ ސެޓުގައި ރާއްޖެ އަށް ސެޓު ނިންމަން ތިން ފުރުސަތު ލިބުނު ކަމަށެވެ. އެކަމަކު، އޭގެ ބޭނުން ނުހިފި އެ ސެޓު ރާއްޖެ އަށް ގެއްލުނީ ކަމަށް ސޮފްވާން ވެސް އެއްބަސްވި އެވެ.
"ފުރަތަމަ ސެޓު ނިންމަން ތިން ފުރުސަތު ލިބުނު އެ ސެޓެގައި ރަނގަޅަށް ކުޅެފަ, ސެޓު ގެއްލުމުން ދެވަނަ ސެޓުގައި ދަށްކޮށް ފެނުނީ. އެކަމަކު އެއީ ވޮލީގައި ވެގެންވާނެ ގޮތެއް ނޫން. ތިންވަނަ ސެޓު ވެސް ރާއްޖެ އިން ރަނގަޅަށް ކުޅުނު. އަޅުގަނޑަށް ފާހަގަވީ މި މެޗުގައި ރާއްޖޭގެ ފަރާތުން ދަށްކޮށް ފެނުނީ ސާވިސް ރިސީވްތައް." ސޮފްވާން ބުންޏެވެ.
ލީގު ބުރުގެ މެޗުގައި ރާއްޖޭން ތަޖިކިސްތާން ބަލިކުރީ 3-1 ސެޓުންނެވެ. އެ މެޗުގައި ވެސް ރާއްޖެ އަށް ތިން ސެޓުން މޮޅުވެވޭނެ އެވެ. އެކަމަކު، އެއް ސެޓުގައި ޓީމަށް މާ ބޮޑު ބަދަލުތަކެއް ގެނެސްގެން ކުޅެ، ޓީމުގެ ފޯމު އެއް ސެޓުގައި ދަށްވީ އެވެ.
ސޮފްވާން ބުނީ ހުރި މައްސަލަތައް ރަނގަޅުކޮށް ސެމީ ފައިނަލުގައި ތަޖިކިސްތާން ތިން ސެޓުން ބަލިކުރެވޭނެ ކަމުގެ ޔަގީންކަން އެބައޮތް ކަމަށެވެ.
އެކަމަކު، ލީގު ބުރުގައި ތަޖިކިސްތާނާ ކުޅުނު މެޗުހާ ސެމީ ފައިނަލް މެޗު ފަސޭހަ ނުވާނެ ކަމަށް ސޮފްވާން ގަބޫލުކުރެ އެވެ.
ސެމީ ފައިނަލް ފުރަތަމަ މެޗުގައި ކިރްގިސްތާން އާއި އަފްގާނިސްތާން ކުޅޭނީ މާދަމާ ހަވީރު، 16:15 ގަ އެވެ. އަދި ދެ ވަނަ ސެމީ ފައިނަލުގައި ރާއްޖެ އާއި ތަޖިކިސްތާން ބައްދަލުކުރާނީ މާދަމާރޭ 20:30 ގަ އެވެ. އަދި ފައިނަލް މެޗު އޮންނާނީ ބުދަ ދުވަހުގެރޭގަ އެވެ. އެ ދުވަހު ހަވީރު ތިން ވަނަ ހޮވާ މެޗު ކުޅޭނެ އެވެ.
