މިހާރު ކުރިއަށްދާ މާކަންޓައިލް އޮފީސް/ކޮމްޕެނީ ވޮލީބޯލް ޗެމްޕިއަންޝިޕް 2024 ގެ ލީގު ބުރުގެ ހުރިހާ މެޗެއް ކާމިޔާބުކޮށް، އެންމެ ފަހުގެ ޗެމްޕިއަން، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފައިނަލުގެ ސީދާ ޖާގަ ހޯދައިފި އެވެ.
އިއްޔެ ހަވީރު މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ މައްޗަށް އެޗްޑީސީން ކުރިހޯދީ ސީދާ ތިން ސެޓުންނެވެ. މި މެޗުގެ ސެޓުތައް ދިޔައީ, 18-25, 17-25 އަދި 28-30 އިންނެވެ.
މި މެޗުގެ ފުރަތަމަ ދެ ސެޓުގައި އެމްއެންޑީއެފް ޓީމުގެ ފަރާތުން އާދައިގެ ކުޅުމެއް ފެނިގެންދިޔައިރު, އޭގެ ފައިދާ އެޗްޑީސީ އިން ވަނީ ނަގާ ފަސޭހަކަމާ އެކު, މި ދެ ސެޓު 25-18 އަދި 25-17 އިން ގެންގޮސްފަ އެވެ.
އެކަމަކު، ތިން ވަނަ ސެޓުގައި އެމްއެންޑީއެފް އިން ވަނީ ކުޅުން ރަނގަޅުކޮށް އެޗްޑީސީ އަށް ރަނގަޅު ފައިޓެއް ދީފަ އެވެ. އެހެންވެ، ފުރަތަމަ ދެ ސެޓުގައި ޑޮމިނޭޓްކޮށްގެން ކުޅުން އެޗްޑީސީ އަށް ތިން ވަނަ ސެޓުގައި ބޮޑު ލީޑެއްގައި އޮވެގެން ކުޅެވޭ ގޮތް ވަނީ ނުވެފަ އެވެ. އެކަމަކު، ސެޓުގެ ފަހު ވަގުތުކޮޅު އެމްއެންޑީއެފް ޓީމަށް ހެދުނު ގޯސްތަކުގެ ފައިދާ ނަގައި ތިން ވަނަ ސެޓު އެޗްޑީސީ އިން ގެންދިޔައީ 30-28 އިންނެވެ.
ފަސް ޓީމު ވާދަކުރާ މުބާރާތުގެ ލީގު ބުރުގައި، އެޗްޑީސީން މި ވަނީ ކުުޅުނު ހަތަރު މެޗުން މޮޅުވެ، ފައިނަލުގެ ސީދާ ޖާގަ ހޯދައިފަ އެވެ. ފައިނަލުގެ އަނެއް ޖާގަ ލިބޭނީ، ލީގު ބުރުގެ ދެ ވަނަ އާއި ތިން ވަނަ ބައްދަލުކުރާ ސެމީ ފައިނަލުން މޮޅުވާ ޓީމަކަށެވެ.
މުބާރާތުގައި، ރޭ ވެމްކޯ އިން ވަނީ ސްޓެލްކޯގެ މައްޗަށް ސީދާ ތިން ސެޓުން ކުރިހޯދައިފަ އެވެ. މި މެޗުގެ ސެޓުތައް ދިޔައީ, 20-25, 14-25 އަދި 23-25 އިންނެވެ.
މި މެޗުގެ ފުރަތަމަ ސެޓުގައި ވެމްކޯގެ ތަފާތަކަށްވީ އެ ޓީމުގައި ތިބި ތަޖުރިބާކާރު ކުޅުންތެރިންނެވެ. އެ ގޮތުން މި ސެޓުގެ ފަހު ކޮޅު ވެމްކޯ ޓީމުގެ އަލީ ހުޒާމްގެ ފަރާތުން މޮޅު ކުޅުމެއް ފެނިގެންދިޔައިރު, މި ސެޓު ވެމްކޯ އިން ގެންދިޔައީ 20-25 އިންނެވެ.
ދެ ވަނަ ސެޓުގައި ސްޓްލެކޯގެ ފަރާތުން ފެނިގެންދިޔައީ ދަށް ކުޅުމެކެވެ. އޭގެ ފައިދާ ނަގާ މި ސެޓު ވެމްކޯ އިން ވަނީ ފަސޭހަކަމާ އެކު, 14-25 އިން ކާމިޔާބު ކޮށްފަ އެވެ. ތިންވަނަ ސެޓުގައި ސްޓެލްކޯ އިން ރަނގަޅު ފައިޓެއްދީ ސެޓު ނެގޭތޯ މަސައްކަތްކުރި ނަމަވެސް ފަހު ވަގުތު ހެދުނު ގޯސްތަކުގެ ފައިދާ ވެމްކޯ އިން ނަގާ މި ސެޓު 23-25 އިން ކާމިޔާބުކުރި އެވެ.
