ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ މި ދައުރުގެ އޮޑިޓް ރިޕޯޓްތައް އަންނަ މަހު ނިންމައި، ކްލަބްތަކާ ހިއްސާ ކުރާނެ ކަމަށް އެ އެސޯސިއޭޝަންގެ ރައީސް މުހައްމަދު ލަތީފް (ލަތީބެ) ވިދާޅުވެއްޖެ އެވެ.
ކޮމިޝަނާ އޮފް ސްޕޯޓްސް މުހައްމަދު ތޮލާލް ވަނީ މީގެ ކުރިން ވީއޭއެމް އަށް އޮޑިޓް ރިޕޯޓްތައް ނިންމައި، ހުށަހެޅުމަށް 90 ދުވަހުގެ މުއްދަތެއް ދީފަ އެވެ. އަދި އެ މުއްދަތުގެ ތެރޭގައި އޮޑިޓް ނިންމައި ކުލަބްތަކާ ހިއްސާ ކުރައްވާނެ ކަމަށް ވީއޭއެމްގެ ރައީސް ކަމަށް މި ފަހުން ހަވާލުވި ލަތީފް ވަނީ ވިދާޅުވެފަ އެވެ. އެކަމަކު، އެކަމަށް ހަތަރު މަސް ހަމަވެގެންދިޔައިރު, ވީއޭއެމް އިން ސްޕޯޓްސް ކޮމިޝަނަށް ހުށަހަޅާފައިވަނީ އޮޑިޓް ރިޕޯޓްތަކުގެ ޑްރާފްޓެކެވެ.
"އަދަދު" އިން ކުރި ސުވާލަކަށް ޖަވާބު ދެމުން، ލަތީފް ވިދާޅުވީ, އަންނަ މަހު އޮޑިޓްގެ ހުރިހާ މަސައްކަތެއް ނިންމައި ކުލަބްތަކާ އޮޑިޓް ރިޕޯޓް ހިއްސާ ކުރާނެ ކަމަށެވެ. އަދި ކުލަބްތަކާ ރިޕޯޓްތައް ހިއްސާ ކުރާނީ އެކްސްޓްރާ އޯޑިނަރީ ކޮންގްރެސްގެ ތެރޭގައި ކަމަށް ލަތީފް ވަނީ ވިދާޅުވެފަ އެވެ.
"އަންނަ އޮގަސްޓް މަހު ތެރޭގައި އިރާދަ ކުރެއްވިއްޔާ އޮޑިޓްގެ ހުރިހާ ކަމެއް ނިމޭނެ. އޮޑިޓްގެ ކަންކަން ނިމުމުން. އެކަން އެކްސްޓްރާ އޯޑިނަރީ ކޮންގްރެސް ބާއްވާ ކްލަބްތަކާ ހިއްސާ ކުރާނަން" ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ރައީސްކަން ވެސް ކުރައްވަމުން އަންނަ ލަތީފް ވިދާޅުވި އެވެ.
ކޮމިޝަނަރަށް ޑްރާފްޓް އޮޑިޓް ރިޕޯޓް ފޮނުވިއިރު، އެ ރިޕޯޓްތައް ކްލަބްތަކާ ހިއްސާނުކުރާތީ، ބައެއް ކްލަބްތަކުން ކަންބޮޑުވުން ފާޅުކޮށްފައިވެ އެވެ.
ވޮލީ އެސޯސިއޭޝަންގެ ރައީސްގެ މަގާމު ހުސްވީ، އެ މަގާމު އަދާކުރަމުން އައި، މުހައްމަދު ރަނޭޝް (ރަނޭ) އިސްތިއުފާދިނުމުންނެވެ. ފެބްރުއަރީ 27 ވަނަ ދުވަހު، ރަނޭޝް، ވީއޭއެމްގެ ރައީސްކަމުން އިސްތިއުފާ ދިނީ، ދިިރިއުޅުމުގެ ކަންކަން ހުރި ގޮތުން ކަމަށް ބުނެ، މާޗް އެއް ވަނަ ދުވަހުން ފެށިގެން މަގާމުގެ ޒިންމާތައް ދޫކޮށްލާނެކަން ހާމަކުރެއްވުމަށް ފަހު އެވެ.
މިއީ، ލަތީފް، ވީއޭއެމްގެ ރައީސްކަން ކުރައްވާ ދެ ވަނަ ފަަހަރެވެ. އެންމެ ފުރަތަމަ 2016 ވަަނަ އަހަރު މަގާމަށް އިންތިހާބުވުމަށް ފަހު، 2019 ވަނަ އަހަރު މަގާމުން ވަކިވީ، ކޮމިޝަނާ އޮފް ސްޕޯޓްސް އަކަށް ކުރިން ހުންނެވި، ހީނާ އަހުމަދު ސަލީމް، އެ އެސޯސިއޭޝަން ހިންގުން ނޯމަލައިޒިން ކޮމިޓީއަކާ ހަވާލުކުރަން ނިންމުމުންނެވެ.
ލަތީފް، މި ވަގުތު، ވީއޭއެމްގެ ރައީސަކަށް އެ ހުންނެވީ، ހިނގަމުން މިދާ ވޮލީ އެސޯސިއޭޝަންގެ ދައުރުގެ ފަހު އަހަރަށެވެ.
