ރާއްޖޭގައި މަސައްކަތް ކުރާ ބިދޭސީ މަސައްކަތްތެރިންގެ ފީ ނުދައްކާ ކުންފުނިތަކުގެ ނަމާއި ނުދައްކާ ފައިސާގެ ތަފުސީލު ހާމަކުރަން ހޯމް މިނިސްޓްރީން ދެކޮޅު ހަދައިފި އެވެ.
ބިދޭސީ މަސައްކަތްތެރިންގެ ފީގެ ގޮތުގައި ދައުލަތަށް ދައްކަން ޖެހޭ 1.7 ބިލިއަން ރުފިޔާ ނުދައްކައި އެބަ އޮތް ކަމަށް އެ މިނިސްޓްރީން ފުރަތަމަ ބުނީ ޖޫން 4، ގައި ގެޒެޓުކުރި އިއުލާނެއްގަ އެވެ. އެ އިއުލާނާއެކު ޖޫން 18، ގެ ކުރިން ފައިސާ ނުދައްކާ ފަރާތްތަކުގެ މައުލޫމާތު އާންމުކުރާނެ ކަމަށްވެސް މިނިސްޓްރީން ބުންޏެވެ. ނަމަވެސް އެ މައުލޫމާތެއް ހާމައެއް ނުކުރެ އެވެ.
މިނިސްޓްރީގެ އިއުލާނާއެކު، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން ވާނީ ފައިސާ ނުދައްކާ ކުންފުނިތަކުގެ ނަމާއި ފީގެ ގޮތުގައި ނުދައްކާ ފައިސާ އަދި ޖޫރިމަނާގެ ގޮތުގައި ހުރި ފައިސާގެ ތަފުސީލުތައް ހޯދަން އެދިފަ އެވެ.
ޖޫން 5، ގައި ހުށަހެޅި އެ އާރުޓީއައި ރިކުއެސްޓަށް ހޯމް މިނިސްޓްރީން ޖަވާބު ދީފައިވަނީ ޖުލައި 10، ގަ އެވެ.
ޖަވާބުގައި ބުނެފައިވަނީ އެ މައުލޫމާތު ތަކަކީ މިވަގުތަށް ހިއްސާކުރެވެން ނެތް މައުލޫމާތުތަކެއް ކަމަށެވެ. އަދި ކުރިއަށް އޮތްތަނުގައި އެދުނު މައުލޫމާތުތައް މިނިސްޓްރީން އާންމުކުރާނެ ކަމަށް ފޮރިން ލޭބާ ޑިޕާޓްމަންޓުން ބުނެފައިވާ ކަމަށްވެސް އިންފޮމޭޝަން އޮފިސަރުގެ ޖަވާބުގައި ބުނެފައިވެ އެވެ.
މިހާތަނަށްވެސް ހޯމް މިނިސްޓްރީން އެ މައުލޫމާތުތަކެއް ހާމައެއް ނުކުރެ އެވެ. ނަމަވެސް ނުލިބިވާ ފައިސާގެ ތެރެއިން 74 މިލިއަން ރުފިޔާ ލިބިފައިވާ ކަމަށް ހޯމް މިނިސްޓްރީން ޖުލައި 14، ގައި ބޭއްވި ނޫސްވެރިންގެ ބައްދަލުވުމެއްގައި ބުނެފައިވެ އެވެ. ޖުމްލަ ފައިސާގެ ތެރެއިން އަދިވެސް 1.6 ބިލިއަން ނުލިބެ އެވެ.
ހޯމް މިނިސްޓްރީން ފުރަތަމަ ކުރި އިއުލާނުގައި ބުނީ، ނުލިބޭ ފައިސާ އަކީ ޖުމްލަ 10،619 ވަޒީފާދޭ ފަރާތުގެ (އެމްޕްލޯޔަރުންގެ) ނަންމަތީގައި ރަޖިސްޓަރީ ކުރެވިފައިވާ 102،807 ބިދޭސީ މަސައްކަތްތެރިންގެ ފީ އާއި ޖޫރިމަނާގެ ފައިސާ ކަމަށެވެ.
