ރާއްޖެ އާއި އިންޑިއާގެ ގުޅުން ވަރުގަދަ ކުރަން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކުރާ މަސައްކަތް ބަލައިގަންނަ ކަމަށް އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު މިރޭ ވިދާޅުވެއްޖެ އެވެ.
އެމްޑީޕީގެ ރައީސް އަބްދުﷲ ޝާހިދުގެ އިތުރުން އެމްޑީޕީގެ ވަފުދާ ބައްދަލުކުރެއްވުމަށްފަހު "އެކްސް" ގައި ކުރެއްވި ޕޯސްޓެއްގައި ޖައިޝަންކަރު ވިދާޅުވީ އެމްޑީޕީއާ ބައްދަލުކުރެވުމަކީ ލިބުނު އުފަލެއް ކަމަށެވެ.
"އެމްޑީޕީން ރާއްޖެ އާއި އިންޑިއާއާ ދެމެދު އޮތް ގުޅުން ވަރުގަދަ ކުރަން ކުރާ މަސައްކަތް ބަލައިގަންނަން،" ޖައިޝަންކަރު ކުރެއްވި ޕޯސްޓުގައި ވިދާޅުވި އެވެ.
ޖައިޝަންކަރުއާ އެމްޑީޕީގެ ފަރާތުން ބައްދަލު ކުރެއްވީ ޝާހިދުގެ އިތުރުން އެ ޕާޓީގެ ޕީޖީ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އާއި ނައިބު ރައީސް ހިސާން ހުސެއިން އާއި ޔޫތު ވިންގްގެ ރައީސް ރިފްގާ ޝިހާމް އާއި ފޮރިން ރިލޭޝަންސް ކޮމިޓީގެ ޗެއާ އާމިނަތު ޝައުނާ އާއި ސެކެޓްރީ ޖެނެރަލް ޝާޒްލީ ޝަފީގު އަދި ހެންވޭރު ދެކުނު ދާއިރާގެ ކުރީގެ މެންބަރު ހުސެއިން ޝަހީމް އެވެ.
އެ ބައްދަލުކުރެއްވުމަށްފަހު "އަދަދު" އަށް ޝާހިދު ވިދާޅުވީ އިންޑިއާ އައުޓް ކެމްޕެއިނަކީ ރާއްޖޭގެ ރައްޔިތުންނަށް އޮޅުވާލުމަށް ހިންގި ފިތުނަވެރި ކެމްޕެއިނެއް ކަމަށާއި ނަމަވެސް ސަރުކާރުގެ ސިޔާސަތު ބަދަލުކުރައްވައި އިންޑިއާއާއެކު އޮތް ގުޅުން ބަދަހި ކުރައްވަން މަސައްކަތް ކުރައްވާތީ އެކަމަށް މަރުހަބާ ކިޔާ ކަމަށެވެ.
ބައްދަލުކުރެއްވުމާ ގުޅިގެން އެމްޑީޕީން ނެރުނު ނޫސް ބަޔާނުގައި ވަނީ އިންޑިއާއިން ރާއްޖެއަށް ވެދެއްވާފައިވާ އެހީތެރިކަން ފާހަގަކޮށް ޝުކުރު އަދާކޮށްފަ އެވެ. އަދި ކުރީގެ ރައީސް އިބްރާހިމް މުހައްމަދު ސޯލިހުގެ ދައުރުގައި ފެށި މަޝްރޫއުތަކުގެ ނިންމުން ފާހަގަކުރުމުން ވަނީ މަރުހަބާ ކިޔާފަ އެވެ.
