ރާއްޖޭގައި މިހާރު ކުރިއަށްދާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕްގައި ރާއްޖޭގެ ޓީމުގެ އަމާޒަކީ ރަން މެޑަލް ކަމަށާއި، އެކަމަކު، ފުރަތަމަ ބޭނުންވަނީ ފައިނަލްގެ ޖާގަ ކަށަވަރުކުރުން ކަމަށް ގައުމީ އަންހެން ވޮލީބޯލް ޓީމުގެ ކޯޗު ސޮފްވާން އަހުމަދު ބުނެފި އެވެ.
މި އަހަރު ގައުމީ ޓީމާ ހަވާލުވުމަށް ފަހު ސޮފްވާން ވަނީ ކާވާ ޗެލެންޖް މުބާރާތުގެ ފައިނަލުގައި ރާއްޖޭގެ ޓީމުން ކުޅުމަކީ އޭނާ ކަނޑައަޅާފައިވާ ޓާގެޓް ކަމަށް ބުނެފަ އެވެ.
ގައުމީ ޓީމުން މި ފަހަރުގެ މުބާރާތް ފެށީ މޮޅަކުންނެވެ. ރޭ ޒުވާނުންގެ މަރުކަޒު އެތެރޭ ކޯޓުގައި ކުޅުނު މެޗު ރާއްޖެއިން ކާމިޔާބުކުރީ އަފްގާނިސްތާން އަތުން ސީދާ ތިން ސެޓުންނެވެ.
މި މެޗަށްފަހު "އަދަދު ސްޕޯޓްސް" އާ ވާހަކަ ދައްކަމުން ސޮފްވާން ބުނީ، މިއީ ކުރިއަށްދާން ލިބުނު ހިތްވަރެއް ކަމަށެވެ. އެކަމަކު، ކުރިއަށް އޮތް ދެ މެޗު އަފްގާނިސްތާން މެޗަށް ވުރެ އުނދަގޫވާނެ ކަމަށާއި، އެކަމަކު އެ ދެ މެޗު ކާމިޔާބު ކޮށް ފައިނަލަށް ދެވޭނެ ކަމުގެ ޔަގީންކަން އެބައޮތް ކަމަށް ސޮފްވާން ގަބޫލުކުރެ އެވެ.
"ފުރަތަމަ ޓާގެޓަކީ ރަން. މި މެޗަށް އައިއިރު, ވެސް އެނގޭ އަފްގާނިސްތާން އަކީ މި މުބާރާތުގައި ހަތަރުވަނަ އަށް ރޭންކް ކުރެވިފަ އޮތް ޓީމުކަން. ކުރިއަށް އޮތް ދެ މެޗު މިއަށްވުރެ އުނދަގޫވާނެ. އެކަމަކު ރަނގަޅު ފައިޓެއް ދީ ފައިނަލަށް ދެވެނޭ ކަމުގެ އުންމީދު އެބައޮތް." ސޮފްވާން ބުންޏެވެ.
ގައުމީ ޓީމުން ރޭގެ މެޗުގައި ކޮންމެ ސެޓެއްގައި ވެސް ގިނަ ބަދަލުތަކެއް ގެނަސްގެން ކުޅުނުއިރު، ސޮފްވާން ބުނީ ގައުމީ ޓީމުގައި ފެންވަރު ރަނގަޅު ބެންޗެއް އޮތުން މިއީ އޭނާ ލިބޭ ބޮޑު ހިތްހަމަ ޖެހުމެއް ކަމަށެވެ. އެ ގޮތުން، ޒުވާން ކުޅުންތެރިން އަރާ ރަނގަޅު ފައިޓެއް މިހާރު ދޭނެ ކަމަށާއި, އެއީ ލިބޭ ހިތްހަމަ ޖެހުމެއް ކަމަށެވެ.
ރާއްޖޭން ދެ ވަނަ މެޗުގައި މިރޭ ތަޖިކިސްތާނާ ކުޅޭ މެޗު ފަށާނީ 20:30 ގަ އެވެ. އަދި ލީގު ބުރުގެ ފަހު މެޗުގައި، ކިރްގިސްތާނާ ބައްދަލުކުރާނީ، މާދަމާރޭ 20:30 ގަ އެވެ.
