މިލާން (ޖުލައި 19) - ޒްލަޓާން އިބްރަހިމޮވިޗްގެ ދަރިފުޅު، 17 އަހަރުގެ މެކްސިމިލިއަން އިބްރަހިމޮވިޗް، އޭސީ މިލާނާ އެކު، ޕްރޮފެޝަނަލް ކޮންޓްރެކްޓެއްގައި ސޮއިކޮށްފި އެވެ.
ފުރަތަމަ ޕްރޮފެޝަނަލް ކޮންޓްރެކްޓްގައި ސޮއިކުރުމުގެ ކުރިން، މެކްސިމިލިއަން އައީ މިލާންގެ ޔޫތު ޓީމުތަކަށް ކުޅެމުންނެވެ.
ސްވިޑެންގެ ހެމަބީ ޔޫތު ޓީމަށް ކުޅުނު މެކްސިމިލިއަން އެންމެ ފުރަތަމަ ޔޫތު ލެވަލްގައި މިލާނަށް ކުޅުނީ، 2022 ވަނަ އަހަރު މިލާންގެ 17 އަހަރުން ދަށުގެ ޓީމަށެވެ. އޭގެ ފަހުން، 18 އަހަރުން ދަށުގެ ޓީމަށް ކުޅުމަށް ފަހު، މިދިޔަ ސީޒަނުގައި މިލާންގެ 23 އަހަރުން ދަށުގެ ޓީމަށް ވެސް ކުޅުނެވެ.
މިދިޔަ އަހަރު މިލާނުގެ ޓްރެއިނިނެއްގެ ތެރެއިން ޒްލަޓާން އިބްރަހިމޮވިޗް (ވ) އާއި މެކްސިމިލިއަން (ކ).
އެ ގޮތުން، މިލާންގެ 23 އަަހަރުން ދަށުގެ ޓީމުގައި ހިމެނި، މެކްސިމިލިއަން ވަނީ ސީނިއާ ޓީމާ އެކު ވެސް ޕްރެކްޓިސްތަކުގައި ބައިވެރިވެފަ އެވެ. އެއިރު، މެކްސިމިލިއަންގެ ބައްޕަ، ޒްލަޓާން ވެސް މިލާންގެ ސީނިއާ ޓީމަށް ކުޅެ އެވެ.
މިދިޔަ އަހަރު ފުޓްބޯޅައިން ރިޓަޔާކުރި އިބްރަހިމޮވިޗް ވަނީ ދެ ފަހަރެއްގެ މަތިން މިލާނަށް ކުޅެފަ އެވެ. އޭނާ ފުޓްބޯޅައިން ރިޓަޔާކުރުމަށް ފަހު މިހާރު މަސައްކަތް ކުރަމުން އަންނަނީ މިލާންގެ އެޑްވައިޒަރީ ރޯލެއްގަ އެވެ.
ޕައޮލޯ ފޮންސޭކާގެ ކޯޗުކަމުގައި މިލާނުން ކުރިއަށް އޮތް ސީޒަނަށް ޕްރީ ސީޒަން ފަށާފައިވާއިރު، އެ ޓީމުން ވަނީ، ޓީމު ވަރުގަދަ ކުރުމުގެ ގޮތުން، ސްޕެއިނަށް ޔޫރޯ ކާމިޔާބުކޮށްދިން ފޯވާޑް، އަލްވާރޯ މޮރާޓާގެ ސޮއި ހޯދައިފަ އެވެ.
