މިހާރު ކުރިއަށްދާ މާކަންޓައިލް އޮފީސް/ކޮމްޕެނީ ވޮލީބޯލް ޗެމްޕިއަންޝިޕް 2024 ގައި މޯލްޑިވްސް ޕޮލިސް ސާވިސް އަށް ނިސްބަތްވާ ޕޮލްކޯ އިން ސްޓެލްކޯގެ މައްޗަށް 3-2 ސެޓުން ކުރި ހޯދައިފި އެވެ.
ޕޮލްކޯ އިން މި މުބާރާތުގެ ފުރަތަމަ މެޗުގައި އެންމެ ފަހުގެ ޗެމްޕިއަން އެޗްޑީސީ އަތުން 3-1 ސެޓުން ވަނީ ބަލިވެފަ އެވެ. އަނެއްކޮޅުން ސްޓެލްކޯ އިން ފުރަތަމަ މެޗުގައި އެމްއެންޑީއެފް އަތުން 3-2 ސެޓުން ވަނީ ބަލިވެފަ އެވެ.
ރޭ ކުޅުނު މެޗު ޕޮލްކޯ އިން ކާމިޔާބުކުރީ 3-2 ސެޓުންނެވެ. މި މެޗުގެ ސެޓުތައް ދިޔައީ, 25-20, 24-26, 21-25, 30-28 އަދި 10-15 އިންނެވެ.
މި މެޗުގެ ފުރަތަމަ ސެޓުގައި ސްޓެލްކޯ އިން ވަނީ އިތުބާރާއެކު ކުޅެފަ އެވެ. އަދި މެޗުގެ ފަހުކޮޅު ޕޮލްކޯ ޓީމުގެ ކުޅުން ދަށްވުމުގެ ފައިދާ ނަގާ ސްޓެލްކޯ އިން މި ސެޓު ގެންދިޔައީ, 25-20 އިންނެވެ.
އެކަމަކު ދެވަނަ ސެޓުގައި, ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު, މި ސެޓުގައި އެއްވެސް ޓީމަކަށް ބޮޑު ލީޑެއް ނަގައިގެން ކުޅެވޭ ގޮތެއް ނުވި އެވެ. މި ސެޓު ޕޮލްކޯ އިން ގެންދިޔައީ ފަހު ވަގުތު ހޯދި ދެ ޕޮއިންޓުން 24-26 އިންނެވެ.
މެޗުގެ ތިންވަނަ ސެޓުގައި ސްޓެލްކޯގެ ފަރާތުން ދަށް ކުޅުމެއް ފެނިގެންދިޔައިރު, މި ސެޓު ޕޮލްކޯ އިން ވަނީ 25-21 އިން ގެންގޮސްފަ އެވެ. އެކަމަކު ހަތަރުވަނަ ސެޓުގައި ރަނގަޅު ފައިޓެއްދީ ސްޓްލްކޯ އިން ވަނީ 30-28 އިން ސެޓު ކާމިޔާބު ކޮށްފަ އެވެ.
ނަމަވެސް ހަތަރުވަނަ ސެޓުގައި ސްޓެލްކޯއިން ދެއްކި ކުޅުން ފަސްވަނަ ސެޓުގައި އެ ޓީމަށް ތަކުރާރުނުކުރެވި, ޕޮލްކޯ އިން ވަނީ ފަހު ސެޓު 10-15 އިން ކާމިޔާބު ކޮށްފަ އެވެ.
މި މުބާރާތުގައި މިއަދު ދެ މެޗު ކުޅޭނެ އެވެ. ފުރަތަމަ މެޗުގައި މިއަދު ހަވީރު, އެޗްޑީސީ އިން ނުކުންނާނީ ވެމްކޯ އާ ދެކޮޅަށެވެ. އަދި މިރޭ, އެމްއެންޑީއެފް އިން ނުކުންނާނީ ޕޮލްކޯ އާ ދެކޮޅަށެވެ.
