މިހާރު ކުރިއަށްދާ މާކަންޓައިލް އޮފީސް/ކޮމްޕެނީ ވޮލީބޯލް ޗެމްޕިއަންޝިޕް 2024 ގައި މޯލްޑިވްސް ޕޮލިސް ސާވިސްގެ ކުންފުނި، ޕޮލިސް ކޯޕަރޭޓިވް ސޮސައިޓީ (ޕޮލްކޯ) ބަލިކޮށް, އެންމެ ފަހުގެ ޗެމްޕިއަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މޮޅަކުން މުބާރާތް ފަށައިފި އެވެ.
ޕޮލްކޯގެ މައްޗަށް އެޗްޑީސީ އިން ކުރިހޯދީ 3-1 ސެޓުންނެވެ. މި މެޗުގެ ސެޓުތައް އެޗްޑީސީން ގެންދިޔައީ, 25-12, 21-25, 25-19 އަދި 25-15 އިންނެވެ.
މި މެޗުގެ ފުރަތަމަ ސެޓުގައި ޕޮލްކޯ ޓީމު ފެނިގެންދިޔައީ ވަރަށް ދަށްކޮށެވެ. އޭގެ ފައިދާ ނަގާ މި ސެޓު އެޗްޑީސީ އިން ވަނީ ފަސޭހަކަމާ އެކު, 25-12 އިން މި ސެޓު ނަގައިފަ އެވެ. އެކަމަކު، ޖެހިގެން އައި ސެޓުގައި ޕޮލްކޯ ފެނިގެންދިޔައީ ތަފާތުކޮށެވެ. އެޗްޑީސީ އަށް ސެޓުގެ ފަހު ކޮޅު ހެދުނު ގޯސްތަކުގެ ފައިދާ ނަގާ މި ސެޓު ޕޮލްކޯ އިން ވަނީ 25-21 އިން ކާމިޔާބު ކޮށްފަ އެވެ.
މެޗުގެ ތިން ވަނަ ސެޓުގައި އެޗްޑީސީ އިން ވަނީ އަލުން ކުޅުން ރަނގަޅުކޮށް އެ ޓީމުގައި ތިބި ތަކުރިބާކާރު ކުޅުންތެރިންގެ ބޭނުން ހިފައިފަ އެވެ. އެ ގޮތުން މި ސެޓުގައި އެޗްޑީސީގެ އާދަމް ފައިރޫޒް, އިސްމާއިލް ސާޖިދު (ކުޑަކާއްޓޭ) އަދި ޝަމާއިލް ހުސެއިންގެ މޮޅު ކުޅުން ފެނިގެންދިޔައިރު, މި ސެޓު އެޗްޑީސީ އިން ކާމިޔާބުކުރީ 25-19 އިންނެވެ.
ޖެހިގެން އައި ހަތަރު ވަނަ ސެޓުގައި ޕޮލްކޯ ޓީމު ފެނިގެންދިޔައީ ދަށް ކޮށެވެ. އަމިއްލަ ގިނަ ގޯސްތަކެއް ހެދި އެ ޓީމަށް މި ސެޓު ގެއްލުނީ 25-15 އިންނެވެ.
އިއްޔެ ހަވީރު ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ މައްޗަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ވަނީ 3-2 ގެ ނަތީޖާއަކުން ކުރިހޯދައިފަ އެވެ. މި މެޗުގެ ސެޓުތައް ދިޔައީ, 24-26, 25-21, 26-28, 25-18 އަދި 15-12 އިންނެވެ.
