ބިދޭސީ މަސައްކަތްތެރިންގެ ކޯޓާ ފީ އާއި ވާކް ޕާމިޓް ފީގެ ގޮތުގައި ދައުލަތަށް ދައްކަންޖެހޭ ފައިސާ ނުދައްކާ ހުރި ކުންފުނިތަކުގެ ލިސްޓު އާންމުކުރި ފަހުން 182.9 މިލިއަން ރުފިޔާ އެ ކުންފުނިތަކުން ދައްކާފައިވާ ކަމަށް ހޯމްލޭންޑު ސެކިއުރިޓީން ބުނެފި އެވެ.
އެ މިނިސްޓްރީން ރޭ އެކްސްގައި ކުރި ޕޯސްޓުގައި ބުނެފައި ވަނީ "ދައުލަތަށް ލިބެންޖެހޭ ފައިސާ ހޯދުމަށް އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހާއްސަ އެންގެވުމާއި އެއްގޮތަށް ކުރެވެމުންދާ މަސައްކަތުގެ ތެރެއިން އެކްސްޕެކްޓު ސިސްޓަމްގެ ހިދުމަތް ހޯދާ ވަޒީފާ ދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން، ފައިސާ ނުދައްކާ ފަރާތްތަކުގެ ވަނަވަރު އާންމުކުރި ތާރީހުން ފެށިގެން މިއަދާ ހަމައަށް 182،954،572ރ. ދައުލަތަށް ރިކަވާ ކުރެވިފައިވެ އެވެ،" ރޭ ކުރި ޕޯސްޓުގައި ބުނެފައިވެ އެވެ.
ޖުލައި 24 ގައި އިއުލާނުކުރި ލިސްޓުގައި 1026 ކުންފުންޏެއްގެ ނަން ހިމަނާފައިވެ އެވެ. އެއީ ބިދޭސީންގެ ކޯޓާ ފީ އާއި ވާކް ޕާމިޓު އަދި ޖޫރިމަނާގެ ގޮތުގައި ދައްކަންޖެހޭ ފައިސާ 100،000ރ. އަށް ވުރެ އިތުރުވެފައިވާ ކުންފުނިތަކެވެ.
ޑރ. މުއިއްޒުގެ ހާއްސަ އެންގެވުމަށް މި ފައިސާ ހޯދަން މަސައްކަތް ކުރާއިރު، ފައިސާ ނުދައްކައިގެން އާންމުކުރި ލިސްޓުގައި ސަރުކާރުގެ ވެރިންނާއި މަޖިލީހުގެ މެންބަރުންގެ ކުންފުނިތައް ވެސް ހިމެނެ އެވެ.
