ށ. ފުނަދޫގައި ސިހުރު ހެދި ކަމުގެ ތުހުމަތުގައި ދެ މީހަކަށް ދައުވާ ކުރުމަށް ޕްރޮސެކިއުޓަ ޖެނެރަލްގެ އޮފީހަށް ފޮނުވާފައިވާ ކަމަށް ދިވެހި ފުލުހުންގެ ހިދުމަތުން އިއްޔެ ބުނެފި އެވެ.
ފުލުހުންނާ ސުވާލުކުރުމުން "އަދަދު" ނޫހަށް ފޮނުވި ޓެކްސްޓް މެސެޖެއްގައިވާ ގޮތުން އެ މައްސަލައިގެ ތުހުމަތުގައި ދައުވާކުރަން ފޮނުވީ 60 އަހަރުގެ މީހަކާއި 36 އަހަރުގެ މީހެއްގެ މައްޗަށެވެ.
މި މައްސަލައިގެ ތުހުމަތުގައި 60 އަހަރުގެ މީހާ ހައްޔަރުކޮށް ބަންދުގައި ދޮޅު މަހެއްހާ ދުވަހު ބަހައްޓާފައިވެ އެވެ. އެ މީހާ ބަންދުން ދޫކޮށްލީ މިދިޔަ ޖޫން މަހު އެވެ.
ޕްރޮސެކިއުޓަ ޖެނެރަލް، ޕީޖީގެ އޮފީހަށް އެ މައްސަލަ ފޮނުވީ މިދިޔަ ޖުލައި މަހުގެ ދެވަނަ ދުވަހު ކަމަށް ވެސް ފުލުހުންގެ އިއްޔެ ފޮނުވި މެސެޖުގައިވެ އެވެ.
ނަމަވެސް ޕީޖީ އޮފީހުގައި މައްސަލަ ގޮސްފައިވާ ހިސާބެއް އަދި ސާފެއް ނުވެ އެވެ.
ފުނަދޫން ސިހުރު ހެދުމަށް ކަމަށް ބެލެވޭ ސާމާނު ފެނުމުން، އެ ކަމެއް ކުރީ ފުނަދޫ ދާއިރާގެ މަޖިލިސް މެންބަރު މުހައްމަދު މަމްދޫހު (މަންޑޭ) އަށް އަމާޒުކޮށް ކަމަށް ބުނެ އޭނާގެ ސަޕޯޓަރުން ރަށުގައި ނުރުހުން ފާޅުކޮށް އަޑު އުފުލާފައި ވެސް ވެ އެވެ.
