މުޅި ދުނިޔޭގައި 2020 ވަނަ އަހަރު ފެތުރެން ފެށި ކޮވިޑް-19 ގެ ދުވަސްވަރު ސަރުކާރުގެ މައި ހޮސްޕިޓަލް, އައިޖީއެމްއެޗުގެ ލެބޯޓަރީގައި ބޭނުންކުރި "ރީއެޖެންޓްސް" އިން އަމިއްލަ މަސްލަހަތު ހިމެނޭ ކުންފުންޏަކަށް ނާޖާއިޒު މަންފާ ހޯދައިދިނުމާއި އަމިއްލައަށް ނާޖާއިޒު މަންފާ ހޯދުމުގެ މައްސަލާގައި އެ ހޮސްޕިޓަލުގެ ކުރީގެ ތިން ވެރިޔެއްގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް އެންޓި ކޮރަޕްޝަން ކޮމިޝަން (އޭސީސީ) އިން ފޮނުވައިފި އެވެ.
މި މައްސަލާގައި ދައުވާ ކޮށްދޭން އޭސީސީން އެދުނީ އައިޖީއެމްއެޗުގެ ކުރީގެ ސީއީއޯ އިބްރާހިމް ސަލީމް (ބަންދު ސަލީމް) އާއި އައިޖީއެމްއެޗުގެ ލެބޯޓަރީގެ ކުރީގެ ހެޑް ޑރ. މިލްޒާ އަބްދުލްމުހުސިން އަދި އެ ހޮސްޕިޓަލުގެ ޕްރޮކިއުމަންޓް ކޮމިޓީގެ ޗެއާމަނަކަށް އޭރު ހުންނެވި ޑރ. އަލީ އަބްދުﷲ ލަތީފުގެ މައްޗަށެވެ.
އޭސީސީން އެދިފައި ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާ އެ ތިން މީހުންގެ މައްޗަށް ކޮށްދިނުމަށެވެ.
އޭގެ ތެރެއިން އަލީ ލަތީފު ވަނީ އައިޖީއެމްއެޗުގެ މެޑިކަލް އެގްޒެކެޓިވް ކޮމިޓީގެ މެންބަރުކަމާއި، ޓެކްނިކަލް އެޑްވައިޒަރީ ކޮމިޓީގެ މެންބަރު އަދި ކޮވިޑާއި ގުޅިގެން އެކުލަވާލި ޓެކްނިކަލް އެޑްވައިޒަރީ ގްރޫޕްގެ މެންބަރުކަން ވެސް ކުރައްވާފަ އެވެ.
އޭސީސީން ތަހުގީގުން ހާމަވެފައިވާ ގޮތުގައި މި ތިން މީހުން ނާޖާއިޒު މަންފާ ހޯދައިދީފައި ވަނީ އާރުއެމްއެލްއެސް ލެބް ސާވިސަސް އަށެވެ. އެ ކުންފުނި މެދުވެރިކޮށް އަލީ ލަތީފު މަނީ ލޯންޑާ ކޮށްފައިވާ ކަމަށް ތުހުމަތު ކުރެވޭތީ އެ މައްސަލަ ބަލަން ފުލުހުންނަށް ވެސް ވަނީ ފޮނުވާފަ އެވެ.
އިކޮނޮމިކް މިނިސްޓްރީގެ ބިޒްނަސް ޕޯޓަލްއިން އެނގޭ ގޮތުގައި އެ ލެބޯޓަރީ ހިންގަނީ ޕަޔޮނިއާ މޯލްޑިވްސް ނަމަކަށް ކިޔާ ކުންފުންޏެއްގެ ދަށުންނެވެ. އެ ކުންފުނީގެ ހިއްސާދާރުންނަށް ތިބީ އިކުލީލް ޝަރީފް އަދި އިބްރާހިމް ސައީދު މުހައްމަދު އެވެ.
އެއީ އޮކްޓޯބަރު 2020, ގައި އުފެއްދި ކުންފުންޏެކެވެ. ރާއްޖޭން ކޮވިޑު ފެނުނީ މާޗު 2020, ގަ އެވެ. އެއަށްފަހު މުޅި ރާއްޖޭގައި ކޮވިޑު ޓެސްޓް ކުރެވޭނެ ގޮތްތައް ފަހިކޮށް ޕީސީއާރު ޓެސްޓްތައް ހެދުން އާންމުވި އެވެ.
ޓޫރިޒަމް މިނިސްޓްރީން އެޕްރީލް 2021, ގައި ރިސޯޓު ތަރައްގީ ކުރުމަށް ހުޅުވާލި 16 ރަށުގެ ތެރެއިން އެއް ރަށް ޕަޔޮނިއާ މޯލްޑިވްސްއަށް ވަނީ ދޫކޮށްފަ އެވެ. އެއީ ގދ. ކަނޑަހަލަގަލާ އެވެ.
އެޕްރީލް 2022, ގައި ޓޫރިޒަމް މިނިސްޓްރީން ހާމަކުރި ގޮތުގައި ލީސް އެކުއިޒިޝަން ކޮސްޓުގެ ގޮތުގައި 2،800،000.00 ޑޮލަރު، ޓޫރިޒަމް ޓްރެއިނިން ފަންޑަށް 150،000.00 ޑޮލަރު އެ ކުންފުނިން ދެއްކުމުން ރަށް އޮތީ ހަވާލުކޮށްފަ އެވެ. ޖުމުލަ 7.4 ހެކްޓަރުގެ މި ރަށް ތަރައްގީ ކުރުމުގެ މަސައްކަތް ކުރިއަށް ގޮސްފައިވާ ހިސާބެއް ނޭނގެ އެވެ.
