ގެދޮރުވެރިޔާ ސްކީމުގެ ދަށުން ފުލެޓު ލިބޭ މީހުންގެ ފައިނަލް ލިސްޓު މި އަހަރުގެ އޮކްޓޫބަރު މަސް ނިމުމުގެ ކުރިން އާންމު ކުރާނެ ކަމަށް ހައުސިން މިނިސްޓަރު، ހައިދަރު ވިދާޅުވި ކަމަށް އިއްޔެ ރިޕޯޓުކުރި އެވެ.
ރައްޔިތުންގެ މަޖިލީހުގެ ޕެޓިޝަން ކޮމެޓީއަށް މިނިސްޓަރު ހައިދަރު ހާޒިރުކޮށް މެންބަރުން އިއްޔެ ކުރި ސުވާލުތަކަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ހައުސިން މިނިސްޓްރީން މަސައްކަތް ކުރަމުން ދަނީ ގެދޮރުވެރިޔާ ސްކީމުގެ ދަށުން ދޫކުރުމަށް އަޅަމުން ދާ އިމާރާތްތަކުގެ މަސައްކަތްތައް ނިމުމުގެ ކުރިން ފުލެޓު ލިބޭ މީހުންގެ ފައިނަލް ލިސްޓެއް އެކުލަވައިލެވޭތޯ ކަމަށެވެ.
"އިމާރާތްކޮށް ނިމެންވާއިރަށް އަޅުގަނޑުމެން ހުރިހާ، ހޮވޭ ފަރާތްތައް އިއުލާނުކޮށް ފައިނަލް ލިސްޓު ގެޒެޓު ކުރާނަމޭ އިނގޭތޯ، އަޅުގަނޑަށް އެނގިފައިވާ ގޮތުގައި 32 ޓަވަރުގެ ތެރެއިން ފުރަތަމަ ހަ ޓަވަރު ނިމޭނީ އޮކްޓޫބަރު މަސް ނިމޭހައި ތަނަށް އަޅުގަނޑުމެން ފައިނަލް ލިސްޓު އާންމު ކުރާނަން،" ހައިދަރު ވިދާޅުވި އެވެ.
މިދިޔަ ސަރުކާރުން އިއުލާނުކޮށްފައިވާ ފުލެޓު ލިސްޓު ބާތިލު ކުރުމުގެ ވިސްނުމެއް ނުގެންގުޅުއްވާ ކަމަށް ވެސް ހައިދަރު ވިދާޅުވި އެވެ. ނަމަވެސް ފައިނަލް ލިސްޓުގައި ހިމެނޭ މީހުންނަކީ ހަގީގަތުގައި ވެސް ފުލެޓު ހައްގުވާ މީހުންތޯ ކަށަވަރު ކުރާނެ ކަމަށް ހައިދަރު ވިދާޅުވި އެވެ.
"އަޅުގަނޑުމެން ބަލާނަން ވީހައި ވެސް ބޮޑަކަށް ހައްގު ފަރާތްތަކަށްކަން އަޅުގަނޑުމެންނަށް މި ފުލެޓުތައް ހަވާލު ކުރެވެނީ، އެންމެ ބޮޑަށް ބޭނުންވެފައި ތިބި ބަޔަކަށް ދީފިއްޔާ އަޅުގަނޑަށް ހީވަނީ ކުއްޔަށް ދިނުމާއި އެތަނުގައި ދިރިނޫޅުމުގެ މައްސަލަތައް ނާންނާނެހެން، އެކަން އަޅުގަނޑުމެން ޔަގީން ކުރާނަން، މިނިސްޓަރީން،" ހައިދަރު ވިދާޅުވި އެވެ.
ފުލެޓު ލިބޭ މީހުންގެ ފައިނަލް ލިސްޓެއް އެކުލަވައިލާއިރު، ފޯމު ހުށަހަޅައިފައިވާ މީހުންގެ ދިރިއުޅުމުގެ ހާލަތަށް ވެސް ބަލާނެ ކަމަށް ހައިދަރު ވިދާޅުވި އެވެ. ނަމަވެސް އެކަން ކުރާނީ ރަސްމީކޮށް ފެންނަން ހުރި ލިޔެކިޔުންތަކަށް ބެލުމަށްފަހު ކަމަށް ހައިދަރު ވިދާޅުވި އެވެ.
"އިވެލުއޭޓު ކުރުމުގެ މަސައްކަަތް ކުރިއަށް ގެންދާނީ އަޅުގަނޑުމެންގެ ތެރެއިން ޓީމެއް އެކުލަވައިލައިގެން އިނގޭތޯ، އޭގައި، ޓީމު އެކުލަވައިލުމުގައި ދިމާވާ މައްސަލަތައް ހައްލު ކުރުމަށް އަޅުގަނޑުމެން ފުލެޓު ކޮމެޓީއަށް މަޝްވަރާ ކުރާނަން،" ހައިދަރު ވިދާޅުވި އެވެ.
ހައިދަރު ވިދާޅުވީ ގެދޮރުވެރިޔާގެ ދަށުން ފުރަމަތަ ފުލެޓު ލިބޭ 4000 މީހުންގެ ތެރޭގައި ހިމެނޭ ކަސްޓަމްސްގެ ފުލެޓުތަކަކީ ވުޖޫދުގައި ނެތް އެއްޗެއް ކަމަށެވެ. އެގޮތުން މިދިޔަ ސަރުކާރުން ފުރަތަމަ 4000 ފުލެޓު އިއުލާނު ކުރި އިރުވެސް ކަސްޓަމްސްއަށް ދޫކުރާ 100 ފުލެޓުގެ ވާހަކަ ނެތް ކަމަށް ހައިދަރު ވިދާޅުވި އެވެ.
ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން އިއުލާނު ކުރި ފުލެޓު ލިސްޓުގައި މައްސަލައެއް ނެތް މީހުންނަށް ވީހައިވެސް އަވަހަކަށް ފުލެޓު ދިނުމަށް ފާސްކޮށް މާލެ ސިޓީ ކައުންސިލުން ވަނީ މީގެ ދެ ހަފުތާ ކުރިން ވަނީ ހައުސިން މިނިސްޓަރީއަށް ލަފާ ދީފަ އެވެ.
މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ. ނަމަވެސް އެ ވެރިކަން ނިމުނުއިރު، ކޮންޓްރެކްޓު ކޮށް، މަސައްކަތް ފަށާފައި ވަނީ 4000 ފުލެއްޓެއްގެ އެވެ.
ފުރަތަމަ 4،000 ފްލެޓް ލިބޭނީ ޕޮއިންޓް ތަރުތީބުން އެންމެ ގިނަ ޕޮއިންޓު ލިބޭ މީހުނަށް ކަމަށް ކަނޑައަޅާފައިވަނިކޮށް އޭސީސީއަށް ހުށަހެޅު މައްސަލައަކާ ގުޅިގެން އެ މަސައްކަތް މަޑުޖައްސާލަން އެންގި އެވެ. އެ ސްކީމަށް ތައްޔާރުކުރި ޕޯޓަލްގެ އެކްސެސް ލިބުމުން، މައްސަލަ ތަހުގީގު ކުރުން ގެންދިޔުމަށް ފަހު، މަސައްކަތް އަލުން ފަށަން ކޮމިޝަނުން ހުއްދަ ދިނީ ފެބްރުއަރީ އެކެއްގަ އެވެ.
