ޑްރަގު ކޯޓުގެ ޝަރީއަތްކުރާ މާލަމުގައި ހުރި ކުޑަދޮރެއް ހަލާކުކޮށްލައިގެން ވައްކަންކުރި މީހާ 15 ދުވަހަށް ބަންދުކުރަން ކްރިމިނަލް ކޯޓުން އަމުރުކޮށްފި އެވެ.
ޑްރަގު ކޯޓުން ވައްކަންކުރީ އޮގަސްޓު 27، ގަ އެވެ. މި މައްސަލާގައި ކޯޓު އަމުރެއްގެ ދަށުން ހައްޔަރުކޮށްފައިވަނީ ސ. ހިތަދޫ، ދެކުލައަރާގޭ، މުހައްމަދު އަސްލަމް، 32، އެވެ.
ފުލުހުން މިއަދު ބުނީ، އޭނާ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ބަންދަށް 15 ދުވަސް ޖަހާފައިވާ ކަމަށެވެ. އަދި މައްސަލަ ތަހުގީގުކުރަމުންދާ ކަމަށް ވެސް ފުލުހުން ބުންޏެވެ.
އެ މީހާ ކޯޓުން ވަގަށް ނަގާފައި ވަނީ ފައިސާތަކެއް ކަމަށާ އަދި ބައްތި ފޯނެއް ވެސް ނަގާފައިވާ ކަމަށް މި ނޫހާ ވާހަކަ ދައްކަމުން ޑްރަގް ކޯޓުގެ އެސިސްޓެންޓް ޑިރެކްޓަރު، ހިޝްމާ ހަސަން މީގެ ކުރިން ވިދާޅުވެފައިވެ އެވެ.
އެ ތަނުގެ މުވައްޒަފުންގެ ލޮކަރުތަކުގައި ހުރި އެއްޗެހި ނެގުމަށް ތަޅު ހަލާކުކޮށްލާފައިވާ ކަމަށާއި އޭގެ އިތުރުން ކޯޓަށް އިތުރު ގެއްލުމެއް ލިބިފައިނުވާ ކަމަށް އޭނާ ވިދާޅުވި އެވެ. އަދި ފުލުހުން އެތަނަށް ގޮސް ފޮރެންސިކްސް ނަގާފައިވާ ކަމަށާއި އެ މައްސަލަ ތަހުގީގުކުރަމުންދާ ކަމަށް ވެސް ހިޝްމާ ވިދާޅުވި އެވެ.
