މާލޭގައި ހުންނަ ކޭއެފްސީގެ ބިއްލޫރިގަނޑު ތަޅައިލި މައްސަލައިގައި އެކަކު ހައްޔަރުކޮށްފި އެވެ.
ކޭއެފްސީގެ ބިއްލޫރިގަނޑު ރޭ ތަޅައިލުމުގެ އިތުރުން މިދިޔަ ހޯމަ ދުވަހުގެ ރޭ ވެސް އެތަނުގެ ބިއްލޫރިގަނޑެއް ތަޅައިލި އެވެ.
ފުލުހުން ބުނީ ކޭއެފްސީގެ ބިއްލޫރިގަނޑު ހޯމަ ދުވަހުގެ ރޭ ތަޅައިލި މައްސަލައިގައި ކޯޓު އަމުރެއްގެ ދަށުން 48 އަހަރުގެ ފިހެނަކު ހައްޔަރު ކޮށްފައިވާ ކަމަށާއި އެ މައްސަލަ ތަހުގީގު ކުރަމުންދާ ކަމަށެވެ.
ނަމަވެސް ރޭ ބިއްލޫރިގަނޑު ތަަޅައިލި މައްސަލައާ ގުޅިގެން މިހައިތަަނަށް މީހަކު ހައްޔަރުކޮށްފައި ނުވާ ކަމަށް ވެސް ފުލުހުން ބުންޏެވެ.
ކޭއެފްސީގެ ބިއްލޫރިގަނޑު މީގެ ކުރިން ވެސް އެތައް ފަހަރެއްގެ މަތިން ވަނީ ތަޅައިލަފަ އެވެ. މީގެ ކުރިން އެތަނަށް ކަޅުތެޔޮ ވެސް ޖެހި އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ލާއިންސާނީ ގަތުލުއާންމާ ގުޅިގެން ކޭއެފްސީ ބޮއިކޮޓު ކުރުމަށް ގޮވާލައި އެތަނުގެ ބޭރުގައި، ލިޔުންތައް ހަރުކުރަމުން އަންނަތާ ދުވަސްކޮޅެއް ވެއްޖެ އެވެ. އިޒްރޭލަށް ވާގިވެރިވެ މާލީ އެހީދޭ ބްރޭންޑުތަކުގެ ތެރޭގައި ކޭއެފްސީ ހިމެނެ އެވެ.
ފަލަސްތީނުގެ ރައްޔިތުން އިސްވެ ހިންގާ ބޮއިކޮޓް، ޑައިވެސްޓްމަންޓް، ސެންްކްޝަންސް (ބީޑީއެސް) ހަރަކާތުން ބޮއިކޮޓް ކުރާ ލިސްޓުގައިވެސް ކޭއެފްސީ ހިމެނެ އެވެ.
ފްރެންޗަައިޒް އުސޫލުން ހިންގާ މި ރެސްޓޯރަންޓު ރާއްޖޭގައި ހިންގަނީ ގަމާ އައިލެންޑް ފުޑް ޕްރައިވެޓް ލިމިޓެޑް ކިޔާ ކުންފުންޏަކުންނެވެ. މި ކުންފުނީގެ ހިއްސާދާރުންނަކީ އައިލެންޑް ފުޑް ޕްރައިވެޓް ލިމިޓެޑް ކިޔާ ދިވެހި ކުންފުންޏަކާއި އިންޑިއާގެ ގަމާ ޕިއްޒާކްރާފްޓް އޯވާސީސް ލިމިޓެެޑެވެ.
