ޕެރިސް (ޖުލައި 31) - ދާދި ފަހުން ރެއާލް މެޑްރިޑަށް ބަދަލުވި ފްރާންސްގެ ކެޕްޓަން، ކީލިއަން އެމްބާޕޭ، ފްރާންސްގެ ދެ ވަނަ ޑިވިޝަން ކްލަބެއް ކަމަށްވާ ކާއެންގެ މެޖޯރިޓީ ހިއްސާ ގަނެފި އެވެ.
އެމްބާޕޭ، 25، ގެ ކުންފުނި، އިންޓަކަނެކްޓެޑް ވެންޗާސް އިން ވަނީ 15 މިލިއަން ޑޮލަރު އިންވެސްޓްކޮށްފަ އެވެ. އެ ގޮތުން، އިންޓަކަނެކްޓެޑް ވެންޗާސް އިން މި ޑީލް ނިންމީ، ކޯލިޝަން ކެޕިޓަލް މެދުވެރިކޮށެވެ.
މީގެ ކުރިން، ކާއެން ހިންގަމުން އައީ، އެމެރިކާގެ އިންވެސްޓްމަންޑް ފަންޑެއް ކަމަށްވާ އޯކްޓްރީ އިންނެވެ.
ކާއެންގެ ސުޕަވައިޒަރީ ބޯޑުގެ ރައީސް، ޕިއޭރޭ-އަންޓުއާން ކަޕްޓޯން އަކީ މިހާރު އެ ކްލަބްގެ މައިނޯރިޓީ ހިއްސާދާރެކެވެ. ކަޕްޓޯން ވިދާޅުވީ، އަލަށް ކްލަބް ހިންގަން އައި ފަރާތްތަކުން، މިހާރު އޮތް ލެވަލުން މައްޗަށް އެ ޓީމު ގެންދާނެ ކަމުގެ ޔަގީންކަން އެބައޮތް ކަމަށެވެ.
މީގެ ކުރިން، ފްރެންޗް ލީގު 1 (ފްރާންސްގެ ފުރަަތަމަ ޑިވިޝަން)ގައި އޮތް ކާއެން ރެލިގޭޓްވީ، 2019 ވަނައިގަ އެވެ.
ކާއެން އިން ނެރުނު ބަޔާނެއްގައި ބުނެފައިވަނީ، އެ ކްލަބް ކުރިން އޮތް މަގާމަކީ، ފްރާންސްގެ ފުރަތަމަ ޑިވިޝަން ކަމަށާއި އާ މެނޭޖްމަންޓާ އެކު، އެ ހިސާބަށް ގޮސް، ކްލަބްގެ ހައިބަތު ބޮޑުކުރަން ބޭނުންވާ ކަމަށެވެ.
މިދިޔަ ސީޒަނުގައި ކާއެން ފްރާންސްގެ ދެ ވަނަ ޑިވިޝަނުގައި ނިންމީ ހަ ވަނައިގަ އެވެ. ފްރާންސްގެ ދެ ވަނަ ޑިވިޝަނުގެ އާ ސީޒަން ފަށާނީ އޮގަސްޓް 17 ވަނަ ދުވަހު އެވެ. އެއީ، އެމްބާޕޭ، މި ފަހުން ބަދަލުވި، ރެއާލް މެޑްރިޑަށް، ސްޕެނިޝް ލީގުގައި ފުރަތަމަ މެޗު ކުޅޭ ދުވަސް ފަހުންނެވެ.
ސްޕެނިޝް ލީގުގެ އާ ސީޒަންގެ ފުރަތަމަ މެޗުގައި، ރެއާލުން ކުޅޭނީ ރެއާލް މަޔޯކާއާ ދެކޮޅަށެވެ.
