ރާއްޖޭގައި މިއަދު ފެށި ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕްގައި ރާއްޖެއިން ކުޅުނު ފުރަތަމަ މެޗުގައި ސީދާ ތިން ސެޓުން، އަފްގާނިސްތާން ބަލިކޮށް ފެށުން ރަނގަޅު ކޮށްފި އެވެ.
މި މުބާރާތުގައި ރާއްޖޭގެ އިތުރުން އަފްގާނިސްތާން، ތަޖިކިސްތާން އަދި ކިރްގިސްތާން ބައިވެރިވި އެވެ. މިއަދު ހަވީރު ޒުވާނުންގެ މަރުކަޒު އެތެރޭ ކޯޓުގައި، ތަޖިކިސްތާންގެ މައްޗަށް ކިރްގިސްތާން އިން ކުރިހޯދީ ވެސް ސީދާ ތިން ސެޓުންނެވެ.
ޒުވާނުންގެ މަރުކަޒު އެތެރޭ ކޯޓުގައި މިރޭ ރާއްޖޭން ކުޅުނު މެޗުގެ ސެޓުތައް ދިޔައީ, 19-25, 25-12 އަދި 25-11 އިންނެވެ.
މިރޭގެ މެޗުގެ ތެރެއިން ގައުމީ އަންހެން ވޮލީބޯޅަ ޓީމުގެ ކުޅުންތެރިން އުފާފާޅުކުރަނީ.--- ފޮޓޯ: އަތޫފް އާތިފް/ އަދަދު ސްޕޯޓްސް
މިރޭގެ މެޗުގެ ފުރަތަމަ ސެޓުގައި އަފްގާނިސްތާނުން ވަނީ ރަނގަޅު ފައިޓެއް ދީފަ އެވެ. މި ސެޓު ފަށައިގެން ރާއްޖޭގެ ކުޅުންތެރިންގެ ފަރާތުން ގިނަ ގޯސްތަކެއް ފެނިގެންދިޔަ ނަމަވެސް, ސެޓުގެ މެދުތެރެއިން ބެންޗުން އެރި މާޔާ މުހައްމަދު ސޮލާހްގެ ފަރާތުން މޮޅު ކުޅުމެއް ފެނިގެންދިޔަ އެވެ. މާޔާގެ އިތުރުން, މި ސެޓުގައި ރާއްޖޭގެ ކެޕްޓަން ހައްވާ ރާޝިދާ (ހައްވަ) އަދި އާމިނަތު ޝަހާ ޝާމިންގެ ފަރާތުން މޮޅު ކުޅުމެއް ފެނިގެންދިޔަ އެވެ.
ޖެހިގެން އަދި ދެ ސެޓުގައި ވެސް އަފްގާނިސްތާން ފެނިގެންދިޔައީ ދަށްކޮށެވެ. އޭގެ ފައިދާ ނަގާ ރާއްޖެއިން ވަނީ މި ދެ ސެޓު ފަސޭހަކަމާ އެކު 25-12 އަދި 25-11 އިން ކާމިޔާބުކޮށްފަ އެވެ.
މި މުބާރާތުގެ ދެ ވަނަ މެޗުގައި މާދަމާރޭ ރާއްޖެއިން ނުކުންނާނީ ތަޖިކިސްތާންއާ ދެކޮޅަށެވެ. އަދި ފަހު މެޗުގައި ރާއްޖެއިން ނުކުންނާނީ ކިރްގިސްތާން އާ ދެކޮޅަށެވެ.
މުބާރާތުގެ ހުޅުވުމުގެ ރަސްމިއްޔާތު މިރޭ ކުރިއަށްދިޔައިރު، ޝަރަފްވެރިކޮށްދެއްވީ، ހައުސިން މިނިސްޓަރު ޑރ. އަލީ ހައިދަރު އެވެ. އަރިހުގައި، ކާވާ އާއި ވޮލީބޯލް އެސޯސިއޭޝަން އޮފް މޯލްޑިވްސްގެ ރައީސް މުހައްމަދު ލަތީފް ބައިވެރިވެވަޑައިގެންނެވި އެވެ.
މިއީ، މި އަހަރު ރާއްޖޭގައި ހޯސްޓްކުރާ އިންޓަނޭޝަނަލް ވޮލީބޯޅަ ދެ ވަނަ މުބާރާތެވެ. މީގެ ކުރިން، ރާއްޖޭގައި ވަނީ ކާވާ 20 އަހަރުން ދަށުގެ އަންހެން ވޮލީބޯޅަ މުބާރާތް ބާއްވައިފަ އެވެ.
