އދ. ދިއްދޫ ކައުންސިލްގެ އައިޓީ އެންޑް ފައިނޭންސަލް ކޮންސާލްޓެންޓް، އެ ކައުންސިލްގެ ބޭންކް ސްޓޭޓްމަންޓް ފޯޖުކޮށް، އޮޑިޓަށް އޮޅުވާލަން މަަސައްކަތް ކޮށްފައިވާ ކަމަށް، އޮޑިޓަ ޖެނެރަލް އޮފީހުން އިއްޔެ އާންމު ކުރި ދިއްދޫ ކައުންސިލް އޮޑިޓް ރިޕޯޓުގައި ބުނެފި އެވެ.
އައިޓީ އެންޑް ފައިނޭންސަލް ކޮންސާލްޓެންޓާއި ގުޅޭ އޮޅުވާލުން
ދިއްދޫ ކައުންސިލްގެ 2022 ވަނަ އަހަރުގެ އޮޑިޓް ރިޕޯޓުގައި ބުނެފައިވާ ގޮތުގައި ވަޒީފާގެ އެއްބަސްވުމެއް ނެތި ދިއްދޫ ކައުންސިލުން ފައިސާ ދެމުން ގެންގޮސްފައިވާ އައިޓީ އެންޑް ފައިނޭންސަލް ކޮންސާލްޓެންޓަކީ، އެ ކައުންސިލް އިދާރާގެ ސެކެޓްރީ ޖެނެރަލް އާ މަސްލަހަތު ފުށުއަރާ ފަރާތެކެވެ. އަދަދަށް އެގިފައިވާ ގޮތުގައި ދިއްދޫ ކައުންސިލުން އައިޓީ އަދި ފައިނޭންސަލް ކޮންސާލްޓެންޓެއް ވަކި ވަކިން ހޯދުމަށް އިއުލާނު ކުރުމަށްފަހު، އެ ދެ މަގާމަށް ކުރިމަތިލި ހަމައެކަނި ފަރާތަށް، އެންޓިކޮރަޕްޝަން ކޮމިޝަނަންގެ ލަފައާ ހިލާފަށް، އެ ދެ މަގާމު އެއްކޮށްލުމަށްފަހު ވަޒީފާ ދީފައިވަނީ، ކައުންސިލްގެ ސެކެޓްރީ ޖެނެރަލްގެ ފިރިމީހާ އަށެވެ.
އޮޑިޓް ރިޕޯޓުގައި ބުނެފައިވާ ގޮތުގައި އައިޓީ އެންޑް ފައިނޭންސަލް ކޮންސާލްޓެންޓަކަށް ނަގާފައިވާ މީހާ، ވަގުތީ މުވައްޒަފެއްގެ ގޮތުގައި މަސައްކަތުގެ އެއްބަސްވުމެއް ނެތި، މިދިޔަ އަހަރުގެ ފެބްރުއަރީ މަހުން ފެށިގެން ދިއްދޫ ކައުންސިލުގައި މަސައްކަތް ކުރަމުން ގޮސްފައި ވަނީ މަހަކު 21،000ރ. ގެ އުޖޫރަ އަކަށެވެ. އެއީ އައިޓީ ކޮންސާލްޓެންޓުގެ އަގަށް މަހަކު 12،000ރ. އާއި ފައިނޭންސަލް ކޮންސާލްޓެންޓްގެ އަގަށް މަހަކު 9،000ރ. އެވެ.
އޮޑިޓް ރިޕޯޓުގައި ބުނެފައިވާ ގޮތުގައި އައިޓީ އެންޑް ފައިނޭންސަލް ކޮންސާލްޓެންޓު ވަނީ ދިއްދޫ ކައުންސިލްގެ 5،500ރ. އަމިއްލަ އެކައުންޓަށް ޖާމާކުރި ކަމަށް އެއްބަސްވެ، އަދި އެ ފައިސާ އަނބުރާ ކައުންސިލްގެ އެކައުންޓަަށް ޖަމާކުރިކަން ދެއްކުމަށް، ބޭންކް އެކައުންޓް ފޯޖުކޮށް، އޮޑިޓަށް ހުށައަޅައިފަ އެވެ. އޮޑިޓް ރިޕޯޓުގައި ބުނެފައިވާ ގޮތުގައި އެކަން ޔަގީންވެފައިވަނީ، ދިއްދޫ ކައުންސިލްގެ ބޭންކް ސްޓޭޓް މެންޓް އޮޑިޓް އޮފީހުން ބެންކް މެދުވެރިކޮށް ހޯދައި ބެލުމުންނެވެ.
ދިއްދޫ ކައުންސިލްގެ ސެކްރެޓަރީ ޖެނެރަލް
އޮޑިޓް ރިޕޯޓުގައި ބުނެފައިވާ ގޮތުގައި ދިއްދޫ ކައުންސިލްގެ ސެކްރެޓަރީ ޖެނެރަލް ސިވިލް ސާވިސްގެ ހުއްދަ ނެތި މިދިޔަ އަހަރުގެ ސެޕްޓެމްބަރު ފަހުކޮޅުން ފެށިގެން މަސައްކަތް ކުރަމުން ދަނީ ރިމޯޓްކޮށް އދ. އަތޮޅު ކައުންސިލް އިދާރާގަ އެވެ. އޮޑިޓް ރިޕޯޓުގައި ބުނެފައިވާ ގޮތުގައި ސެކެޓްރީ ޖެނެރަލްގެ ޒިންމާ އަކި ރިމޯޓްކޮށް އެކަށީގެންވާ ގޮތަކަށް ކުރިއަށް ގެންދެވޭނެ ކަމަކަށް ނުވާއިރު، އޭނާގެ ހާޒިރީގެ ކަންތައް ވެސް ރަނގަޅަށް ބަލަހައްޓައިފައެއް ނުވެ އެވެ.
ސެކެޓްރީ ޖެނެރަލް އާ ގުޅޭ އިތުރު މައްސްލައެއްގެ ގޮތުގައި ފާހަގަ ކޮށްފައިވަނީ، ވަކިފަރާތަކަަށް މަންފާއެއް ލިބޭ ގޮތަށް، ކައުންސިލުން 5،500ރ. އަށް ގެއެއް ކުއްޔަށްހިފައި، އެ ގެ މަހަކު އެއްހާސް ރުފިޔާ އަށް ސެކެޓްރީ ޖެނެރަލް ހުރުމަށް ދީފައިވުމެވެ. މިކަމުގެ ސަބަބުން، 20 މަސް ދުވަހުން 90،000ރ، ކައުންސިލަށް ގެއްލުންވެފައިވާ ކަމަށް އޮޑިޓް ރިޕޯޓުގައި ބުނެފައިވެ އެވެ.
ލޯކަލް ކައުންސިލް ތަކުގެ 2022 ވަނަ އަހަރުގެ ޕާފޯމިން އިންޑެކްސް އިން، އދ. އަތޮޅުން ދެވަނަ ރަށު ކައުންސިލަކަށް ދިއްދޫ ކައުންސިލް ހޮވިފައިވެ އެވެ. ނަމަވެސް އެކައުންސިލްގެ އޮޑިޓްގައި މާލީ ބަޔާންތައް ހުށަނޭޅުމުގެ މައްސަލަ އާއި ބިޑު ކޮމެޓީއެއް ނެތުމާއި އިވެލުއޭޓްނުކޮށް މަސައްކަތް ހަވާލުކުރުމާއި ހިސާބު ބެލެހެއްޓުމާއި ފައިސާ އާ ގުޅޭ މައްސަލަތައް ހުރިކަން ފާހަގަކޮށްފައިވެ އެވެ.
