ދުނިޔޭގައި އިންސާނުން ދިރިއުޅެން ފެށި ދުވަސްވަރަކާމެދު ކުރެވެން އޮތީ އަންދާޒާއެކެވެ. ދެލައްކަ އަހަރެއްހައި ދުވަސް ވެއްޖެކަމަށް ބެލެވޭ އިންސާނީ ތާރީހުގެ ފެށުމުގައިވެސް މުޖުތަމައުގެ އިންތިޒާމުތަކެއް ހުންނާނޭކަން ގައިމެވެ. މި އިންތިޒާމުތައް ކަނޑައެޅިގެން ދިއުމުގައި ބެލި ހަމައެއްވެސް އޮންނާނެ އެވެ. އަންހެން ފިރިހެން ދެ ޖިންސަށް ވަކި ދައުރުތަކެއް އެކަށައެޅިފައި އޮންނަންވާނޭކަމަށް ދެކުމަކީ މިހާރު ފެށިގެން އުޅޭ އާދައެއް ނޫނެވެ. އެއީ އެންމެ އިހަށްވެސް އެކަން އޮތް ގޮތެވެ. އެހެންނަމަވެސް ކުރިއްސުރެ ވަކި ގޮތަކަށް އަމަލުކުރަމުން ގޮސްފައިވުމަކީ އެގޮތަކީ އެންމެ ރަނގަޅު ގޮތްކަމަށް ވާންޖެހޭ ސަބަބެއްވެސް ނޫނެވެ.
މިހާރު، ބޯދާ ވިސްނުމޭ ކިޔަސް، މުޖުތަމައުގައި ދެ ޖިންސަށްމެ ގަރާރުކުރެވޭ ކަމަށް ގަބޫލުކުރާ ވަޒީފާތަކެއް ހުރެ އެވެ. އެ ވިސްނުން ނިޔާކުރާ ގޮތުން ކައްކައި ކާންދިނުމާއި، ކުނިކެހުމާއި، ގޭތެރެ ބެލެހެއްޓުމަކީ އަންހެނުންގެ ދައުރެވެ. ދިރިއުޅުމުގެ ހަރަދުބަރަދު ބެލެހެއްޓުމަށް އާމްދަނީ ހޯދާނީ ފިރިހެނުންނެވެ. މި އުސޫލު އެކަށައެޅުމުގައި ބެލި ހަމައެެއް އޮންނަންވާނެތާ އެވެ. މި ކަމެއް ފެށިގެން އައި ޒަމާނުގައި ހަމަ ޔަގީނުންވެސް ފައިސާ އަކީ އެއްވެސް މީހަކު ވިސްނަންޖެހިފައި އޮންނާނޭ ކަމެއް ނޫނެވެ. ދިރިއުޅޭ ތަނުގެ ކުއްޔާއި، އެނޫންވެސް އެފަދަ ހަރަދުތައް އެއީ ނެތް އެއްޗެކެވެ. ހަމައެކަނި ޒިންމާއަކަށް އޮތީ ދުނިޔޭގައި ދިރިއުޅުމަށްޓަކައި ކައިބޮއި އުޅުމާއި ދުނިޔޭގެ ވަގުތީ މަންޒިލުން އުފާ ހޯދުމެވެ. ވަކި އީމާނެއްގައި ތިބި ބަޔަކު ނަމަ އާހިރަތަށް ތައްޔާރުވުމެވެ. މިގޮތަށް އުޅޭ އުޅުމުގައި އިންސާނީ ނަސްލު ގިނަކުރުމުގެ ޒިންމާ އުފުލަންޖެހޭ ބަޔަކީ އަންހެނުންކަމަށްވާތީ، ދިރިއުޅުމުގެ ޒަރޫރަތްތައް ހަމަޖެއްސުމަށް އަންހެނުންނަށް އޮންނަ ޒިންމާ ލުއިކުރުމަށް މަޝްވަރާކުރެވި އެއްބަސްވެވުނީ އެވެ. އެހެންވެ, ކެއުންބުއިމަށް ބޭނުންވާ ސާމާނު ހޯދުމުގެ ބުރަ ޒިންމާއާއި ދިރިއުޅެވޭނޭ ހިޔާވަހި ތައްޔާރުކުރުން ފަދަ ބަރު މަސައްކަތްތަކާ ހަވާލުވީ ފިރިހެނުންނެވެ. މި އިންތިޒާމުތައް ހަމަޖައްސައިދޭކަމަށްޓަކައި ފިރިހެނުންނަށް ކައްކައި ކާންދިނުމުގެ ޒިންމާ އަންހެނުންނާ މަތިކުރެވުނީ ކަމަށް ވެދާނެ އެވެ. އެއީ ވިހެއުމުގައި އެ އުފުލާ ތަކުލީފާއި ހަށިގަނޑުގެ ތަބީއީ ތަފާތަށް ބަލައި ދެވުނު ލުޔަކަށް މެނުވީ ނުވާނެ އެވެ. މި އެއްބަސްވުން އެކުލަވާލެވިފައި އޮންނާނޭ ޒަމާނުގެ ހާލަތުންނަމަ އެ އެއްބަސްވުން އިންސާފުވެރި އެވެ.
މި އިންތިޒާމަށް އެތައް ގަރުނެއް ވެގެން ދިޔައިރު، އިންސާނީ ދިރިއުޅުން ތަރައްގީވެއްޖެ އެވެ. އެހެންނަމަވެސް އަންހެނުންނާ ފިރިހެނުންނާ ދެމެދު އެންމެ އިހުގެ ހާލަތަށް ބަލައި ވެވުނު އެއްބަސްވުން މުރާޖައާ ނުކުރެވި ހަމައެގޮތުގައި އޮތީ އެވެ. ދުނިޔެ އާރާސްތުކުރުމަށް ކުރަންޖެހޭ ހުރިހާ ބަރު މަސައްކަތްތަކެއް ކުރަންޖެހޭ ބަޔަކީ ފިރިހެނުންކަމަށްވެ، އަންހެނުންނަކީ ފިރިހެނުންގެ އެހީތެރިންގެ ދަރަޖައިގައި ތިބޭ ބަޔަކަށްވެ، އެގޮތަށް ސިއްކަޖެހި ނިމިއްޖެ އެވެ. ދެން ދައުރުވެ އާލާވާންފެށީ އެ ވިސްނުމެވެ. ދުނިޔެ ހިންގާނީ ފިރިހެނުންނެވެ. އަންހެނުންނަކީ ހަމައެކަނި އެހީތެރިންނެވެ. ނުވަތަ ފިރިހެނުންގެ ހިދުމަތުގައި ތިބެންޖެހޭ ބައެކެވެ.
ދެ ޖިންސުގެ ދައުރު ބެހިގެން ދިޔަ ސަބަބާއި, އެކަން އެގޮތުގައި ބަދަލުނުވެ އޮތްގޮތްކަމަށް އަޅުގަނޑަށް ވިސްނޭ ގޮތަކީ މިއީ އެވެ. މި ނަޒަރިއްޔާއަށް ބާރުދޭ ހެއްކެއް ދަލީލެއް އޮތީއަކީއެއް ނޫނެވެ. ހަމައެކަނި ބުއްދިއަށް ފެންނަ ގޮތެވެ.
ދެން ހިތަށް އަރަ އެވެ. އެއްޒަމާނެއްގައި އެކަން އެހެން ހިނގާފައި އޮތަސް މިހާރު މިއޮތީ ޒަމާން ބަދަލުވެފަ އެވެ. ފިރިހެނުން އަދާކުރާ ދައުރު، މި މުޖުތަމައުގައި އަންހެނުންވެސް މިހާރު އެބަ އަދާކުރެ އެވެ. މިހާރު ދިރިއުޅުމުގެ ޒަރޫރަތަކީ ހަމައެކަނި ބަނޑުފުރާނަ މުއްތިކުރުމެއް ނޫނެވެ. އަސާސީ ބޭނުންތައް ކަމަށް ބެލެވޭ ކިތަންމެ ހަރަދަކާއި ޒިންމާއެއް އިންސާނުން އުފައްދައިފި އެވެ. ކުއްޔާއި ކަރަންޓާއި ފެން ބިލާއި އިންޓަނެޓް ބިލު ފަދަ 'ޒަރޫރީ އަދި އަސާސީ’ ކިތަންމެ ބޭނުމެއް މިހާރު އެބަހުއްޓެވެ. އަނެއްކޮޅުން މިހާރުގެ ފިރިހެނުންނަކީ ހަމައެކަނި އެމީހުންކުރާ މަސައްކަތްތަކުން އަންހެނުންގެ އެ ޒަރޫރަތްތައް ފުރިހަމަކޮށްދެވޭ ބައެއް ނޫނެވެ. އެހެންވީމާ އޭގެ ނަތީޖާއަކަށްވަނީ ދިރިއުޅުން ތަނަވަސްކުރުމަށް ފިރިހެނުންނެކޭ އެއްފަދައިން އަންހެނުންވެސް މަސައްކަތް ކުރަންޖެހުމެވެ. ކުރަންޖެހެނީވެސް ހަމަ އެއްކަހަލަ މަސައްކަތްތަކެކެވެ.
މިހާރުގެ ފިރިހެނުން ކޮށްއުޅެނީކީ 'އަންހެނުންނާ ފިރިހެނުންގެ ދައުރުގެ އަސާސީ އެއްބަސްވުން' އެކުލަވާލެވުނު ޒަމާނުގައި ފިރިހެނުން ކޮށްއުޅުނުހައި ބުރަ މަސައްކަތެއްވެސް ނޫނެވެ. ހަމަ މި ޒަމާނުގައި އަންހެނުންވެސް އަދާކުރާފަދަ ވަޒީފާތަކެވެ. އެހެންވީމާ ދެބައި މީހުންމެ އަދާކުރާ އެއްބާވަތުގެ ވަޒީފާތަކުގެ އިތުރަށް، ކައްކައި ކާންދިނުމުގެ މަސްއޫލިއްޔަތު އަންހެނުންނާ މަތިކުރެވުމަކީ އެއްކަލަ އިޖުތިމާއީ އެއްބަސްވުން ވަކި އަތަކަށް ބުރަވުމެވެ. ފިރިހެނުންގެ ޒިންމާއަކީ ވަޒީފާ އަދާކޮށް އާމްދަނީ ހޯދުން އެކަނި ކަމަށްވެފައި، އަންހެނުންގެ ޒިންމާއަކީ ވަޒީފާ އަދާކުރުމާއެކު ގޭތެރެ ބެލެހެއްޓުމާއި ކައްކައި ކާންދިނުމާއި ދަރިން ބެލުންކަމަށްވީމާ އެ ގާއިމުކުރެވެނީ ބޭއިންސާފު އެއްބަސްވުމެކެވެ.
މި އެއްބަސްވުމަށް އަންހެނުން ބޯލަނބަމުން އެ ގެންދަނީ އެއީ ގަދީމީ ކަމަކަށްވެ، ޅަފަތުގެ ތަރުބިއްޔަތަށްވީތީ އަދި އެ އާދަ ކަށީގައި ހިފާފައި ހުރީތީ އެވެ. ސަބަބުވެރި ވިސްނުމަކުން އެކަމާމެދު ވިސްނައިފި ކޮންމެ އަންހެނަކު އެ އިސްކުރަނީ އައު ޒަމާނުގެ ވިސްނުމެވެ. އެއީ އަންހެނުންނާއި ފިރިހެނުންގެ ގަދީމީ އެއްބަސްވުން މުރާޖައާކުރުމުގެ ވިސްނުމެވެ.
ދެމަފިރިންނަކީ ވަޒީފާ އަދާކޮށް އާމްދަނީ ހޯދާ ދެމީހުން ކަމުގައިވާނަމަ އެމީހުންގެ އާމްދަނީން ބައެއް ހޭދަކޮށްގެން އެ ދެމީހުންގެ ކެއުން ބުއިމާއި ގޭތެރެ ބެލެހެއްޓުމަށް މަސައްކަތްތެރިޔަކަށް އުޖޫރައެއް ދީގެން ގެންގުޅުމަކީ އިޖުތިމާއީ ކުށެއް ނޫނެވެ. އައިބު ކަމެއްވެސް ނޫނެވެ. އަދި ކީއްތޯ އެވެ. އެއީ އެކަން ކުރާން އެންމެ ރަނގަޅުވެސް ގޮތެވެ.
އަނބިމީހާގެ ބަދަލުގައި ބިދޭސީ ފިރިހެނަކު ކައްކައި ކާންދޭތީ އެކަމުގެ ޝަކުވާ ކުރާ މީހާއަށް އޮތް ގޮތަކީ ޒަމާނަށް ހޭލުމެވެ. ކޮންމެ ކަމެއްގައިމެ ބަދަލަކީ ދުނިޔޭގެ އަސާސީ ގާނޫނުކަން ގަބޫލުކޮށް އެ ގާނޫނާ ތަބާވުމެވެ. ދިރިއުޅުމުގެ ޒަރޫރީ ބޭނުންތައް ފަސޭހަކުރެވިފައިވާ މިޒަމާނުގައި ގެވެހި އެއްވެސް މަސައްކަތަކީ ވަކި ޖިންސަކަށް ނުކުރެވޭނޭ ބުރަ މަސައްކަތަކަށް ނުވާނެ އެވެ. އެ ހަގީގަތަށް ބޯލެނބުމާއެކު ދެޖިންސުގެ ދައުރާ ގުޅޭ ގަދީމީ އެއްބަސްވުން މުރާޖައާކޮށް އައު ދައުރަކަށް ހޭލަންވީ އެވެ. އަންހެނުންނާއި ފިރިހެނުން ޒިންމާތަކާއި ހައްގުތަކުގައި ހަމަހަމަވުމަށް ދުނިޔޭގެ ތަބީއަތުން ހިފާފައި މިއޮތް އޮއިވަރާ ދެކޮޅަށް ފަތާން މީހަކު މަސައްކަތް ކުރާނަމަ އެ ކުރެވެނީ ކާމިޔާބުވުމެއް ނެތް ހުސް މަސައްކަތެކެވެ.
