މާލެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ނިމިދިޔަ އެމްޑީޕީ ސަރުކާރުން ހިންގި ބިންވެރިޔާ ސްކީމުގެ ދަށުން ދިން ގޯއްޗާއި ގެދޮރުވެރިޔާ ސްކީމުގެ ދަށުން ދިން ފްލެޓުތައް ހަވާލުކުރުން ލަސްވާ ކަމަށްބުނެ އެތަންތަން ލިބުނު މީހުން މުޒާހަރާއަށް ނުކުމެއްޖެ އެވެ.
ރާޅުގަނޑު ސަރަހައްދަށް އެއްވެ މުޒާހަރާގެ ބައިވެރިން ގޮވަމުން ދަނީ ގޯއްޗާއި ފުލެޓު ލިބުނު އެއްވެސް މީހަކު ބާކީ ނުކޮށް، އެ އެންމެންނަށް ވެސް ގޯއްޗާއި ފްލެޓު ހަވާލުކުރާނެ ކަމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ރިޔާސީ ވައުދާ އެއްގޮތަށް އެކަން ކުރެއްވުމަށެވެ. އަދި ގޯތި ދިނުމަށް ހިއްކަން ފަށާފައިވާ ސަރަހައްދުތައް އަވަހަށް ހިއްކާ ނިންމުމަށް ވެސް އެމީހުން ދަނީ ގޮވާލަމުންނެވެ.
ގޯއްޗާއި ފުލެޓު ލިބުނު މީހުން މުޒާހަރާއަށް ނުކުމެފައި މިވަނީ، ގޯތިތައް އަތުލުމަށް މަޖިލިސް މެންބަރުން ކުރާ މަސައްކަތް ހުއްޓުވުމަށް މުޒާހަރާއަށް ނުކުތުމަށް ގުޅީފަޅު އެސޯސިއޭޝަނުން ގޮވާލިތާ ތިން ދުވަސް ފަހުންނެވެ.
ގުޅީފަޅު އެސޯސިއޭޝަނުން އެގޮތަށް ގޮވާލީ، އޮގަސްޓު 19، ގައި އޮތް މަޖިލީހުގެ ޖަލްސާގައި ފަޅުން ގޯތި ދޭ ގާނޫނެއް ނެތް ކަމަށާއި އެ ވާހަކަ ދެއްކުމުގެ ބަދަލުގައި ފަޅުން ދީފައިވާ ގޯތިތައް އަތުލަން ޖެހޭ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ގޮވައިލުމާ ގުޅިގެންނެވެ. އޭނާއަކީ ސަރުކާރަށް ތާއީދުކުރާ އެމްޑީއޭގެ ނައިބު ރައީސް އެވެ.
ގޯއްޗާއި ފުލެޓު ދިނުން އަވަސް ކުރުމަށް ގޮވާލާ މިހާރު ކުރަމުންދާ މުޒާހަރާގެ ތެރެއިން -- ފޮޓޯ: މިރާޝް ނާޝިމް / އަދަދު
މީގެ އިތުރުން ވެސް، ފަޅުން ގޯތި ދިން ކަމަށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ލީޑާޝިޕްގެ ބޭފުޅުން ގެންދަވަނީ ތަކުރާރުކޮށް އެކި ތަންތަނުގައި ވިދާޅުވަމުންނެވެ. މާލެ ސަރަހައްދުން ގޯތި ދޫކުރި ގޮތަކީ މި ފަހުގެ ތާރީހެއްގައި ހިންގި އެންމެ ބޮޑު ހިޔާނާތް ކަމަށް ވެސް ޕީއެންސީން ވަނީ ބުނެފަ އެވެ.
ނަމަވެސް، މި ސަރުކާރުން ވެސް ހުޅުމާލެ ހިއްކާފައި އޮތް ސަރަހައްދުން ދީފައިހުރި ގޯތިތައް ހަވާލުކުރި އެވެ. ހަވާލުކުރުން ލަސްވަނީ ހިއްކާ ނުނިމި ހުރި، ހުޅުމާލެ ތިންވަނަ ފިޔަވައްސާއި، ގުޅީފަޅު އަދި ގިރާވަރުފަޅުން ދިން ގޯތި ތަކެވެ. އެތަންތަން ހިއްކުމުގެ މަސައްކަތް އޮތީ މަޑުޖެހިފަ އެވެ.
ގެދޮރުވެރިޔާ ސްކީމުގެ ދަށުން ފުލެޓުތައް ލިބުނު މީހުންގެ ލިސްޓެއް އެކުލަވާލި ނަމަވެސް، އެ ލިސްޓުގައި މައްސަލަތަކެއް ހުރި ކަމަށް ބުނެ އެންޓި ކޮރަޕްޝަން ކޮމިޝަނުން ދަނީ އެ މައްސަލަ ބަލަމުންނެވެ. ނަމަވެސް އެކަންކަން ނިންމުމަށްފަހު އޮކްޓޯބަރު ފްލެޓުތައް ދެވޭނެ ކަމަށް ހައުސިން މިނިސްޓްރީން މިފަހުން ވަނީ ބުނެފަ އެވެ.
ބިންވެރިޔާ ސްކީމުގެ ދަށުން މިދިޔަ ސަރުކާރުގައި މާލެ ރައްޔިތުންނަށް 9،003 ގޯތި ދޫކުރި އެވެ. ބިންވެރިޔާ ސްކީމުން ދޫކުރި ގޯތިތައް ހުންނަނީ ހުޅުމާލޭ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން ދޫކުރާ 1351 ގޯއްޗާއި ގުޅީފަޅުން ދޫކުރާ 2219 ގޯއްޗާއި ގިރާވަރުފަޅުން ދޫކުރާ 5433 ގޯއްޗެވެ.
