ރާއްޖޭގައި ބޭއްވި ކާވާ 20 އަހަރުން ދަށުގެ އަންހެން ވޮލީބޯލް ޗެމްޕިއަންޝިޕްގެ ފައިނަލުގައި ސްރީ ލަންކާގެ މައްޗަށް ސީދާ ތިން ސެޓުން ކުރިހޯދާ ކިރްގިސްތާނުން މުބާރާތުގެ ޗެމްޕިއަންކަން ހޯދައިފި އެވެ.
މުބާރާތުގެ ލީގު ބުރުގައި މި ދެ ޓީމު ބައްދަލުކުރި މެޗު ކާމިޔާބުކުރީ 3-2 ސެޓުން ސްރީ ލަންކާ އެވެ. އެކަމަކު މިރޭ ކުރިއަށްދިޔަ ފައިނަލުގައި ކިރްގިސްތާނުން ވަނީ ލަންކާގެ މައްޗަށް ސީދާ ތިން ސެޓުން ކުރިހޯދައިފަ އެވެ. މި މެޗުގެ ސެޓުތައް ކިރްގިސްތާނުން ގެންދިޔައީ 28-26, 17-25 އަދި 25-19 އިންނެވެ.
މުޅި މެޗުގައި ވެސް އެންމެ ވާދަވެރިކޮށް ފެނިގެންދިޔައީ މެޗުގެ ފުރަތަމަ ސެޓެވެ. މި ސެޓު ފަށައިގެން ތިން ޕޮއިންޓްގެ ލީޑަކާއެކު ލަންކާ ކުޅުނު ނަމަވެސް ސެޓުގެ މެދުތެރެއިން ކުޅުން ރަނގަޅުކޮށް ކިރްގިސްތާނުން ވަނީ އެ ޓީމު ކޮޅަށް ނަތީޖާ އަނބުރާލާފަ އެވެ. އަދި މި ސެޓުގެ މެދުތެރެއިން ކިރްގިސްތާނުން ފަސް ޕޮއިންޓްގެ ލީޑެއްވެސް ނެގިއެވެ. އެކަމަކު ސެޓުގެ ފަހު ކޮޅު ލަންކާއިން ވަނީ އަލުން ލީޑު ނަގާފަ އެވެ. އަދި އެ ޓީމަށް ސެޓު ނިންމަން ވެސް ފުރުސަތު ލިބުނެވެ. އެކަމަކު ފަހު ވަގުތު ހެދުނު ގޯސްތަކުގެ ސަބަބުން 28-26 އިން ސެޓު ލަންކާ އަށް ގެއްލުނީ އެވެ.
ކިރްގިސްތާނާއި ލަންކާ ކުޅުނު ކާވާ 20 އަހަރުން ދަށުގެ މުބާރާތުގެ ފައިނަލް މެޗުގެ ތެރެއިން.--- ފޮޓޯ: އަތޫފް އާތިފް / އަދަދު
ޖެހިގެން އައި ސެޓު ފަށައިގެންވެސް ލަންކާގެ ފަރާތުން ފެނުނީ ދަށް ކުޅުމެކެވެ. އަދި މި ސެޓުގައި އެ ޓީމުގެ ގިނަ ސާވިސްތަކެއް މިސްވި އެވެ. ލަންކާ ޓީމުން މުޅި މުބާރާތައް ބަލާއިރުވެސް އެންމެ ރަނގަޅަށް ފެނުނީ އެ ޓީމުގެ ސާވިސްތަކެވެ. އެކަމަކު މި މެޗުގެ ދެވަނަ ސެޓުގައި އެ ޓީމުގެ ފަރާތުން ގިނަ ސާވިސްތަކެއް މިސްވި އެވެ. އަދި ކިރްގިސްތާނުން ފޮނުވާލި ގިނަ ހަމަލާތަކެއް ލަންކާ އަށް ރިސީވް ކުރަންވެސް އުނދަގޫވި އެވެ. އެއާއެކު މި ސެޓު ކިރްގިސްތާނުން ކާމިޔާބުކުރީ 25-17 އިންނެވެ.
ތިންވަނަ ސެޓު ލަންކާއިން ރަނގަޅަށް ފެށި ނަމަވެސް ސެޓުގެ މެދުތެރެއިން ލަންކާ ކުޅުންތެރިންގެ ފަރާތުން ކިރްގިސްތާންގެ ހަމަލާތައް ރިސީވް ކުރުމުގައި އުނދަގޫތަކެއް ފެނިގެންދިޔަ އެވެ. އެއާއެކު ޓީމު ޕްރެޝަރަށް ވެއްޓި ގިނަ ޕޮއިންޓްތަކެއް ގެއްލުނެވެ. މި ސެޓު ކިރްގިސްތާނުން ކާމިޔާބުކުރީ 25-19 އިންނެވެ.
މި މެޗު ބައްލަވާލެއްވުމަށް ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުހައްމަދު ވަޑައިގެންނެވި އެވެ.
