ސިޔާސީ ގޮތުން އިސްކޮށް ތިބި ލީޑަރުން ތާއީދުކޮށް އުފެދިފައިވާ ފިކުރުތަކަށް ރައްޔިތުންގެ ތާއީދެއް ނެތް ކަމަށާއި އެ ފިކުރުތައް ރައްޔިތުންނަށް ކަމު ނުދާ ކަމަށް ނައިބު ރައީސް ހުސެއިން މުހައްމަދު ލަތީފު މިރޭ ވިދާޅުވެއްޖެ އެވެ.
ޕީއެންސީގެ ޕޯޑިއަމަކުން ނުފެންނަތާ ދުވަސްތަކެއް ފަހުން އެ ޕާޓީގެ ހަރުގެ ޖަލްސާގައި ވާހަކަ ދައްކަވަމުން ނައިބު ރައީސް މިހެން ވިދާޅުވީ، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބުގައި އެ ޕާޓީން ހޯދި ކާމިޔާބީއާ ގުޅުވަ އެވެ.
މި ވާހަކަ ފައްޓަވަމުން ނައިބު ރައީސް ހުސެއިން ވިދާޅުވި ގޮތުގައި ސިޔާސީ ގޮތުން އިސްކޮށް ތިބި ލީޑަރުންގެ ފިކުރުތަކުގައި ގެންގުޅުނީ ރައްޔިތުންގެ ބޭނުންވާ ކަންކަން ނޫންކަން ކޮންމެ އިންތިހާބަކުން ސާފުވެ އެވެ.
"ސިޔާސީ ގޮތުން އަޅުގަނޑުމެންގެ އިސްކޮށް ތިއްބެވި ލީޑަރުން މިދިޔަ މާޒީވި ދުވަސްތަކުގައި، ތާރީހުން ވެސް ހެކި ދޭން އޮތީ، އެ ލީޑަރުން އަޅުގަނޑުމެން ގެންގުޅެފައި ތިބީ، ނޫނީ އެ ލީޑަރުންނަށް ތާއީދުކޮށް އުފެދިފައިވާ ފިކުރުތަކުގައި ގެންގުޅެމުން އައީކީ މިއަދު ރައްޔިތުން ބޭނުންވި ކަންކަން ނޫންކަން ސާފުވެގެން އެބަދޭ މިދާ ކޮންމެ އިންތިހާބަކުން،" އެމަނިކުފާނު ވިދާޅުވި އެވެ.
ނައިބު ރައީސް ވިދާޅުވީ އެ ލީޑަރުންގެ ފަރާތުން ދަސްވީ ކަމަކީ އަދި މުޖުތަމައުގެ ތެރެއިން ފެންނަން ހުރީ، އުފެދުނު ނަފުރަތާއި ރުޅިވެރިކަމާއި އަދާވާތްތެރިވުމާއި ސިޔާސީ ގޮތުން ޒާތީކޮށް ބޭނުންވާ އެއްޗެއް ބުނަން ކަމަށެވެ. ނަމަވެސް، މިއީ ރައްޔިތުން ބޭނުންވާ ގޮތް ނޫން ކަން ރައްޔިތުންގެ ވޯޓުން ފެނުނު ކަމަށް އެމަނިކުފާނު ވިދާޅުވި އެވެ.
މިކަމަށް އެންމެ ބޮޑަށް ބާރު ދޭން ނައިބު ރައީސް ބޭނުންކުރެއްވީ ނިމިދިޔަ މަޖިލިސް އިންތިހާބުގައި ޕީއެންސީން ހޯދި ބޮޑު ކާމިޔާބީ އެވެ. ނައިބު ރައީސް ވިދާޅުވީ އެ އިންތިހާބުގެ ކެމްޕެއިންގެ ތެރޭގައި ވެސް ރުޅިވެރިކަމާއި ނަފުރަތު އުފައްދަން މަސައްކަތް ކުރި ކަމަށާއި އެ މާޒީ އިޔާދާ ކުރަން ނޫނެކޭ ބުނީ ރައްޔިތުން ކަމަށެވެ.
އެހެން ވިދާޅުވުމަށް ފަހު އެމަނިކުފާނު ވަނީ ސިޔާސީ ލީޑަރުން ޖީލެއް ހަލާކުކޮށްލާފައިވާ ކަމުގެ ކަންބޮޑުވުން ފާޅުކުރައްވާފަ އެވެ. އަދި މިއަދު މި ފެންނަ އިޖުތިމާއި ބޮޑެތި މައްސަލަތައް ވެސް ހުރީ އެ ސަބަބާ ހުރެ ކަމަށް ނައިބު ރައީސް ވިދާޅުވި އެވެ.
"މާޒީން އަޅުގަނޑުމެންނަށް ލިބުނީ ވަރަށް ހިތި ތަޖުރިބާއެއް. [] އޭގެ ސަބަބުން އަޅުގަނޑުމެންގެ ޖީލެއް ހަލާކޮށްލާފައޭ އަޅުގަނޑުމެންގެ ސިޔާސީ ލީޑަރުން އެ ތިބީ. އެހެންކަމުން އޭގެ ހިތި ނަތީޖާ. މިއަދު ވެސް މި މުޖުތަމައު ތެރެއިން މި ފެންނަ އިިޖުތިމާއީ ބޮޑެތި މައްސަލަތައް އެހެރީ އެހެރަ ސަބަބުތަކާ ހެދިއޭ،" އެމަނިކުފާނު ވިދާޅުވި އެވެ.
ނައިބު ރައީސްގެ ވާހަކައިގައި އެމަނިކުފާނު ވަނީ ރައްޔިތުންގެ މެދުގައި ނަފުރަތު އުފައްދަން ސިޔާސީ ވެރިން ދައްކަވާ ވާހަކަތަކުގެ ހިތި ނަތީޖާ ބަޔާންކުރައްވަމުން ވިދާޅުވީ ސިޔާސީ ގޮތުން އަރައިރުންވާން ހަދައިގެން މުޅި ރާއްޖޭގައި އަނިޔާވެރިކަން މޫލާފައިވާ ކަމަށެވެ.
"މި ދަންނަވާ ވެރިން ނިކުމެ އެކި ޒާތްޒާތުގެ ވާހަކަ ދެއްކި ކަމުގައި ވިޔަސް، ރައްޔިތުންގެ ތެރޭގައި ނަފުރަތާއި ރުޅިވެރިކަން އުފައްދައިގެން އޭގެ ނަތީޖާއަކަށްވީ އަޅުގަނޑުމެންގެ ދޭ ދޭ ފަރުދުންގެ މެދުގައި ތަޅާފޮޅުން ހިންގުން. ޕާޓީ ނިޒާމުގެ ތެރޭގައި ވެސް ތަޅާފޮޅުން ހިންގުން. އަޅުގަނޑުމެންގެ ގާނޫނީ މުއައްސަސާތައް ނެރެގެން ވިޔަސް އަޅުގަނޑުމެން އަނިޔާކުރުން،" އެމަނިކުފާނު ވިދާޅުވި އެވެ.
"މިހެން ގޮސްފައި އަނިޔާވެރިކަން އޮތީ މުޅި ރާއްޖޭގައި ފޫލައި، މޫލާފައި،"
ނައިބު ރައީސް ހުސެއިން ވަނީ ރައްޔިތުން މިހާރު ބޭނުންވަނީ ސުލްހަވެރިކަން ގާއިމުކުރަން ކަމަށާއި ސަރުކާރުން މަސައްކަތް ކުރަމުން ދަނީ އެ އަމާޒަށް ކަމަށެވެ. އަދި ރައީސް ޑރ. މުހައްމަދު މުއިއްޒު މަސައްކަތް ކުރައްވަނީ ވެސް އެ މަގުން ކަމަށް އެމަނިކުފާނު ވިދާޅުވި އެވެ.
