އޮފީސް/ކޮމްޕެނީ ވޮލީބޯޅަ މުބާރާތުގައި މި ފަހަރު ފަސް ޓީމެއް ވާދަކުރަން ހަމަޖެހިފައިވާ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ހާމަކޮށްފި އެވެ.
މާކަންޓައިލް އޮފީސް/ކޮމްޕެނީ ވޮލީބޯލް ޗެމްޕިއަންޝިޕް 2024 ކުރިއަށްދާނެ ކަމަށް ވީއޭއެމް އިން ކަލަންޑަރު ނެރެފައިވަނީ، މި މަހު 10-17 އަށެވެ. މުބާރާތް ކުޅެން ހަމަޖައްސާފައިވަނީ ހުޅުމާލޭ، އެޗްޑީސީ ޕާކް ވޮލީ ކޯޓުގަ އެވެ.
މި ފަހަރުގެ މުބާރާތުގައި ވާދަކުރަނީ، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)، ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)، ޕޮލިސް ކޯޕަރޭޓިވް ސޮސައިޓީ (ޕޮލްކޯ)، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަދި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އެވެ.
މި މުބާރާތުގެ ގަވާއިދު ނެރުނު ފަހުން، ސިފައިންގެ ޓީމުގެ ނަން، އެ މުއްސަސާގެ ކުންފުނީގެ ނަމަަށް ބަދަލުކުރަން ވީއޭއެމް އިން އެންގި އެވެ. އެކަަމަކު، މީގެ ކުރިން ވެސް މި މުބާރާތުގައި އެމްއެންޑީއެފްގެ ނަމުގައި ވާދަކޮށްފައިވާތީ، ބައިވެރިވާ ނަން ބަދަލުކުރުމެއްނެތި ކުރިއަށްދާން ފުރުސަތު ދީފައިވެ އެވެ.
މިދިޔަ އަހަރު، އޮފީސް/ކޮމްޕެނީ ވޮލީ މުބާރާތް ބާއްވާފައިވަނީ، ހަތަރު އަހަރުގެ މެދުކެނޑުމަކަށް ފަހު އެވެ. މިދިޔަ އަހަރު ތަށި ހޯދީ ކްލަބް އާބަންކޯ (މިހާރު އެޗްޑީސީ) އިންނެވެ. އެއީ، ކުޅުނު ހުރިހާ މެޗަކުން މޮޅުވެގެންނެވެ. ފައިނަލުގައި އެ ޓީމުން ވަނީ ވެމްކޯ އަތުން ސީދާ ތިން ސެޓުން މޮޅުވެފަ އެވެ.
މިދިޔަ އަހަރުގެ މުބާރާތަށް ބަލާއިރު، ހުޅުމާލޭ ޕާކް ވޮލީ ކޯޓުގައި ގްރޫޕް ސްޓޭޖުގެ މެޗުތައް ކުޅުމަށް ފަހު، ސެމީ ފައިނަލާއި ފައިނަލް ކުޅުނީ ސޯޝަލް އިންޑޯގަ އެވެ. އިންޑޯ އަށް ބަދަލުކުރީ ވިއްސާރައިގެ ސަބަބުން ސެމީ މެޗުތައް ފަސްކުރަން ޖެހުމުންނެވެ.
ވީއޭއެމް އިން މި ފަަހަރުގެ މުބާރާތުގައި ވާދަކުރާ ޓީމުތަކުގެ ޓީމު ލިސްޓު އިއުލާނުކޮށްފައިވާއިރު، ގައުމީ ފިރިހެން ވޮލީ ޓީމުގެ ގިނަ ކުޅުންތެރިންތަކެއް ޓީމުތަކުގައި ހިމެނެ އެވެ.
