ބިދޭސީ މަސައްކަތްތެރިން ގެންގުޅޭ ފަރާތްތަކަށް ހާއްސަކޮށް ހޯމްލޭންޑް ސެކިއުރިޓީ މިނިސްޓަރު އަންނަ އަންގާރަ ދުވަހަށް އޮންލައިން ބައްދަލުވުމެއް ބޭއްވުމަށް ހަމަޖައްސައިފި އެވެ.
ހޯމް މިނިސްޓްރީން މިރޭ ނެރުނު އިއުލާނެއްގައިވާ ގޮތުން ބިދޭސީ މަސައްކަތްތެރިން ގެންގުޅޭ ފަރާތްތަކާއި ބިދޭސީ މަސައްކަތްތެރިންގެ ހުއްދަތައް ދޫކުރުމަށް އޮންނަ "އެކްސްޕަޓް ސިސްޓަމް" ބޭނުންކުރާ އެހެން ފަރާތްތަކާ ވެސް މިނިސްޓަރު ބައްދަލު ކުރުމަށް ބޭނުންވާ ކަމަށެވެ.
އަންނަ އަންގާރަ ދުވަހު ބާއްވަން ހަމަޖެހިފައިވާ އެ އޮންލައިން ބައްދަލުވުމަށް ބައިވެރިވުމަށް ކުރިއާލައި އޮންލައިން ފޯމެއް މެދުވެރިކޮށް ނަން ނޯޓު ކުރުމަށް ހޯމް މިނިސްޓްރީން އެދެ އެވެ. އަދި އަންނަ ހޯމަ ދުވަހުގެ މެންދުރު 12:00 ގެ ކުރިން ނަން ނޯޓު ކުރަން ވާނެ ކަމަށް އިއުލާނުގައިވެ އެވެ.
ބިދޭސީ މަސައްކަތްތެރިން ގެންގުޅޭ ފަރާތްތަކާ އެކު ބައްދަލުވުމަށް ހޯމް މިނިސްޓަރު ނިންމަވާފައި މި ވަނީ، ގަވާއިދާ ހިލާފަށް އެއްވެސް ލިޔެކިޔުމެއް ނެތި އުޅޭ ބިދޭސީންގެ މައްސަލަ އާއި ބިދޭސީންގެ ފީ ނުދައްކާ ވިޔަފާރިތަކުގެ މައްސަލަ ހައްލު ކުރުމަށް ސަރުކާރުން "ހަރުކަށި" ފިޔަވަޅުތަކެއް އަޅަން ފަށާފައި ވަނިކޮށެވެ.
ބިދޭސީންގެ ފީ ނުދައްކާ ވިޔަފާރިތައް ބޮޑު އަދަދަކުން ޖޫރިމަނާ ކުރެވޭ ގޮތަށް ވަޒީފާގެ ގާނޫނަށް ސަރުކާރުން އިސްލާހެއް ވެސް ހުށަހަޅާފައިވެ އެވެ.
