ވަޒީފާއާ ބެހޭ ގާނޫނު އިސްލާހުކުރިޔަސް ކޯޓާ އާއި އެހެނިހެން ފީތައް ބޮޑުނުކުރާނެ ކަމަށާއި އަދި ބޮޑުކުރުމުގެ ވިސްނުމެއް ވެސް ނެތް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ވަޒީފާދޭ ފަރާތްތަކާއި، "އެކްސްޕެޓް ސިސްޓަމް" ބޭނުންކުރައްވާ ފަރާތްތަކާ ބައްދަލުކުރުމަށްޓަކާއި މިއަދު އިސްކަންދަރު ކޮށީގައި ބޭއްވި ބައްދަލުވުމެއްގައި މިނިސްޓަރު އިހުސާން ވިދާޅުވީ މިހާރު ނަގަމުންދާ އެއްވެސް ފީ އެއް ބޮޑު ނުކުރާނެ ކަމަށެވެ.
"ކޯޓާ ފީ އިތުރުކުރުމުގެ އެއްވެސް ވިސްނުމެއް ނެތް. ވިސާ ފީ އިތުރުކުރުމުގެ ވެސް ވިސްނުމެއް ނެތް. އިންޝުއަރެންސް ފީ ބޮޑެއް ނުވާނެ. ބޮޑުކުރަން ސަރުކާރުގެ ވިސްނުމެއް ނެތް." މިނިސްޓަރު އިހުސާން ވިދާލުވި އެވެ.
މިނިސްޓަރު މިހެން ވިދާޅުވިއިރު ވަޒީފާއާ ބެހޭ ގާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން އިއްޔެ ފާސްކުރީ ސަރުކާރުން ހުށަހަޅައިގެންނެވެ. އެ ބިލުގައި އޮތީ ކޮންމެ ތިން އަހަރަކުން ކޯޓާ ފީ އާއި ވާކް ޕާމިޓް ފީ މުރާޖައާކުރުމުގެ ބާރު ސީދާ ހޯމް މިނިސްޓަރަށް ނޫނީ އެ އިރެއްގައި އެ ޒިންމާ މަތިކުރެވިފައިވާ މިނިސްޓަރަށް ލިބޭ ގޮތަށެވެ.
ހޯމް މިނިސްޓްރީން ބޭއްވި ބައްދަލުވުމުގައި ކޯޓާ ފީއާ ގުޅޭ ގޮތުން ހޯމް މިނިސްޓަރު ފާހަގަކުރެއްވި އަނެއް ކަމަކީ ކޯޓާ ފީ ބަލްކުކޮށް ދެއްކޭނެ ގޮތް ފަހިކޮށްދިނުމެވެ. ކުރިން މިކަން ކުރަން ޖެހެނީ ވަކިވަކިން ވިޔަސް މިއަދުން ފެށިގެން އެއް ފަހަރާ ފައިސާ ދެއްކޭނެ އިންތިޒާމު ހަމަޖެހިފައިވާ ކަމަށް އިހުސާން ވިދާޅުވި އެވެ.
ބިދޭސީން ގެންގުޅޭ ވިޔަފާރިވެރިންނާއި އާންމުނާ މިނިސްޓްރީން ބައްދަލުކުރީ ބިދޭސީ މަސައްކަތްތެރިންނާ ގުޅޭ ގޮތުން ސަރުކާރުގެ ސިޔާސަތު ސާފުކޮށްދިނުމަށާއި އެ މައްސަލައިގައި ހުރި ކަންބޮޑުވުންތައް އަޑުއެހުމަށެވެ. އެ ބައްދަލުވުމުގައި ވިޔަފާރިވެރިންނާއި "އެކްސްޕެޓް ސިސްޓަމް" ބޭނުންކުރާ ގިނަ ބަޔަކު ބައިވެރިވި އެވެ.
ބިދޭސީ މަސައްކަތްތެރިންނާ ގުޅޭ ގޮތުން ސަރުކާރުގެ މިހާރުގެ ސިޔާސަތަކީ ގަވާއިދާ ހިލާފަށް އުޅޭ މީހުންނާއި ވިޔަފާރި ކުރާ މީހުންނާއި ކުށުގެ ވެށީގައި އުޅޭ ހުރިހާ އެންމެން އިތުރު ފުރުސަތެއް ނުދީ ފޮނުވާލުމެވެ.
އެގޮތުން ހޯމް މިނިސްޓްރީގެ ބެލުމުގެ ދަށުން އިމިގްރޭޝަނާއި ފުލުހުން ގުޅިގެން ހާއްސަ އޮޕަރޭޝަންތަކެއް ދަނީ ހިންގަމުންނެވެ. މި އޮޕަރޭޝަންތަކުގެ ތެރެއިން އާންމުންގެ ސަމާލުކަން ބޯޑަށް ލިބެމުން އަންނަނީ ނުތާހިރު ތަންތަނުގައި ކާބޯތަކެތި ތައްޔާރުކޮށްގެން އޭގެން ވިޔަފާރިކުރާ މައްސަލަތަކަށެވެ.
