މި ސަރުކާރުގެ ވަޒީރުންގެ މަޖިލީހަށް ރައީސުލްޖުމްހޫރިއްޔާ މުހައްމަދު މުއިއްޒު ގެންނެވި ބަދަލުތަކަށް މަޖިލީހުން މިއަދު ރުހުން ދީފި އެވެ.
ކެބިނެޓު އަލުން އެކުލަވައިލީ މުއިއްޒު އަންގަވައިގެން 10 މިނިސްޓަރަކު، އިސްތިއުފާ ދެއްވުމާ ގުޅިގެންނެވެ. މުއިއްޒުގެ ކެބިނެޓު އަލުން އެކުލަވާލިއިރު، މިނިސްޓްރީތަކުގެ އަދަދު ވަނީ، އެޓާނީ ޖެނެރަލް އޮފީސް ހިމަނައިގެން، 15 އަށް މަދުކޮށްފަ އެވެ. ކުރިން އޮންނަނީ 20 މިނިސްޓްރީ އެވެ.
އޭގެ އިތުރުން، ކުރިން މިނިސްޓަރުކަމުގައި ނެތް ހަތަރު ބޭފުޅަކު ވަޒީރުންގެ މަޖިލީހަށް އޭޕްރިލް 14 ގައި މުއިއްޒު އައްޔަނުކުރެއްވި އެވެ.
އެ ބޭފުޅުން ހިމަނައިގެން ކުރިން ވަޒީރުންގެ މަޖިލީހުގައި ތިއްބެވި ހުރިހާ ބޭފުޅުންނަށް މިއަދު އޮތް މަޖިލީހުގެ ޖަލްސާގައި ވަނީ ރުހުން ދެއްވައިފަ އެވެ.
މިއަދު އޮތް މަޖިލީހުގެ ޖަލްސާގައި ވަޒީރުންގެ ތެރެއިން އެންމެ ގިނަ ވޯޓު ލިބުނީ ފިނޭންސް މިނިސްޓަރު، މޫސާ ޒަމީރު އަށާއި ޑިފެންސް މިނިސްޓަރުގެ މަގާމަށް އަލަށް އައްޔަނުކުރެއްވި ހަސަން ރަޝީދު އަށެވެ. އެ ދެ ބޭފުޅުން ވެސް މިނިސްޓަރުކަމަށް އައްޔަނުކުރަން ފެންނަ ކަމަށް 76 މެންބަރުން ވޯޓު ދެއްވި އެވެ. ނަމަވެސް، ޒަމީރު އެ މަގާމަށް އައްޔަނުކުރަން ނުފެންނަ ކަމަށް އެއް މެންބަރަކު ވޯޓު ދެއްވި އެވެ.
ވަޒީރުންގެ މަޖިލީހަށް އައްޔަނުކުރި ބޭފުޅުންގެ ތެރެއިން އެންމެ މަދު މެންބަރުން ވޯޓުދެއްވީ އެންވަރަމެންޓް މިނިސްޓަރު ކަމަށް އަލަށް އައްޔަނުކުރެއްވި އަލީ ޝަރީފް އަށެވެ. އޭނާއަށް ރުހުން ދޭން ވޯޓު ދެއްވީ 63 މެންބަރުންނެވެ. އޭނާ އެ މަގާމުގައި ބަހައްޓަން ނުފެންނަ ކަމަށް 13 މެންބަރުން ވޯޓުދެއްވި އެވެ.
އާ ކެބިނެޓު
- އެޓާނީ ޖެނެރަލް، އަހުމަދު އުޝާމް
- ފިނޭންސް އެންޑް ޕަބްލިކް އެންޓަޕްރައިސަސް މިނިސްޓަރު، މޫސާ ޒަމީރު
- ހޯމްލޭންޑް، ސެކިއުރިޓީ، ލޭބާ އެންޑް ޓެކްނޮލޮޖީ މިނިސްޓަރު، އަލީ އިހުސާން
- ފޮރިން އެފެއާޒް މިނިސްޓަރު، އިރުތިޝާމް އާދަމް
- ހެލްތު، ފެމިލީ އެންޑް ވެލްފެއާ މިނިސްޓަރު، ގީލާ އަލީ
- އެޑިޔުކޭޝަން އެންޑް ހަޔާ އެޑިޔުކޭޝަން މިނިސްޓަރު، އިސްމާއިލް ޝަފީއު
- ޓޫރިޒަމް އެންޑް ސިވިލް އޭވިއޭޝަން، މުހައްމަދު އަމީން
- ޔޫތު އެމްޕަވާމަންޓް، ސްޕޯޓްސް އެންޑް ފިޓްނަސް މިނިސްޓަރު، އަބްދުﷲ ރާފިއު
- އިކޮނޮމިކް ޑިވެލޮޕްމަންޓް، ޓްރާންސްޕޯޓް، އެންޑް ޓްރޭޑް މިނިސްޓަރު، މުހައްމަދު ސައީދު
- އިސްލާމިކް އެފެއާޒް އެންޑް އެންޑައުމަންޓް މިނިސްޓަރު، މުހައްމަދު ޝަހީމް
- އާޓްސް، ކަލްޗާ އެންޑް ހެރިޓޭޖު މިނިސްޓަރު، ހީނާ ވަލީދު
- އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕަމަންޓް މިނިސްޓަރު، އަބްދުﷲ މުއްތޮލިބު
- ކްލައިމެޓް ޗޭންޖް، އެންވަޔަރަމަންޓް އެންޑް އެނާޖީ މިނިސްޓަރު، އަލީ ޝަރީފް
- ފިޝަރީޒް އެންޑް އެނިމަލް ވެލްފެއާ، އަހުމަދު ޝިޔާމް
- ޑިފެންސް މިނިސްޓަރު، ހަސަން ރަޝީދު
