މާފަންނު ގެއަކަށް ވަދެ، ދެ މީހެއްގެ ކަރުގައި ވަޅި ޖައްސައިގެން ފޭރުނު ދެ މީހުން ހައްޔަރުކޮށްފި އެވެ.
ފުލުހުން ބުނީ އެ ދެ މީހުން ގެއަށް ވަނީ ފާހަނާގެ ފެން ލައިޓުން ކަމަށާއި ފޭރުނީ ދެ މީހަކު ނިދާފައި އޮއްވާ ކަރުގައި ވަޅި ޖައްސައިގެން ކަމަށެވެ.
"ކޮޓަރީގައި ނިދާފައި ތިބި ދެ މީހެއްގެ ކަރުގައި ވަޅި ޖައްސައި، އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ ބިރުދެއްކީ،" ފުލުހުން ބުންޏެވެ.
އެ މައްސަލައިގައި ހައްޔަރުކުރީ މ.ދާރުލްގަރާރު، އިސްމާއީލް ވިޝާލް، 30، އަދި ބ. ދަރަވަންދޫ، ވިދުވަރު، ހުސެއިން ޝާއިފް، 32، އެވެ.
އެގެއިން ބިރު ދައްކައިގެން މޯބައިލް ފޯނާއި، ލެޕްޓޮޕެއްގެ އިތުރުން އެހެނިހެން ތަކެތި ފޭރުމަށްފަހު އެ ދެ މީހުން ފިލައިގެން ދިޔައީ ފާހާނާއަށް ވަދެ އެތެރެއިން ދޮރު ތަޅުލުމަށްފަހު، ފެންލައިޓުން ނިކުމެގެން ކަމަށް ފުލުހުން ބުންޏެވެ.
ފޭރުނު ކަމަށް ތުހުމަތު ކުރެވޭ ދެ މީހުން ރޭގެ ވަގުތެއްގައި ހައްޔަރުކޮށް، އެމީހުން ދިރިއުޅޭ ގެއިން ފޭރުނު ލެޕްޓޮޕްއާއި މޯބައިލް ފޯނުގެ އިތުރުން ވަގަށް ނަގާފައި ކަމަށް ތުހުމަތު ކުރެވޭ އެހެނިހެން ތަކެތި ވެސް ފެނިފައިވާ ކަމަށް ވެސް ފުލުހުން ބުންޏެވެ.
ފުލުހުން ގެންދަނީ އެ މައްސަލަ ތަހުގީގުކުރަމުންނެވެ.
މާލޭގައި ވައްކަމުގެ މައްސަލަ ދުވަހަކަށްވުރެ ދުވަހެއް ދަނީ އިތުރު ވަމުންނެވެ. އެގޮތުން ފުލުހުން ދަނީ ހުށަހަޅާ މައްސަލަތައް ތަހުގީގުކޮށް، ބައެއް ތަކެއްޗާއި ވައްކަންކުރި މީހުން ވެސް އަތުލައިގަންނަމުންނެވެ.
