ރިޔާސީ ކެމްޕޭނުގައި ޕީއެންސީން ވައުދުވި ބޯހިޔާވަހިކަމުގެ މަޝްރޫއުތަކުގެ ތެރެއިން އެއްވެސް މަޝްރޫއެއް މިހާތަނަށް ފެށިފައިނުވާ ކަމަށް ހައުސިން މިނިސްޓަރު ޑރ. އަލީ ހައިދަރު މިއަދު ވިދާޅުވެއްޖެ އެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެންބަރު ހުސެއިން ޒިޔާދު ކުރެއްވި ސުވާލަކަށް ޖަވާބުދެއްވަމުން ހައިދަރު ވިދާޅުވީ، މި ސަރުކާރުން ވެރިކަމާ ހަވާލުވިއިރު ބޯހިޔާވަހިކަމުގެ މަޝްރޫއުތައް އޮތީ މަޑުޖެހިފަ ކަމަށެވެ.
އާ މަޝްރޫއެއް ފެށެން އޮތީ ކުރީ ސަރުކާރުގެ މަޝްރޫއުތަކުގައި ޖެހިފައިހުރި މައްސަލަތައް ހައްލުކޮށްގެން ކަމަށާއި ސަރުކާރުން ކުރަމުންދަނީ އެ މަސައްކަތް ކަމަށް ވެސް ހައިދަރު ވިދާޅުވި އެވެ.
"އެހެންވީމަ ތިބޭފުޅުންނަށް ތިބޭފުޅުންނަށް ފެނިވަޑައިނުގަންނަވަނީ އަޅުގަނޑުމެން އާ މަޝްރޫއެއް އެހެން ތަނެއްގަ ފެށިގެން ކުރިއަށް ނުގެންދާތަން. އެހެންނަމަވެސް އަޅުގަނޑު ޔަގީންކަންދެން މި އަހަރު ނިމުމުގެ ކުރިން ބޯހިޔާވަހިކަމުގެ ވަރަށް ބޮޑު މަޝްރޫއެއް ފެށިގެންދާނެ،" ހައިދަރު ވިދާޅުވި އެވެ.
ރިޔާސީ ކެމްޕޭނުގައި ރައީސް ޑރ. މުހައްމަދު މުއިއްޒު ވަނީ ގިނަ ރަށްރަށުގައި ބޯހިޔާވަހިކަމުގެ މަޝްރޫއުތައް ކުރިއަށް ގެންދާނެ ކަމަށް ވައުދުވެވަޑައިގެންފަ އެވެ.
ނަމަވެސް، ގައުމުގެ އިގުތިސޯދީ ހާލަތު ގޯސްވެ ރަށްރަށުގައި ފެށިފައި ހުރި ތަރައްގީގެ އެކި މަޝްރޫއުތައް ވެސް ވަނީ މަޑުޖެހިފަ އެވެ. އަލަށް މަޝްރޫއެއް، ހާއްސަކޮށް ބޯހިޔާވަހިކަމުގެ މަޝްރޫއެއް އެއްވެސް ރަށެއްގައި ފެށިފައެއް ނުވެ އެވެ.
މިކަމާ ގުޅިގެން މީގެ ކުރިންވެސް އިދިކޮޅު ފަރާތްތަކުން ދިޔައީ ސަރުކާރަށް ފާޑުކިޔަމުންނެވެ. ރާއްޖެއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ބޯހިޔާވަހިކަމަށް ހައްލު ހޯދުމަށް ސަރުކާރުން އެކަށޭނަ މަސައްކަތެއް ނުކުރާ ކަމަށް އެ ފަރާތްތަކުން ތުހުމަތު ކުރެ އެވެ. ނަމަވެސް ސަރުކާރުން އެ ވާހަކަތައް މީގެ ކުރިން ދިޔައީ ދޮގު ކުރަމުންނެވެ.
ބޯހިޔާވަހިކަމާ ބެހޭ ގިނަ ސުވާލުތަކެއް ކުރި މިއަދު ޖަލްސާގައި ވަޒީރުގެ ސާފު ޖަވާބުތަކެއް ނުލިބި، ހައުސިން މިނިސްޓަރު ހާޒިރުކުރި މިއަދުގެ މަޖިލީހުގެ ޖަލްސާވެސް ހޫނުވި އެވެ. އެގޮތުން އިދިކޮޅު ހަތަރު މެންބަރުންގެ ނަން އިއްވާ މަޖިލިސް މިހާރު ވަނީ މެދުކަނޑާލާފަ އެވެ.
