ފެނަކަ ކޯޕަރޭޝަންގެ މެނޭޖިން ޑިރެކްޓަރު، މުހައްމަދު އަފީފް ހުސެއިންގެ މައްޗަށް ދައުވާ ނުއުފުލީ އޭނާ ހިންގި އަމަލުގެ ސަބަބުން ދައުލަތަށް ގެއްލުމެއްވެފައި ނުވާތީ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނިއިރު، ކުށެއް ކުރަން އުޅުމަކީ ވެސް ދިވެހިރާއްޖޭގެ ގާނޫނުލްއުގޫބާތުގައި ދައުވާ އުފުލޭ ކުށެއްކަމަށް ގާނޫނީ މާހިރުން ބުނެފި އެވެ.
ޕީޖީ އޮފީހުން ބުނީ އޭސީސީން ތަހުގީގު ކުރި މައްސަލައިގައި ހުރި ހެކިތަކަށް ބަލާއިރު، މުހައްމަދު އަފީފްގެ އަނބިކަނބަލުންގެ ކާރެއް ހައުސިން މިނިސްޓްރީގެ ބެލުމުގެ ދަށުގައި ހުންނަ ގަރާޖަކަށް ރެޖިސްޓްރީ ކުރުމަށް ސިޓީއެއް ތައްޔާރުކުރިކަން އެނގޭ ކަމަށެވެ.
އެހެންނަމަވެސް، އެ ސިޓީގައި އެދިފައިވާ ގޮތަށް، އެ ކާރު އެ ގަރާޖަށް މާލެ ސިޓީ ކައުންސިލުން ރެޖިސްޓްރީ ކޮށްދީފައި ނުވާތީ އެ އަމަލުގެ ސަބަބުން ދައުލަތަށް އެއްވެސް ގެއްލުމެއް އަދި މުހައްމަދު އަފީފަށް އެއްވެސް ފައިދާއެއް ލިބިފައި ނުވާ ކަމަށް އެެޮފީހުގެ ތަރުޖަމާނު އަހުމަދު ޝަފީއު ވިދާޅުވި އެވެ.
ޕީޖީ އޮފީހުން އެހެން ބުނި ނަމަވެސް، މި ނޫހާ ވާހަކަ ދެއްކި ވަކީލުން ބުނީ ހައުސިން މިނިސްޓްރީގެ ގަރާޖަކަށް އޭނާގެ އަނބިކަނބަލުންގެ އަމިއްލަ ކާރެއް ރެޖިސްޓްރީ ކުރުމަށް ސިޓީއެއް ތައްޔާރުކުރި ހިސާބުން އެ ވަނީ ކޮރަޕްޝަންގެ އަމަލެއް ހިންގާފައި ކަމަށެވެ.
"ނުހައްގުން ލެޓާ ދޫކުރި ހިސާބުން އެއޮތީ ކޮރަޕްޝަންގެ އަމަލު ފުރިހަމަވެފައި. ފަހުން ފައިދާވިޔަސް ނުވިޔަސް،" ނަން ނުޖެހުމަށް ޝަރުތުކޮށް މި ނޫހަށް މައުލޫމާތު ދިން ގާނޫނީ ވަކީލަކު ބުންޏެވެ.
މިފަދަ ކަންކަމުގައި ސީދާ ކޮރަޕްޝަންގެ އަމަލު ފުރހަމަ ނުވާ ކަމަށް ޕީޖީއަށް ފެންނަ ހާލަތުގައި ވެސް، ކުށެއް ކުރަން އުޅުނުކަމުގެ ދައުވާ އަފީފްގެ މައްޗަށް އުފުލޭނެ ކަމަށް އެ ވަކީލު ބުންޏެވެ.
ފެނަކަ އެމްޑީއަށް ދައުވާނުކުރީ އޭނާ ހިންގި އަމަލުގެ ސަބަބުން ދައުލަތަށް ގެއްލުމެއް ލިބިފައި ނުވާތީ: ޕީޖީ އޮފީސް
ފެނަކަ އެމްޑީ މުހައްމަދު އަފީފްގެ މައްޗަށް ތުހުމަތުކުރެވޭ ކޮރަޕްޝަންގެ މައްސަލައިގައި ދައުވާނުކުރަން ޕީޖީ އޮފީހުން ނިންމީ، އެ އަމަލުގެ ސަބަބުން ދައުލަތަށް ގެއްލުމެއް އަދި އޭނާއަށް ނާޖާއިޒު ފައިދާއެއް ލިބިފައި ނުވާތީއެވެ.
ކުށެއް ކުރަން އުޅުމުގެ ކުށް ބަޔާން ކޮށްފައި ވަނީ ދިވެހިރާއްޖޭގެ ގާނޫނުލްއުގޫބާތުގެ 80 ވަނަ މާއްދާގަ އެވެ.
އެ މާއްދާގެ ހ. ގައި ބަޔާން ކޮށްފައި އޮންނަނީ ކުށެއް ކުރުމަށް ކުށުގެ ނިޔަތް އޮތުމާއި ކުށުގެ އަމަލު ފުރިހަމަ ކުރުމަށްޓަކައި އެކަށީގެންވާ ފިޔަވަޅެއް އަޅައިފިކަން ރަމްޒުކޮށްދޭ ފަދަ އަމަލެއް ގަސްދުގައި ކުރުން އަދި އެ އަމަލު ކުރީ ކުށް ކުރުމަށް ބޭނުންވާ ހާލަތު ދެމިއޮތްކަމުގައި ގަބޫލުކޮށްގެން ކަމުގައިވާ ނަމަ، އެއީ ކުށެއް ކުރަން އުޅުމުގެ އަމަލެއް ކަމަށެވެ.
ކުށެއް ކުރަން އުޅުމުގެ ކުށަށް ވާނެ އިތުރު ހާލަތްތައް ވެސް އެ މާއްދާގެ ށ. ދަށުން ބަޔާން ކޮށްފައިވެ އެވެ.
"ކުށް ފުރިހަމަ ނުވާ ކަމަށް ޕީޖީ އިން ދެކޭ ނަމަ ޕީނަލް ކޯޑުގެ 80 ވަނަ މާއްދާއާ ހަވާލާދީ ކުށެއް ކުރަން އުޅުމުގެ ދައުވާ ކުރެވޭނެ،" މި ނޫހަށް މައުލޫމާތު ދިން ގާނޫނީ ވަކީލު ވިދާޅުވި އެވެ.
އަފީފްއާ ދެކޮޅަށް ހެކި ހުރި ނަމަވެސް، އޭނާގެ މައްޗަށް ދައުވާ ނުއުފުލަން ޕީޖީ އޮފީހުން ނިންމުމުން އާންމުން ވެސް ދަނީ އެކަމަށް ވަރަށް ބޮޑަށް ފާޑުކިޔަމުންނެވެ.
އަފީފްގެ މައްޗަށް ތުހުމަތު ކުރެވޭ ކޮރަޕްޝަންގެ މައްސަލައަކީ މީގެ ފަސް އަހަރު ކުރިން އޭސީސީއަށް ހުށަހަޅާފައި އޮތް މައްސަލައެކެވެ.
މި މައްސަލަ އޭސީސީއަށް ހުށަހެޅީ މާލެ ސިޓީގެ ކުރީގެ ކައުންސިލަރު، ސައިފް ފާތިހެވެ. އޭނާ ހުށަހެޅީ މިނިސްޓްރީއެއްގެ ގަރާޖަކަށް އަފީފްގެ ޕްރައިވެޓް ވެހިކަލެއް ރެޖިސްޓްރީ ކުރި މައްސަލައެކެވެ. އޭރު އަފީފް ހުންނެވީ ޕަބްލިކް ވޯކްސްގެ ޑިރެކްޓާ ޖެނެރަލްގެ މަގާމުގަ އެވެ. ސައިފު ވެސް މަސައްކަތް ކުރަމުން ދިޔައީ އެ މިނިސްޓްރީގަ އެވެ.
އެ މައްސަލަ އޭސީސީން ތަހުގީގު ކުރުމަށްފަހު، ޕީޖީއަށް ފޮނުވާފައި ވަނީ އެ މައްސަލައިގައި ދައުވާ ކުރެވޭ މިންވަރަށް ހެކި ހުރި ކަމަށް ބެލެވޭތީ އެވެ.
